"ვითარება საკმაოდ მუქ ფერებში გამოიყურება" - იუკნევიჩიენე და კუბილიუსი ქართველ ხალხს მიმართავენ
ევროპარლამენტარების წერილი
ევროპარლამენტარები, რასა იუკნევიჩიენე და ანდრიუს კუბილიუსი ქართველ ხალხს ღია წერილით მიმართავენ, სადაც ამბობენ, რომ თუ ადრე საქართველო ევროკავშირში ინტეგრაციის გზაზე მოწინავე პოზიციებზე იდგა, ახლა ვითარება შეცვლილია და ის საკმაოდ მუქ ფერებში გამოიყურება.
ევროპარლამენტარების განმარტებით, რამდენიმე წლის წინ აკადემიურმა ანალიზმა აჩვენა, რომ საქართველო იყო ყველაზე მომზადებული ქვეყანა, მათ შორის თუ შევაფასებთ არამხოლოდ აღმოსავლეთ პარტნიორობის ქვეყნებს, არამედ დასავლეთ ბალკანეთსაც. თუმცა დღეს ევროკავშირში და ევროპარლამენტში ჭარბობს მოსაზრება, რომ სიტუაცია საქართველოში ბოლო რამდენიმე წლის განმავლობაში გაუარესდა.
“მიუხედავად მრავალი გაფრთხილებისა, ამჟამინდელმა ხელისუფლებამ არ გასწია სათანადო სამუშაოები, რომ საქართველოს ევროკავშირში ინტეგრაციის გზაზე მოწინავე პოზიციებზე შეენარჩუნებინა. ამან ასევე საგრძნობლად გაართულა ევროკავშირსა და ამერიკაში საქართველოს მეგობრების მუშაობა”, – წერია განცხადებაში.
მათივე თქმით, ოლიგარქიზაცია და მისი თანმხლები პოლარიზაცია საქართველოში კვლავ მაღალ დონეზეა, იმ ერთი ადამიანის ხელში კონცენტრირებული, რომელიც არაა ანგარიშვალდებული ხალხის მიმართ დემოკრატიული არჩევნების გზით.
როგორც კუბიულიუსი და იუკნევიჩიენე აღნიშნავენ, მოლდოვას, მაგალითად, იგივე პრობლემები ჰქონდა, პლახოტნიუკთან და დოდონთან მიმართებით, თუმცა ეს საკითხი დემოკრატიული არჩევნების გზით გადაწყდა.
დეპუტატები ეხმაურებიან საქართველო მესამე პრეზიდენტის, მიხეილ სააკაშვილის პატიმრობასაც და მას იულია ტიმოშენკოს პატიმრობას ადარებენ:
“ყველას გახსოვთ, რომ უკრაინის ურთიერთობაზე ევროკავშირთან იმოქმედა ყოფილი პრემიერის იულია ტიმოშენკოს პატიმრობამ და ამაზე გადაწყვეტილებიდან დასკვნების გამოტანა შესაძლებელია.”
წერილში საუბარია შარლ მიშელიც ანულირებულ დოკუმენტზეც. ევროპარლამენტარების თქმით, მიუხედავად ევროკავშირის უპრეცედენტოდ მაღალი დონის ძალისხმევისა, რათა მოგვარებულიყო პოლიტიკური ჩიხი საქართველოში და პრო-ევროპულ დღის წესრიგი წინ წასულიყო, “შარლ მიშელის შეთანხმება” კვლავ არაა იმპლემენტირებული.
დეპუტატების განმარტებით, საქართველოს მმართველი პარტიის პოზიცია უკრაინაზე და ევროკავშირის სანქციებზე, რუსეთის მიმდინარე აგრესიული ომის ფონზე უკრაინის წინააღმდეგ, გაუგებარია. როგორც ისინი აღნიშნავენ, უკრაინელები არა მხოლოდ საკუთარ ტერიტორიას და სახლებს იცავენ, ასევე დემოკრატიას, თავისუფლებას და ევროპულ ღირებულებებს, რაც მნიშვნელოვანია საქართველოსთვისაც.
“უკრაინა იმსახურებს ყველა ჩვენგანის ურყევ მხარდაჭერას, ასევე მარტივ გაგებას, რომ უკრაინა კარს უხსნის მოლდოვასაც და საქართველოსაც კანდიდატობის სტატუსისკენ. ჩვენ ვიცით, რომ ქართველი ხალხი ასე ფიქრობს”, – აღნიშნულია მიმართვაში.
კუბიულიუსი და იუკნევიჩიენე ასევე ამბობენ, რომ ხანდახან მათ ჰგონიათ, რომ საქართველოს მმართველ წრეშია ვიღაც, ვინც აქტიურად აკეთებს ყველაფერს, რათა საქართველო არ გაწევრიანდეს ევროკავშირში.
მიმართვაში ვკითხულობთ, რომ ევროკომისია შეფასებისას ყოველთვის ითვალისწინებს სრულ სურათს განმცხადებელი ქვეყნის მზადყოფნასთან დაკავშირებით: დემოკრატია, კანონის უზენაესობა და ადამიანის უფლებების პატივისცემა ისეთივე მნიშვნელოვანია, როგორც სამართლებრივი და ეკონომიკური შესაბამისობა ევროკავშირის კანონმდებლობასთან.
ასევე, პოლიტიკური კრიტერიუმები დიდი ყურადღებით განიხილება. დეპუტატების თქმით, არსებობს ნათელი ისტორიული მაგალითები, როდესაც განმცხადებელ ქვეყანაში არადემოკრატიული ტენდენციები არა მხოლოდ მკაცრად გააკრიტიკეს, არამედ ევროკავშირში გაწევრიანება შეჩერდა. ასეთ მაგალითად კი დეპუტატებს სლოვაკეთი მოჰყავთ, ვლადიმირ მეჩიარის პრემიერობისას, რომელმაც მან ძალაუფლება მიიტაცა და ამის გამო ვერ მოხერხდა 1997 წელს სლოვაკეთის კავშირში გაწევრიანება.
დეპუტატების თქმით, იმ დროს სლოვაკი ხალხის აბსოლუტური უმრავლესობა მყარად უჭერდა მხარს ევროკავშირის წევრობას. თუმცა, მხოლოდ სახალხო მხარდაჭერა საკმარისი არ არის.
“ევროკავშირის კანდიდატის სტატუსის მიღება არ არის დამოკიდებული ჩვენს, საქართველოს მეგობრების, სიტყვებით დარწმუნებაზე. ეს დამოკიდებულია ნამდვილი ერთგულებასა და საერთო ძალისხმევაზე, რაც უნდა აჩვენოს ხელისუფლებამ, პოლიტიკურმა ოპოზიციამ და ხალხმა”, – წერენ დეპუტატები.
ისინი ხაზს უსვამენ, რომ საქართველოს მთავრობამ უნდა გააცნობიეროს, რომ საქართველოს პრობლემების მოგვარების გასაღები თბილისშია და არა ბრიუსელში. და თუ ეს ზედმეტად დიდი გამოწვევაა ამ მთავრობისთვის, “არსებობს დემოკრატიული გზები მისი სხვებისთვის გადაცემისთვის, სკამებზე ყველაფრის ფასად ჩაჭიდების ნაცვლად.”
დეპუტატები აღნიშნავენ, რომ ოპოზიციურმა პარტიებმა ასევე უნდა გამონახონ ძალა, ცალკეულ საკითხებზე მაღლა დადგნენ და ქართველ ხალხს შესთავაზონ ევროინტეგრაციის სანდო სტრატეგია, აჩვენონ სანდო ლიდერშიფი, რაც საჭიროა მსგავსი ამოცანისთვის.
“თუ ასე არ მოხდა, ყველაფერი შეიძლება მივიდეს წერტილამდე, როცა ქართველ ხალხს მოუწევს, გადაწყვიტოს, თუ რას ირჩევს – ამჟამინდელ პოლიტიკურ სტრუქტურას ბიძინა ივანიშვილით და ქართული ოცნებით ქვეყნის სათავეში, თუ საქართველოს ევროპულ მომავალს”, – წერია ღია წერილში.
საქართველო, უკრაინა და მოლდოვა ევროკავშირის წევრობის კანდიდატი ქვეყნის სტატუსის მიღებას ელოდებიან. ევროკავშირის წევრობაზე განაცხადი სამივე ქვეყანამ ერთდროულად შეიტანა. ეს პროცესი უკრაინის ომმა დააჩქარა.
ევროკავშირში გაწევრიანების განაცხადი საქართველომ 3 მარტს წარადგინა. 11 აპრილს კი ევროკავშირისგან თვითშეფასების კითხვარის პირველი ნაწილი მიიღო. კითხვარები მიიღეს უკრაინამ და მოლდოვამაც და მათ ის უკვე შეავსეს კიდეც.
მმართველი პარტია “ქართული ოცნების” თავმჯდომარე ევროკავშირში გაწევრიანების შესახებ ამბობს, რომ საქართველო ყველა პარამეტრით უსწრებს უკრაინას და მოლდოვას.
