თბილისში ოპოზიციის მიტინგია. მთავარი მოთხოვნა - პოლიტპატიმრების გათავისუფლება და რიგგარეშე არჩევნები
დღეს ოპოზიციური პარტიები თბილისში მასშტაბურ საპროტესტო აქციას მართავენ.
მთავარი მოთხოვნაა ყველაზე მსხვილი ოპოზიციური პარტიის, “ერთიანი ნაციონალური მოძრაობის” თავმჯდომარის, ნიკა მელიას განთავისუფლება და რიგგარეშე საპარლამენტო არჩევნების დანიშვნა.
აქციის მონაწილეები ფილარმონიასთან შეიკრიბნენ და მსვლელობით პარლამენტის შენობასთან დაიძრნენ.
აქციას რეგიონებიდან ჩამოსული ოპოზიციის მხარდამჭერებიც შეუერთდნენ.
როგორც „ევროპული საქართველოს” ერთ-ერთი ლიდერი, გიგი უგულავა აცხადებს, დღეიდან უწყვეტი საპროტესტო აქციები იწყება.
მისივე თქმით, პარლამენტის მუშაობის პარალელურად, ოპოზიცია „სირცხვილის კორიდორების” მოწყობას და პიკეტირებას გეგმავს.
პარლამენტთან გაშლილია რამდენიმე კარავი.
______________________________________
ნიკა მელია 23 თებერვალს, “ნაციონალური მოძრაობის” შტაბში სპეცოპერაციის შედეგად დააკავეს. ოპოზიციის ერთ-ერთი ლიდერის დაკავებამ კიდევ უფრო გააღრმავა ქვეყანაში არსებული პოლიტიკური კრიზისი, რომელიც გასული წლის ოქტომბრის საპარლამენტო არჩევნების შემდეგ დაიწყო. ოპოზიციამ არჩევნებს გაყალბებული უწოდა და მათი შედეგები არ აღიარა.
______________________________________________________________________________
● პოლიტიკური კრიზისი საქართველოში. იქნება თუ არა ვადამდელი არჩევნები?
● პირველი საერთაშორისო გამოხმაურებები მელიას დაკავებაზე
● Foreign Policy: საქართველოს ოპოზიციის ლიდერის დაკავებამ სანქციების მოთხოვნა გამოიწვია
______________________________________________________________________________
მელიას დაკავებამ უპრეცედენტო რეზონანსი გამოიწვია საერთაშორისო საზოგადოებაში. პრაქტიკულად ყველა საერთაშორისო ორგანიზაციამ, რომელიც საქართველოში მუშაობს, ასევე ელჩებმა და დასავლელმა პარტნიორებმა ერთხმად დაგმეს მელიას დაკავება და მას დემოკრატიის გზაზე უკან გადადგმული ნაბიჯი უწოდეს. დასავლელი პარტნიორები მოუწოდებდნენ ხელისუფლებას და ოპოზიციას დიალოგისკენ. ორივე მხარე გამოხატავს მზადყოფნას მოლაპარაკებების მაგიდასთან დასხდნენ, თუმცა ჯერ ეს არ მომხდარა. ოპოზიციას დიალოგისთვის თავისი პირობა აქვს – პოლიტპატიმრების გათავისუფლება.
