ზურა ჯაფარიძე დიდუბე-ჩუღურეთის მაჟორიტარობის კანდიდატი იქნება

“გირჩის” ლიდერი, ზურაბ ჯაფარიძე 2020 წლის საპარლამენტო არჩევნებში კენჭს თბილისში, დიდუბე-ჩუღურეთის მაჟორიტარულ ოლქში იყრის.  

“საბჭოთა საქართველოზე ოცნებიდან ჩემი კონკურენტი დიდუბე-ჩუღურეთის ოლში იქნება ბ-ნი გია ვოლსკი, რომელსაც ამ წუთიდან ვიწვევ საჯაროდ სასაუბროდ ქვეყნისთვის საჭირბოროტო ნებისმიერ თემაზე, იქნება ეს ეკონომიკა თუ იქნება ეს დეოკუპაცია, მისთვის მისაღებ ნებისმიერ მედია პლატფორმაზე, ნებისმიერ დღეს, ნებისმიერ დროს, ნებისმიერ ფორმატში”, – ამბობს ჯაფარიძე. 

დიდუბე-ჩუღურეთის ოლქში  “ქართულმა ოცნებამ” მაჟორიტარობის კანდიდატად პარლამენტარი გია ვოლსკი წარადგინა. 

ამ ოლქში გეგმავს მაჟორიტარობას “მოძრაობა ხალხისთვის” დამფუძნებელი ანა დოლიძეც. 

• მოსაზრება: ოლიგარქის რევანში

• რატომ არის მნიშვნელოვანი ბრძოლა პროპორციული სისტემისთვის

ჯაფარიძის კანდიდატურას მხარ უჭერს ევროპული საქართველო. 

„საინტერესო და განსხვავებული ორთაბძოლა იქნება დიდუბე-ჩუღურეთის ოლქში. ცეკას ინსტრუქტორი „ოცნებიდან“ გია ვოლსკი და ზურა ჯაფარიძე. „ევროპული საქართველო“ მზად ვართ ზურასთან ერთად ჩავერთოთ „დესოვიეტიზაციის“ კამპანიაში. დიხ, ზუსტად ასე იქნება, დიდუბე-ჩუღურეთში დამარცხდება მენტალურად საბჭოთა და გეოპოლიტიკურად რუსული მმართველობა. ჩვენ მზად ვართ ზურასთან ერთად ჩვენს კოლეგა ოპოზიციურ პარტიებთან კონსულტაციისთვის, რომ სწორედ ზურა იყოს ოპოზიციის ერთიანი კანდიდატი. ზურაბ ჯაფარიძე – წარმატება და გამარჯვება შენ“, – წერს გიგი უგულავა ფეისბუქზე.

2020 წლის საპარლამენტო არჩევნები ოქტომბრის ბოლოს ჩატარდება. 

პარლამენტის 120 წევრი არჩეული იქნება პროპორციული სიით, ხოლო 30 დეპუტატი – მაჟორიტარული ოლქებიდან.

პროპორციული სიით დეპუტატის გაყვანისთვის, პოლიტიკურმა პარტიამ არჩევნებში ხმების 1% უნდა მიიღოს, ხოლო საარჩევნო ბლოკმა იმდენი 1%, რამდენი პარტიაც არის მასში გაწევრიანებული. მაგალითად, თუ საარჩევნო ბლოკში სამი პარტიაა გაერთიანებული, მაშინ მან პარლამენტში დეპუტატების გაყვანისთვის სულ მცირე ამომრჩეველთა ხმების 3% უნდა მიიღოს. 

დანარჩენ 30 ადგილს კი მაჟორიტარულ ოლქებში გამარჯვებული კანდიდატები შეავსებენ.