ხელისუფლების მხარდამჭერი ბიზნესმენი სოსო ფხაკაძე ოცნებას მოუწოდებს, ვეტო არ დაძლიოს, ან კანონის ამოქმედება გადადოს
სოსო ფხაკაძის განცხადება
ხელისუფლების ერთ-ერთი ყველაზე გულმხურვალე მხარდამჭერი, ბიზნესმენი სოსო ფხაკაძე “ქართულ ოცნებას” მოუწოდებს, ვეტო არ დაძლიოს, ან კანონის ამოქმედება გადადოს 2025 წლის პირველ იანვრამდე.
სოსო ფხაკაძე ერთ-ერთია იმ ბიზნესმენებს შორის, რომლებმაც 29 აპრილს კოორდინირებულად გაავრცელეს რუსული კანონის მხარდამჭერი განცხადებები და ე.წ. გამჭვირვალობას მხარი დაუჭირეს.
იგი არის ბენზინგასამართი სადგურების ქსელის, “ვისოლის” დამფუძნებელი და 2000 წლიდან სათავეში უდგას “ვისოლის” დირექტორთა საბჭოს; “ვისოლ ჯგუფი” აერთიანებს ისეთ კომპანიებს, როგორიცაა “ვისოლი”, “სმარტი”, “ვენდისი”, “დანკინ დონატსი”, “ვიანორი” და სხვა.
სოსო ფხაკაძის განცხადება
“როგორც ამ ქვეყნის ერთ-ერთი მოქალაქე და ბიზნესმენი, თავს ვალდებულად მივიჩნევ, კიდევ ერთხელ გამოვეხმაურო ჩვენს ქვეყანაში მიმდინარე მოვლენებს.
წინა განცხადების მსგავსად, კვლავ, ხაზგასმით და ერთმნიშვნელოვნად ვაფიქსირებ ჩემს ურყევ პოზიციას ქვეყნის ევროპული და ევროატლანტიკური კურსის ერთგულებისა და ამ კურსის უალტერნატივობის შესახებ.
ვინაიდან, ჩვენს ქვეყანაში შექმნილი სიტუაციის განსამუხტად დღემდე ვერ გამოინახა კონკრეტული კომპრომისული გზა, ჩემი აზრით, მიზანშეწონილი იქნებოდა, ქვემოთ მოცემული ორი ოფციიდან ერთ-ერთის არჩევა.
პირველი, ხვალ ხელისუფლებამ გადადოს ვეტოს განხილვა; ავიღოთ გარკვეული პერიოდი და ეს დრო გამოვიყენოთ ჩვენს სტრატეგიულ პარტნიორებთან შემდგომი კონსულტაციებისთვის, რომ არ დაზიანდეს ქვეყნის კონსტიტუციით გარანტირებული საგარეო პოლიტიკური კურსი.
ან მეორე ოფცია, არსებული სამართლებრივი ინსტრუმენტებისა და კანონში ცვლილების განხორციელების გზით, კანონის ამოქმედების ვადად განისაზღვროს 2025 წლის დასაწყისი, ვთქვათ, 1 იანვარი. ამ შემთხვევაში, საპარლამენტო არჩევნების შედეგები იქნებოდა განმსაზღვრელი, თუ რამდენად მისაღებია ეს კანონი ჩვენი მოსახლეობისთვის.
აქვე, ხაზგასმით მინდა აღვნიშნო, რომ ზემოთ მოყვანილი ორივე ოფცია ეფუძნება არსებული ვითარების ანალიზს იმ ინფორმაციაზე დაყრდნობით, რომელსაც ვფლობ როგორც ერთ-ერთი ბიზნესმენი.
იმედი მაქვს, ჩემი გულწრფელი მოსაზრებები გათვალისწინებული იქნება უფლებამოსილი პირების მიერ, რაც ხელს შეუწყობს ჩვენი ქვეყნის განვითარების ნორმალურ რეჟიმში დაბრუნებას.” – წერს წერს LinkedIn-ზე ფხაკაძე.
სოსო ფხაკაძე
