თავდასხმების სერია "ქართული ოცნების" ოპონენტებზე - ოპოზიციონერებს და აქტივისტებს სადარბაზოებთან ხვდებიან
თავდასხმები “აგენტების კანონის” მოწინააღმდეგეებზე
8 მაისის ღამეს თბილისში „აგენტების კანონის“ სულ მცირე სამ მოწინააღმდეგეს თავს დაესხნენ დაუდგენელი ჯგუფები და სცემეს.
ერთ-ერთია დიმიტრი ჩიქოვანი, ყველაზე რეიტინგული ოპოზიციური პარტიის, “ნაციონალური მოძრაობის”სამდივნოს წევრი. ჩიქოვანს თავს დაესხნენ თბილისის ცენტრალურ უბანში, სოლოლაკში, საკუთარი საცხოვრებელი კორპუსის სადარბაზოსთან.
მოგვიანებით გავრცელდა სათვალთვალო კამერების ჩანაწერი, სადაც ჩანს თუ როგორ სცემს ჩიქოვანს ხუთი თავდამსხხმელი. ვიდეოში მათი სახეები არ ჩანს. პოლიტიკოსი
ხეჩინაშვილის კლინიკაში გადაიყვანეს. მისი მდგომარეობა შეფასდა როგორც “საყურადღებო”. ექიმების განცხადებით, მას ქალა ტვინის ტრავმები აქვს, უტარდება კვლევები.
„ეს არის რეჟიმის დასასრული. ეს არის ბოლო. ვერ შეგვაშინებენ… „ქართული ოცნება“ დასრულდება – რუსული რეჟიმი ამ ქვეყანაში ვერ იარსებებს“, – თქვა ჩიქოვანმა „TV პირველის“ ეთერში ჩართვის დროს.
8 მაისს თავს დაესხნენ ასევე საერთაშორისო ურთიერთობების ექსპერტს, “აგენტების კანონის” აქტიურ მოწინააღმდედგეს, გია ჯაფარიძე. ჯაფარიძე ოპოზიციური პარტიის, „გირჩი – მეტი თავისუფლების“ ლიდერის, ზურა ჯაფარიძის ძმაა.
გია ჯაფარიძეზე ძალადობის შესახებ ინფორმაცია თავდაპირველად სწორედ ზურაბ ჯაფარიძემ გაავრცელა ფეისბუკზე:
„ჩემს ძმას დახვდა სადარბაზოსთან რამდენიმე ადამიანი და ფიზიკურად გაუსწორდნენ“.
გია ჯაფარიძემ ჟურნალისტებს მოკლე კომენტარი მისცა კლინიკაში შესვლამდე.
„რაც ხდება ქვეყანაში, ის მოხდა – რუსები დამესხნენ თავს. ორი ნამდვილად მახსოვს, შეიძლება სამი ან მეტი იყო თავდამსხმელი. სახლთან დამხვდნენ. პირდაპირ ცემა დაიწყეს, ბევრი მირტყამდა რაღაც ჯოხებს – ამბობდნენ, რატომ ვეწინააღმდეგები რუსულ კანონს“, – თქვა გია ჯაფარიძემ.
ხეჩინაშვილის სახელობის კლინიკის ექიმის თქმით, ჯაფარიძეს დატოვებენ მკურნალობისა და კვლევების ჩატარების მიზნით.
„ზოგადი მდგომარეობა სტაბილურია, იმყოფება დაკვირვების ქვეშ და უტარდება კვლევები. ქალა ტვინის ტრავმა არის, ნახეთქი ჭრილობა თავის არეში“, – თქვა ექიმმა გია ჯაფარიძის შესახებ.
იმავე ღამეს, 8 მაისის ღამეს ქუჩაში სცემეს „აგენტების კანონის“ კიდევ ერთი მოწინააღმდეგე აქტივისტს, ლაშა ღვინიანიძეს. ის ამ დროს მეგობართან ერთად იყო, რომელმაც ძალადობის ფაქტის მხოლოდ ფრაგმენტის გადაღება შეძლო.
ღვინიანიძეს მიყენებული დაზიანების გამო ქვედა ტუჩზე ჭრილობის გაკერვა დასჭირდა. ის „TV პირველს“ კლინიკიდან ესაუბრა.
„ეს დაკავშირებულია ჩემს აქტიურობასთან… დღეს 72 წლის მამას დაურეკეს და დაემუქრნენ, საღამოს აასრულეს მუქარა, რომელზეც ყველას გვეგონა, რომ სატელეფონო ხუმრობები იქნებოდა“, – ამბობს აქტივისტი, რომელიც 11 მაისს თბილისში დაგეგმილი მარშის ერთ-ერთი ორგანიზატორია.
ბოლო დღეებში პოლიტიკოსებსა და კრიტიკულად განწყობილ მოქალაქეებზე თავდასხმის ეს პირველი შემთხვევები არ არის.
7 მაისს უცნობი პირი ფიზიკურად დაესხა თავს ინფორმაციის თავისუფლების განვითარების ინსტიტუტის (IDFI) აღმასრულებელ დირექტორს, გიორგი კლდიაშვილსა და ტელეკომპანია ფორმულას გადამღებ ჯგუფს. თავდასხმა მოხდა დღისით, თბილისის ცენტრში – შვედეთის საელჩოს წინ.
5 მაისს, ლანჩხუთში, საკუთარი სახლის სადარბაზოსთან თავს დაესხნენ პედაგოგს, მასწავლებელთა ეროვნული ჯილდოს მფლობელს, ლადო აფხაზავას. აფხაზავა აქტიურად მონაწილეობდა „აგენტების კანონის“ საწინააღმდეგო დემონსტრაციებში. თავდასხმის დროს აფხაზავა შვილთან ერთად იმყოფებოდა.
1 მაისს, აქციაზე დააკავეს და სასტიკად სცემეს “ნაციონალური მოძრაობის” ლიდერი, ლევან ხაბეიშვილი. ხაბეიშვილი სპეცრაზმის მხრიდან თავდასხმის ობიექტი გახდა.
მუქარის ზარები
გარდა ფიზიკური ძალადობისა, ბოლო ორი დღეა “აგენტების კანონის” მოწინააღმდეების მიმართ ხორციელდება ფსიქოლოგიური ძალადობა და მუქარა. “აგენტების კანონის” მოწინააღმდეგეებს ტელეფონზე ურეკავენ, აგინებენ და ემუქრებიან. ზარების სამიზნე ის ადამიანები არიან, რომლებიც ღიად და საჯაროდ გამოხატავენ პროტესტს ხელისუფლების მიერ ინიციირებული “აგენტების კანონის” წინააღმდეგ. უცნობი პირები მათ ურეკავენ, აგინებენ, ემუქრებიან, ეუბნებიან, რომ იციან მათი სახლის მისამართი.
8 მაისს ასევე, საქართველოს პარლამენტის თავმჯდომარემ, შალვა პაპუაშვილმა განაცხადა, რომ ხელისუფლება ქმნის სპეციალურ ბაზას, სადაც “თავს მოიყრის ინფორმაცია შანტაჟში ჩართულ პირებზე”. ეს ინიციატივა, ფაქტობრივად, კრიტიკულად განწყობილი ადამიანების რეესტრის შექმნას, გულისხმობს, აცხადებენ სამოქალაქო საზოგადოების წარმომადგენლები.
____________________________________________________________
11 მაისს, ევროპიის დღეს, თბილისსა და სხვა ქალაქებში დაგეგმილია მსვლელობა-მარში აგენტების კანონის წინააღმდეგ. მომიტინგეები აპირებენ დედაქალაქის რამდენიმე რაიონიდან ერთდროულად დაიძრან პარლამენტის შენობისკენ.
„უცხოური აგენტების შესახებ“ კანონპროექტი მმართველმა პარტიამ, “ქართულმა ოცნებამ” პირველად ერთი წლის წინ, 2023 წლის მარტში დააინიცირა. პარლამენტმა ის პირველი მოსმენით მიიღო, მაგრამ მოქალაქეების მასობრივი პროტესტისა და დასავლეთის მწვავე კრიტიკის შედეგად, ხელისუფლებამ კანონი გაიწვია.
2024 წლის 3 აპრილს ცნობილი გახდა, რომ მმართველმა პარტიამ გადაწყვიტა კვლავ დაებრუნებინა კანონპროექტი პარლამენტში. შინაარსი იგივე დატოვეს, ოღონდ ამჯერად დაარქვეს „უცხური გავლენის გამჭვირვალობის შესახებ“ კანონი.
წელს კანონპროექტის დაბრუნებას კიდევ უფრო მასშტაბური პროტესტი მოჰყვა, ვიდრე შარშან. ათი ათასობით ადამიანი გამოვიდა ქუჩებში საპროტესტო აქციაზე. საქართველოს დასავლელი პარტნიორები მკვეთრად აკრიტიკებენ კანონპროექტს და ღიად აფრთხილებენ ხელისუფლებას, რომ ამ კანონის მიღება დიდ პრობლემებს შეუქმნის საქართველოს ევროპასთან ინტეგრაციის გზაზე. კანონი ორი მოსმენით უკვე მიიღეს. 17 მაისს პარლამენტი აპირებს იგი მესამე მოსმენით მიიღოს.
