წითელმა ჯვარმა საქართველოს სინოფარმის 100 ათასი დოზა აჩუქა

წითელმა ჯვარმა საქართველოს სინოფარმის 100 ათასი დოზა აჩუქა. ვაქცინა საქართველოში 12 სექტემბერს, გამთენიისას ჩამოიტანეს.

საქართველოში სინოფარმით აცრა 18 წელს ზემოთ მოქალაქეებისთვის არის შესაძლებელი და ვაქცინაციისთვის საჭირო 2 დოზა 21 დღის ინტერვალით კეთდება.  

საქართველოში 4 დასახელების ვაქცინაა ხელმისაწვდომი: “ფაიზერი”, “ასტრაზენეკა”, “სინოფარმი” და “სინოვაკი”. ასევე, დაავადებათა კონტროლის ეროვნული ცენტრის დირექტორის, ამირან გამყრელიძის თქმით, საქართველოში სექტემბერში, სავარაუდოდ Johnson & Johnson-ის ვაქცინის 50 000 დოზა შემოვა.

გამყრელიძის განმარტებით, აქტიურად განიხილება ე.წ. ბუსტერის საკითხიც. რომელიც – როგორც გამყრელიძე ამბობს – როგორც სამეცნიერო ლიტერატურიდან, ისე მისი პირადი მოსაზრებით, საჭირო გახდება.

მისივე თქმით, 12 წელს ზემოთ მოზარდების აცრას საქართველო, სავარაუდოდ, შემოდგომაზე დაიწყებს. ამ ეტაპზე მიმდინარეობს და მზადდება გარკვეული წანამძღვრები, თუ როგორ უნდა მოემზადოს ქვეყანა მოზარდების აცრისთვის:

“რა თქმა უნდა, ჩვენთვის დამატებითი არგუმენტი იქნება ჯანმრთელობის მსოფლიო ორგანიზაციის გადაწყვეტილება.”

_____________________________________________

● საქართველოს კლინიკების ასოციაცია: ლეტალობის ასეთი მაჩვენებელი კატასტროფულია
● Covid-19-ის მეოთხე ტალღა – რა ხდება საქართველოში. ბოლო მონაცემები
● საქართველოში საველე ჰოსპიტლებმა დაიწყო მუშაობა

________________________________________________

ბოლო თვეების განმავლობაში საქართველოში ყოველდღიურად კორონავირუსით 5000-მდე ინფიცირების და 90-მდე გარდაცვალების შემთხვევა იყო. თუმცა ბოლო სამი დღეა გარდაცვლილების და დაინფიცირებულების რაოდენობამ შედარებით იკლო.

დაავადებათა კონტროლის ცენტრი ამბობდა, რომ თუ  დადებითობის მაჩვენებელი 4 პროცენტზე დაბლა არ იქნება,  სწავლის დაწყების რეკომენდაციას ვერ გასცემენ, თუმცა სექტემბრის დასაწყისში ცნობილი გახდა, რომ ბავშვები საკლასო ოთახებს 4 ოქტომბერს დაუბრუნდებიან.

მძიმეა ვითარება კლინიკებშიც. ციციშვილის სახელობის ბავშვთა სამედიცინო ცენტრის დირექტორი, მაია ჩხაიძე ამბობს, რომ რეანიმაციაში, დღეის მონაცემებით, კორონავირუსით ინფიცირებული 42 პაციენტი მკურნალობს. მათგან ყველაზე მძიმე 40 დღის ჩვილის მდგომარეობაა, რომელიც მართვით სუნთქვაზეა. 

კორონავირუსით ჩვილების და შშმ პირების ინფიცირების წყარო მათი ოჯახის წევრები არიან.