„უსირცხვილო ფარისევლობა“ - აფხაზეთში ინფიცირების რეკორდების ფონზე შეზღუდვებს ამსუბუქებენ

კორონავირუსი აფხაზეთში 

აფხაზეთში, 25 იანვარს, COVID-19-ით ინფიცირების დღიური მაჩვენებლის რეკორდი დამყარდა – 500-ზე მეტი შემთხვევა. ამის მიუხედავად, მთავრობამ გადაწყვიტა არსებითად შეამსუბუქოს შეზღუდვის ზომები. სულ აფხაზეთის მოსახლეობა 240 ათასზე ცოტათი მეტია, სტატისტიკის თანახმად კი, COVID-19 უკვე 40 ათასზე მეტმა ადამიანმა მოიხადა. 

ექსპერტები დაავადების მკვეთრ ზრდას აფხაზეთში კორონავირუსის ახალი შტამის – „ომიკრონის“ გავრცელებით ხსნიან. მიუხედავად იმისა, რომ ჯერ კიდევ გასულ კვირას მთავარმა სანიტარულმა ექიმმა, ლუდმილა სკორიკმა განაცხადა, რომ აფხაზეთის ტერიტორიაზე ის დაფიქსირებული არ იყო, ერთ-ერთი კერძო ქსელური კლინიკის ხელმძღვანელმა ამინა ამიჩბამ აღნიშნა, რომ მათმა ლაბორატორიამ უკვე „ომიკრონის“ შტამის 24 შემთხვევა გამოავლინა. 

• გარიყული აუცრელები – ანტივაქსერები ევროპაში სულ უფრო მეტ შესაძლებლობასა და უფლებას კარგავენ
• რა საერთო აქვთ ქართველ, სომეხ და უკრაინელ ანტივაქსერებს
• რუსეთის მოქალაქე ბებიის გადასარჩენად კოვიდსაავადმყოფოში შეიპარა და გამოძიებას საქართველოში გაექცა

მისი აზრით, მთლიანად აფხაზეთში, ალბათ, ახალი შტამის გავრცელების დონე გაცილებით მაღალია, რადგან სახელმწიფო ლაბორატორიებს არ აქვთ „ომიკრონის“ ამოცნობის საშუალება. 

ორშაბათს 1036 ჩატარებული ტესტით COVID-19-ით ინფიცირების 538 შემთხვევა დაფიქსირდა. წინა დღესთან შედარებით დაავადებულთა რაოდენობა სამჯერ გაიზარდა. 

ამასობაში, რესპუბლიკის მთავარი სანიტარული ექიმი ლუდმილა სკორიკი არსებულ ვითარებას აფასებს, როგორც „რთულს, მაგრამ სტაბილურს“ და ამის გამო მთავრობას შეზღუდვის არსებული ზომების საგრძნობლად შემსუბუქებას სთავაზობს. 

კერძოდ, კულტურის ობიექტების საქმიანობასთან დაკავშირებით – თეატრების, კულტურის სახლებისა და მუზეუმების, რომლებიც უკვე წელიწადზე მეტია პანდემიის გამო არ ფუნქციონირებენ. 

ექსპერტებს მიაჩნიათ, რომ სკორიკის წინადადება, ალბათ, ხელისუფლების მიერ მიღებული იქნება, რადგან სინამდვილეში ის მხოლოდ ხელისუფლების გამზადებულ პოზიციას ახმოვანებს, რათა 12 მარტს დანიშნული საპარლამენტო არჩევნები ჩვეულებრივ რეჟიმში ჩატარდეს – საარჩევნო უბნების უდიდესი ნაწილი სწორედ კულტურის ობიექტებშია განთავსებული. 

სოციალურ ქსელებში უკიდურესად კრიტიკულად მიიღეს ხელისუფლების განზრახვა იმ დროს, როდესაც რესპუბლიკაში კორონავირუსით ინფიცირების მკვეთრი ზრდა შეინიშნება. 

აი, რას წერს ამასთან დაკავშირებით პოპულარული აფხაზი ბლოგერი დმიტრი მაქსიმოვიჩი: 

„ჩვენმა ღრმად პატივცემულმა ხელისუფლებამ და ქალბატონმა სკორიკმა გადაწყვიტეს, ხალხს დიდსულოვანი საჩუქარი გაუკეთონ წინასაარჩევნოდ ანტიკოვიდური ზომების შემსუბუქების სახით. ეს გასაგებია – აქტივისტები სადღაც ხომ უნდა შეიკრიბონ. უფრო დიდი ფარისევლობის მოფიქრება, რა თქმა უნდა, რთული იყო, მაგრამ პოლიტიკური ბრძოლის მიზანი, როგორც ცნობილია, ნებისმიერ საშუალებას ამართლებს.

და მართალია, კოვიდთან დაკავშირებული სიტუაცია ჩვენთან არ შემსუბუქებულა, პირიქით, ძალიან ადვილად გადამდები ომიკრონი მოდის, საავადმყოფოებში ყოველდღიურად იღუპებიან ადამიანები, ექიმები კი შეუცვლელად მუშაობენ, კვირობით ვერ ნახულობენ ახლობლებს – არაფერი, რა თქმა უნდა, დროა გაიხსნას კულტურის სახლების კარები და იქ მასობრივი თავყრილობები მოეწყოს!

მათ, ვინც ჯერ კიდევ ცოტა ხნის წინ მკვეთრად ეწინააღმდეგებოდნენ კულტურის დაწესებულებების გახსნას, დღეს სწრაფად შეცვალეს ფირფიტა. რის საფუძველზე, შეიძლება ვკითხოთ?

„ჩვენთან მკვეთრად შემცირდა დაავადებულთა რაოდენობა თუ წარმატებებს მივაღწიეთ ვაქცინაციის პროცესში? უსირცხვილო ფარისევლობაა საკუთარი ხალხისადმი“

ამიტომ, მადლობა, რა თქმა უნდა, საჩუქრისთვის, მაგრამ უკეთესი იქნება, თუკი კულტურის სახლები, სოფლების კლუბები და ბიბლიოთეკები დახურულები დარჩებიან კიდევ რამდენიმე თვე, მთელი წლის განმავლობაში ამას უკვე მივეჩვიეთ, ცოტას კიდევ მოვიცდით. გაივლის ზამთრის კრიზისული პერიოდი და ვაქცინირებულთა და დაავადებამოხდილთა რიცხვის ზრდის შესაბამისად, შესაძლებელი იქნება შეზღუდვების მოხსნის საკითხის განხილვა. ახლა კი არ არის საჭირო, გმადლობთ“.

აფხაზეთში კორონავირუსით ინფიცირებულთა საერთო რიცხვი, 25 იანვრის მონაცემებით, 40 398 ადამიანს შეადგენს.

დარეგისტრირებულია გარდაცვალების 587 შემთხვევა. გამოჯანმრთელდა 35 202 ადამიანი.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო