"ტყვია შუბლში, ბავშვები თავშესაფარში" - 10 მაგალითი იმისა, თუ როგორ ასწავლიან პატრიოტიზმს რუსეთში
პატრიოტიზმი და სასჯელი რუსეთში
10 ინციდენტი რუსეთში, რომელიც გასულ კვირიაში მოხდა და რომელსაც დამოუკიდებელი რუსული გამოცემები „აისბერგის მწვერვალს“ უწოდებენ. აქ ჩანს, თუ როგორ ასწავლიან პატრიოტიზმს რუსეთში, ჯერ კიდევ დაწყებითი კლასებიდან.
1.
ტულის რაიონში მეექვსე კლასელი მოსწავლის მამა დააკავეს, რომელმაც ომის საწინააღმდეგო ნახატი დახატა. ალექსეი მოსკალევის წინააღმდეგ აღძრულია სისხლის სამართლის საქმე „რუსული არმიის განმეორებით დისკრედიტაციის“ მუხლით. მისი ქალიშვილი ბავშვთა სახლში გადაიყვანეს.
2.
პერმის მხარეში მასწავლებელი მერვეკლასელს შუბლში ტყვიას დაჰპირდა, რადგან 23 თებერვალს სამშობლოს დაცვის დღისადმი მიძღვნილ საზეიმო შეხვედრაზე დააგვიანა. ”ნაძირალა, რომელსაც არ აქვს პატრიოტიზმი; მოღალატე, რომელიც უკრაინაში უამრავია – წადი იქ. გაეთრიე!” – უთხრა მან. ამ საუბრის ვიდეოს ყურება ღირს:
3.
ბარნაულში, უკრაინის ომის წლისთავზე, სკოლის მოსწავლემ დაღუპული უკრაინელების ხსოვნისადმი მიძღვნილი დაფა ყვავილებით და სათამაშოებით შეამკო. მისი დედის წინააღმდეგ აღძრულია საქმე “მშობლის მოვალეობის შეუსრულებლობის ფაქტზე”. მათი სახლიდან ამოიღეს ყველა კომპიუტერი და ტელეფონი.
- დნესტრისპირეთის დაბრუნება. როგორ გავაერთიანოთ მოლდოვა, სანამ რუსეთი უკრაინას ებრძვის
- უკრაინის სოლიდარობის აქცია 24 თებერვალს. ფოტო და ვიდეო
- ევროპაში რუსული პროპაგანდა აკრძალულია, მაგრამ ასობით კლონი წარმატებით აგრძელებს მუშაობას
- “პედოფილი, განავლის მწმენდავი, ჩაძაღლდეს” – რუსეთში მიიღეს სიტყვების სია, რომელთა გამოყენება აკრძალულია პუტინთან მიმართებით
4.
ნავალნის მოკავშირემ, ლიუბოვ სობოლმა გამოაქვეყნა ვიდეო მოსკოვის სკოლიდან, სადაც ნაჩვენებია ნიღბიანი ვაგნერელი, რომელიც ესაუბრება საშუალო სკოლის მოსწავლეებს და იწვევს მათ, რომ შეუერთდნენ “ვაგნერის” რიგებს, რადგან მათ სჭირდებათ “ძლიერი და პერსპექტიული” ახალგაზრდები.
5.
მოსკოვის ხალხთა მეგობრობის უნივერსიტეტმა მოაწყო ტრადიციული „თანამემამულეთა გამოფენა“, სადაც, სხვებთან ერთად, უკრაინელები წარმოდგენილნი იყვნენ უკრაინის დროშის ქვეშ. განათლების სამინისტრომ განაცხადა, რომ მიაჩნია, რომ „მიუღებელია ნეო-ნაცისტური რეჟიმის დროშების ფრიალი, რომელსაც არავითარი კავშირი არ აქვს რუსული კულტურის პოპულარიზაციასთან“.
დაიწყო ოფიციალური შემოწმება, სტუდენტებმა ღია წერილი დაწერეს.
6.
17 წლის სპორტსმენმა ნიჟნი ნოვგოროდში ერთკაციანი აქცია გამართა. მას ბანერზე ეწერა: “არა ომს, არა სიგიჟეს”.
დენის ბუშუევი დაჯარიმდა 700 დოლარით. მასწავლებლებთან საგანმანათლებლო საუბრისას მას ურჩიეს საავადმყოფოში წასულიყო, “სადაც არიან ჩვენი ბიჭები, რომლებსაც უკრაინელებმა კასტრაცია გაუკეთეს“ და ასევე, ურჩიეს არ წაეკითხა დამოუკიდებელი პრესა, რადგან „ისინი არ ამბობენ იმას, რაც რუსეთისთვის სასარგებლოა“.
7.
ბელგოროდის რაიონში ადგილობრივი მოხალისეების ხელმძღვანელმა “დოჟდის” კორესპონდენტები პოლიციას გადასცა და მათ “მტრები” და “ქათმები” უწოდა. მან პოლიციელებს ურჩია „მათთვის კოშმარი მოეწყოთ“. ჟურნალისტი პოლიციის განყოფილებაში სამი საათის განმავლობაში იმყოფებოდა და მას იარაღის მუქარით ყველა გადაღებული კადრი წააშლევინეს.
8.
ცხრა წლით თავისუფლების აღკვეთა მიუსაჯეს ერთ-ერთი ანტირუსული ტელეგრამის ადმინისტრატორს, დმიტრი ივანოვს, რუსული არმიის შესახებ „სიყალბის გავრცელების“ გამო.
ტელეგრამ-არხზე საუბარია უკრაინელი მშვიდობიანი მოსახლეობის დაღუპვის, შენობების განადგურების და რუსული ავიაციის მნიშვნელოვანი დანაკარგების შესახებ; ასევე, რუსული ჯარების მიერ მარიუპოლის სამშობიარო საავადმყოფოს აფეთქებაზე, ბუჩასა და ირპენში ომის დანაშაულებზე.
9.
მოსკოვში, თანასაკნელებმა 18 წლის აქტივისტს, მაქსიმ ლიპკანს სცემეს და იძულებით გადაპარსეს თავი.
ის “რადიო თავისუფლებისთვის” ინტერვიუს მიცემის შემდეგ დააკავეს და ყალბი ამბების გავრცელებაში დაადანაშაულეს. ადვოკატის თქმით, ლიპკანს ემუქრებიან, რომ შესაძლოა „ქათმებში მოხვდეს“ მისი შეხედულებების გამო.
10.
ომის შედეგები ასევე მოიცავს:
- უძრავი ქონების მფლობელების შესახებ ინფორმაციის საბოლოო კლასიფიკაციას;
- რუსების მიერ უცხოურ კლინიკებში მკურნალობის ხელმისაწვდომობის თითქმის სრულად დაკარგვას.
