ნოდარ მელაძე გაბუნიას საქმეზე სუს-ში გამოკითხეს

“ტვ პირველის” მთავარი პროდიუსერი ნოდარ მელაძე გიორგი გაბუნიას მკვლელობის მომზადების საქმეზე სუს-ში გამოკითხეს. 

საქმე ეხება 20 ივნისს, ტელეკომპანიის ეთერში გასულ სიუჟეტს, სადაც აღნიშნული იყო, რომ სახელმწიფო უსაფრთხოების სამსახურის (სუს) მიერ ვასამბეკ ბოკოვის სახელით დაკავებული ადამიანი სინამდვილეში ვასამბეკ ბოკოვი არ არის და ის სხვა ადამიანის სახელით და გვარით სარგებლობს. მელაძის თქმით, სუს-ს აინტერესებდა, როდის გაიგო ინფორმაცია გიორგი გაბუნიას მკვლელობის მომზადების საქმეზე და ამ თემაზე სიუჟეტი ჟურნალისტებმა თავისი ინიციატივით მოამზადეს თუ ვინმეს თხოვნით ან დავალებით.

“ტვ პირველის” ეთერში გასულ სიუჟეტში სავარაუდო ბრალდებულის, ვასამბეკ ბოკოვის ძმა ამბობს, რომ არაერთხელ ნახა სუს-ის მიერ გავრცელებული ვიდეო, სადაც ბოკოვის დაკავების პროცესი ჩანს და კადრებში საკუთარი ძმა ვერ ამოიცნო. ძმის მონათხრობზე დაყრდნობით, გამოთქმული იყო ვარაუდი, რომ დაკავებული სინამდვილეში ვასამბეკ ბოკოვი არ არის და ის სხვა ადამიანის პასპორტს იყენებს. 

“აინტერესებდათ, რა შინაარსის დოკუმენტებია ჩვენს ხელში და გვაქვს თუ არა კიდევ სხვა მასალები, რომლებიც ჯერ ეთერით არ გაგვისაჯაროებია. ყველა ამ კითხვაზე არის ერთი პასუხი, სისხლის სამართლის საპროცესო 50-ე მუხლი, რომელიც გვაძლევს საშუალებას ჩვენი ჟურნალისტური საქმიანობის ფარგლებში მოპოვებული ნებისმიერი ინფორმაციის შესახებ ჩვენება არ მივცეთ,” – ამბობს გამოკითხვიდან გამოსული ნოდარ მელაძე.

• გიორგი გაბუნიას ლიკვიდაციის განზრახვა დესტაბილიზაციის რუსულ გეგმად უნდა შეფასდეს – არასამთავრობო სექტორი
• რამზან კადიროვის დაკვეთით გიორგი გაბუნიას მკვლელობა იგეგმებოდა – ნიკა გვარამია

ნოდარ მელაძის შემდეგ, სახელმწიფო უსაფრთხოების სამსახურმა გამოკითხვაზე შაბათის ეთერში გასული სიუჟეტის ავტორი, მაკა ჩიხლაძეც დაიბარა. მელაძე ამბობს, რომ ახლა ჟურნალისტური გამოძიების მეორე ნაწილს ამზადებს, რომელშიც, გაბუნიას საქმესთან დაკავშირებული კიდევ უფრო მნიშვნელოვანი დოკუმენტები გასაჯაროვდება.

15 ივნისს, “მთავარი არხის” დირექტორმა, ნიკა გვარამიამ განაცხადა,  რომ რუსეთის მოქალაქე ვასამბეკ ბოკოვი, რომელიც თბილისში,  ქავთარაძის ქუჩაზე 12 ივნისს ჩატარებული სპეცოპერაციის დროს დააკავეს, ჩეჩნეთის ლიდერის, რამზან კადიროვის დაკვეთით ტელეკომპანია მთავარის ჟურნალისტის, გიორგი გაბუნიას მკვლელობას გეგმავდა.

გვარამიას ინფორმაციით, მკვლელობის დაკვეთის მიზეზი ტელეკომპანია “რუსთავი 2”-ის ეთერში გასული წლის 7 ივლისს გასული ის გადაცემაა, სადაც ჟურნალისტმა გიორგი გაბუნიამ რუსეთის პრეზიდენტს ვლადიმერ პუტინს პირდაპირ ეთერში დედა შეაგინა. 

რუსეთის მოქალაქე შეკვეთით განზრახ მკვლელობის საქმეზე გამოძიების ფარგლებში რომ დააკავეს, ეს ინფორმაცია სუს-შიც დაადასტურეს. მოგვიანებით დაადასტურეს ის ფაქტიც, რომ მკვლელობის სამიზნე გიორგი გაბუნია იყო.