უწყვეტი პროტესტი რუსთაველის გამზირზე. ვიდეო ბლოგების სერიიდან "პროტესტი საქართველოში"
აქციის მონაწილეებმა რუსთაველის გამზირი გადაკეტეს
პროტესტის 325-ე დღე რუსთაველის გამზირზე აქცია გრძელდება. პროტესტის მონაწილეებმა გზის სავალი ნაწილი ორჯერ გადაკეტეს.
პოლიციამ მონაწილეებს გზის გათავისუფლება მოსთხოვა. დღეს შსს-მ გაავრცელა განცხადება, რომლის მიხედვითაც, ქუჩის არ გათავისუფლების შემთხვევაში, პოლიცია “კანონით მისთვის მინიჭებული მანდატის ფარგლებში” იმოქმედებდა.გაფრთხლების შემდეგ აქციის მონაწილეებმა პროტესტი ტროტუარზე განაგრძეს.
ერთ წელზე მეტია საქართველოში უწყვეტი საპროტესტო აქციები მიმდინარეობს. აქციის მონაწილეები ყოველ საღამოს იკრიბებიან ქვეყნის დედაქალაქში, თბილისსა და საქართველოს რამდენიმე პატარა ქალაქში.
აქციების მიმდინარეობისას ათობით ადამიანი დააკავეს. ბევრ მათგანს სისხლის სამართლის ბრალდება წაუყენეს და პატიმრობა მიუსაჯეს. პირველად, დამოუკიდებელი საქართველოს ისტორიაში, გვყავს 150-მდე სინდისის პატიმარი, მათ შორის ქალები. დაპატიმრებულია გამოცემების “ბათუმელებისა” და “ნეტგაზეთის” დამფუძნებელი, მზია ამაღლობელი. მას ორწლიანი პატიმრობა აქვს მისჯილი პოლიციელისთვის სილის გაწვნის ფაქტზე.
აქციის მონაწილეები ითხოვენ გათავისუფლდეს ყველა პოლიტიკური პატიმარი, დაინიშნოს ახალი საპარლამენტო არჩევნები, რადგან, 2024 წლის შემოდგომის არჩევნებს ამ დრომდე არ აქვს აღიარება და გაუქმდეს ყველა ის ანტიდემოკრატიული კანონი, რაც ბოლო ორ წელიწადში მიიღო “ქართულმა ოცნებამ”.
პროტესტის ჩასახშობად, “ქართული ოცნება” სულ უფრო ამკაცრებს რეპრესიებს სამოქალაქო საზოგადოებისა და მედიის წინააღმდეგ. თუმცა, უწყვეტი პროტესტი, სხვადასხვა ფორმით, დღემდე გრძელდება.
