"წაშალე, თორემ ხელებს მოგაჭრით" - მუქარა JAMnews-ის რედაქტორს Wildberries-ის შესახებ კრიტიკული კომენტარების გამო
მუქარა JAMnews-ის რედაქტორს
JAMnews-ის რედაქტორს დაემუქრნენ კრიტიკული კომენტარის გამო რუსული ინტერნეტმაღაზია Wildberries-ის შესახებ, რომელმაც, საერთაშორისო სანქციების ქვეშ მყოფმა, საქართველოში დაიწყო ოპერირება.
უსაფრთხოების მიზნით, ჩვენ არ ვასახელებთ ჩვენი კოლეგის ვინაობას.
Telegram-ის მომხმარებელმა ჩეჩნური გვარით ზელიმხან ბორაევმა, “როგორღაც” გაარკვია მისი საცხოვრებელი ადგილი თბილისში, დაასახელა კონკრეტული ტერიტორია და დაემუქრა, რომ თუ კომენტარს არ წაშლიდა, მივიდოდა და „ხელებს მოაჭრიდა“.
Wildberries არის ონლაინ ჰიპერმარკეტი, რომელიც დაარსდა რუსეთში 2004 წელს ვლადისლავ და ტატიანა ბაკალჩუკების მიერ. ეს უნივერსალური საცალო ქსელი ყიდის თითქმის ყველაფერს, მათ შორის ტანსაცმელს, კოსმეტიკას, საკვებს, საყოფაცხოვრებო ტექნიკას, ალკოჰოლს და წიგნებს. კომპანია რუსეთის ბიუჯეტის ერთ-ერთი უმსხვილესი გადამხდელია და უკრაინის წინააღმდეგ ომის მხარდაჭერის გამო დასავლეთის სანქციების ქვეშ მოექცა.
Wildberries და მისი დირექტორი უკრაინისა და ევროკავშირის წევრი სახელმწიფო პოლონეთის შავ სიაში არიან. კომპანიის პრეზიდენტი, ტატიანა ბაკალჩუკი, გავრცელებული ინფორმაციით, მუშაობს ახალი ონლაინ გადახდის სისტემის შექმნაზე, რომელიც შეამსუბუქებს იმ სირთულეებს, რომლებსაც რუსული ბანკები განიცდიდნენ Swift-დან გათიშვის გამო, იუწყება Bloomberg.
23 ოქტომბერს ქართულ სოციალურ ქსელებში რუსული კომპანია Wildberries-ის ადგილობრივ ბაზარზე შესვლის შესახებ ინფორმაცია გავრცელდა.
ამის შესახებ იმავე დღეს რუსული ონლაინ გამოცემის Paper Kartuli-ის ტელეგრამის არხიც წერდა, რომელიც საქართველოდან მუშაობს. JAMnews-ის რედაქტორი ამბობს, რომ მან კრიტიკული კომენტარი დატოვა ამ არხზე Wildberries-ის შესახებ ახალი ამბების ქვეშ:
“გამოცემის ცნობით, Wildberries-მა დაიწყო ოპერირება საქართველოში, მაგრამ არ უხსენებია, რომ კომპანია ევროკავშირისა და აშშ-ის სანქციების ქვეშ იმყოფებოდა, რადგან ის მონაწილეობდა რუსეთის ომის დაფინანსებაში უკრაინის წინააღმდეგ. კომენტარში დავწერე, რატომ გაჩუმდნენ ამ მნიშვნელოვან ფაქტზე და დავსვი კითხვა: როგორ წერენ ასეთ ამბებს ქვეყანაში ყოფნისას, რომლის ნაწილიც რუსეთის მიერ არის ოკუპირებული?”
ამ კომენტარიდან 20 წუთის შემდეგ მამაკაცმა ზელიმხან ბორაევმა JAMnews-ის რედაქტორს პირადად მისწერა:
“წაშალეთ შეტყობინება Wildberries-ის შესახებ, თორემ ხელებს მოგაჭრით, რომ აღარ დაწეროთ. შენ ****-ზე ცხოვრობ ხო,“ – წერს ზელიმხან ბორაევი.
“მომდევნო მესიჯში მან უკვე მითხრა თბილისის ტერიტორია, სადაც ვცხოვრობ. იმის გათვალისწინებით, რომ ის Paper Kartuli-ის ჩატშია, ბორაევი ალბათ საქართველოშია“, – ამბობს ის და დასძენს, რომ პირველად დაუკავშირდა „Paper Kartuli-ს, მაგრამ მათ „მხოლოდ სინანული გამოხატეს და განაცხადეს, რომ ეს არ არის პირველი შემთხვევა, როცა მათ მომხმარებლებს ემუქრებიან“.
შემდეგ JAMnews-ის რედაქტორი პოლიციას დაუკავშირდა.
“მე და ჩემმა კოლეგამ ოთხი საათი გავატარეთ პოლიციის ფილიალში ძველი ქალაქის რაიონში, ამბის ყველა დეტალს ისევ და ისევ ვიმეორებდით. პოლიცია გამომძიებელს საქმის გადაცემას დაჰპირდა და ახლა შედეგებს ველოდებით. მეორე დღეს დავუკავშირდი უკრაინის საკონსულოს [JAMnews-ის რედაქტორი უკრაინელია] და ჩემი ფრანგი მეზობელი თავის საელჩოს დაუკავშირდა. ჩვენ ვცდილობდით ამ ფაქტის შესახებ ყურადღების მიპყრობას“, – ამბობს ის.
ბორაევის მუქარის გაგზავნისთანავე მან წაშალა მიმოწერა და ავატარზე დადო სკრინშოტი რუსული მემიდან.
საერთაშორისო მედიაში კოლეგების დახმარებით ჩვენ დავიწყეთ ჟურნალისტური მეთოდების გამოყენებით მუქარის ავტორის ვინაობის გარკვევა:
”აღმოჩნდა, რომ მან რამდენჯერმე შეიცვალა სახელი Telegram-ზე. ადრე მას ეძახდნენ გენერალ ივონკერს (General Ivonker) და შუტცშტაფელს (SchutzStaffel). მისი ანგარიში რეგისტრირებულია 2022 წლის აპრილიდან და ის იყო ჩამოთვლილ ჯგუფებში “Rusi u Zemunu” და “Toyota Celica Russia”. შესაძლოა, გარკვეული პერიოდი სერბეთში ცხოვრობდა, რადგან აქტიური იყო რუსული დიასპორის ადგილობრივ ჩეთებში“.
ამ ამბავში ჩეჩნური კვალი განსაკუთრებით საგანგაშოა, რადგან ჩეჩნები, კადიროვის მეთაურობით, აქტიურად არიან ჩართული კორპორატიულ დავაში კომპანიის “რეორგანიზაციის” შესახებ, რაც Wildberries-ის კომპანია Russ-თან შერწყმამ განაპირობა.
ამ საქმეში რუსეთის ხელისუფლების უმაღლესი წარმომადგენლები არიან ჩართული, მათ შორის, თავად პუტინი. 2024 წლის 18 სექტემბერს მოსკოვში Wildberries-ის სათაო ოფისში შეიარაღებული კონფლიქტი და სროლა მოხდა კრიმინალურ ჯგუფებს შორის. მაშინ ორი მესაზღვრე დაიღუპა და შვიდი დაშავდა. ამ მოვლენებში აქტიურად ჩაერთნენ ჩეჩნებიც.
JAMnews დიდი ყურადღებით ელის საქართველოს პოლიციის მიერ ჩვენი რედაქტორის მუქარის ფაქტზე დაწყებული გამოძიების შედეგებს.