FBI-ის გამოძიება: ვინ აფინანსებდა ამერიკელი კონგრესმენების აზერბაიჯანში ვიზიტებს?
აშშ-ის გამოძიების ფედერალურმა ბიურომ ჩხრეკა ჩაატარა ამერიკელი კონგრესმენის, აშშ-ის პარლამენტის ქვედა პალატაში აზერბაიჯანის ფრაქციის ყოფილი თანათავმჯდომარის, ჰენრი კუელარის სახლში. გამოძიება დაკავშირებულია აზერბაიჯანული სახელმწიფო კომპანიების მიერ ამერიკელი პოლიტიკოსების ვიზიტების დაფინანსებასთან. აზერბაიჯანელი პოლიტიკოსის აზრით, სკანდალის მიზეზი აზერბაიჯანის ხელისუფლების მიერ მსოფლიო რეალობის ვერგაგებაა.
ჩხრეკა კონგრესმენის სახლში
ამ დღეებში, აშშ-ის გამოძიების ფედერალური ბიუროს (FBI) აგენტებმა ჩხრეკა ჩაატარეს ტეხასიდან დემოკრატი კონგრესმენის, ჰენრი კუელარის სახლში. ამის შესახებ ABC News იტყობინება.
წყაროს ცნობით, რეიდი ფართომასშტაბიანი ფედერალური გამოძიების ფარგლებში ჩატარდა, რომელიც აზერბაიჯანსა და რამდენიმე ამერიკელ ბიზნესმენს უკავშირდება.
კუელარის თანაშემწემ განაცხადა, რომ კონგრესმენი „სრულად ითანამშრომლებს (ხელისუფლებასთან) ნებისმიერ გამოძიებაში“.
კუელარი აშშ-ის კონგრესის წევრი 2005 წლიდან არის. ბოლო წლებში ის ამერიკის პარლამენტის ქვედა პალატაში აზერბაიჯანის ფრაქციის თანათავმჯდომარე იყო და არაერთხელ შეხვდა ოფიციალურ პირებს აზერბაიჯანიდან, ვაშინგტონში აზერბაიჯანის ელჩის, ელინ სულეიმანოვის ჩათვლით, აღნიშნავს გამოცემა.
FBI-სა და იუსტიციის სამინისტროს წარმომადგენლებს ჯერჯერობით კომენტარი არ გაუკეთებიათ ამ ისტორიაზე.
ამ ძიების ქვეშ მყოფ საქმეში ასევე გარეულია თურქული წარმოშობის ამერიკელი ქემალ კევინ ოქსიუზი.
ვინ არის ქემალ კევინ ოქსიუზი?
2018 წელს სომხეთში დაკავებული ინტერპოლის „წითელი ცირკულარით“ ძებნილი თურქული წარმოშობის აშშ-ის მოქალაქე ქემალ კევინ ოქსიუზი აშშ-ში ლობისტურ საქმიანობას ეწეოდა აზერბაიჯანის სასარგებლოდ.
აზერბაიჯანში კონგრესმენების ვიზიტების საქმეზე ჩვენების მიცემისას ოქსიუზმა აღიარა კონგრესის წარმომადგენლებისთვის ყალბი ცნობების მიწოდება.
ამრიგად, ოქსიუზმა 2013 წელს აზერბაიჯანში აშშ-ის პარლამენტის რამდენიმე წარმომადგენლის ვიზიტების ორგანიზების შესახებ თავის მოხსენებებში აღნიშნა, რომ მათ საკუთარი ორგანიზაციის ხარჯზე აფინანსებდა და არ იღებდა ფინანსურ დახმარებას საზღვარგარეთიდან.
გამოძიების ერთ-ერთი ვერსიით, ამით ქემალ კევინ ოქსიუზმა ხელისუფლებას დაუმალა აზერბაიჯანის მთავრობის კუთვნილი სახელმწიფო კომპანია SOCAR-ის მიერ აღნიშნული მოგზაურობების დაფინანსების სქემა.
კომენტარი ბაქოდან
ამერიკელი კონგრესმენის გარშემო აზერბაიჯანში ვიზიტების გამო განვითარებული მოვლენების კომენტირებისას, პოლიტიკოსმა, აზერბაიჯანული ოპოზიციური პარტია „რესპუბლიკური ალტერნატივის“ აღმასრულებელმა მდივანმა ნატიკ ჯაფარლიმ აღნიშნა, რომ მთავარი პრობლემა აზერბაიჯანის ხელისუფლების მიერ მსოფლიო რეალობის ვერგაგებაა.
„ყველასთვის ცნობილია, რომ აშშ-ში ლობისტური საქმიანობა სრულიად კანონიერია. არსებობს სპეციალური კანონები, რომლებიც ასეთ საქმიანობას არეგულირებს. მაგრამ, რატომღაც, აზერბაიჯანის ხელისუფლებას, ისევე როგორც ადგილობრივ კომპანიებს, ყველაფერი კანონის ფარგლებში არ აქვთ. შეიძლებოდა ამ ყველაფრის ლეგალიზება, შესაბამისი ხელშეკრულებების ხელმოწერა და ეს არავის არ გაუჩენდა ეჭვებს.
ავიღოთ იგივე უკრაინა, რომლის გარშემოც დღეს ასეთი არეულობაა. ამ სახელმწიფოს სასარგებლოდ ამერიკის პარლამენტში ერთდროულად რამდენიმე ლობისტური ჯგუფი მუშაობს. სრულიად კანონიერად. ამ ადამიანებთან ხელმოწერილია ხელშეკრულებები, ყველაფერი გამჭვირვალეა. ასეთმა სენატორებმა და კონგრესმენებმა, რომლებიც ამა თუ იმ ქვეყანას ლობირებენ, ამისთვის ფულადი ჯილდოც კი შეიძლება მიიღონ. კანონები აშშ-ში ამის საშუალებას იძლევა.
სკანდალი აზერბაიჯანში ვიზიტების გარშემო სინამდვილეში იმის გამო წარმოიშვა, რომ დაფინანსების ფაქტი დამალეს. მიუხედავად იმისა, რომ ამის გაკეთება ცივილური გზით შეიძლებოდა. იმავე SOCAR-ს შეეძლო შეთანხმება გაეფორმებინა. მეტი არაფერი. მხოლოდ კანონის დაცვა იყო საჭირო. როგორც ვხედავთ, ცარიელ ადგილზე სკანდალის მთავარი მიზეზი აზერბაიჯანის ხელისუფლების მიერ მსოფლიო რეალობის არასწორი გაგებაა. შესაძლებელი და აუცილებელია მსოფლიო ანალიტიკურ ცენტრებთან მუშაობა. კანონის მიხედვით. და არ ვიფიქროთ, რომ რადგან ფული გვაქვს, ყველაფრის ყიდვა შეგვიძლია“, – განაცხადა ჯაფარლიმ.
