სომხეთის თავდაცვის ყოფილი მინისტრი დაკავებულია

სომხეთის ეროვნული უსაფრთხოების სამსახურმა დაადასტურა ინფორმაცია თავდაცვის ყოფილი მინისტრის, დავიდ ტონოიანის დაკავების შესახებ, რომელიც ამ პოსტს 2018-2020 წლებში იკავებდა. ის განსაკუთრებით დიდი ოდენობით თანხის მითვისებაშია ეჭვმიტანილი. 

ეროვნული უსაფრთხოების სამსახური ასევე ადასტურებს დავიდ გალსტიანის დაკავებას, რომელიც სომხეთის არმიისთვის შეიარაღების მიმწოდებელ კომპანიას ხელმძღვანელობდა.

ორივე მათგანი დაკავებულია იმ სისხლის სამართლის ფარგლებში, რომელიც არმიისთვის საბრძოლო მასალის მიწოდების პროცესში, სომხეთის თავდაცვის სამინისტროსა და შეიარაღებული ძალების მაღალჩინოსნების მიერ თანამდებობის ბოროტად გამოყენებას იძიებს.

29 სექტემბერს ამის შესახებ ინფორმაცია საკუთარ წყაროებზე დაყრდნობით, გაზეთმა „ჰრაპარაკმა“ გაავრცელა. პუბლიკაციაში ასევე აღინიშნა, რომ დაკავებამდე, ყოფილი მინისტრის ბინაში ჩხრეკა ჩატარდა.

• სომხეთის დამოუკიდებლობა 30 წლისაა – რა შედეგებით ხვდება ქვეყანა ამ თარიღს. ორი აზრი
• სხვა მიწა: მთიანი ყარაბაღი ომიდან ერთი წლის შემდეგ

კიდევ რა არის ცნობილი

ეროვნული უსაფრთხოების სამსახური აცხადებს, რომ დაკავებულები ბრალდებულები არიან განსაკუთრებით დიდი ოდენობით თანხების მითვისებაში – 2 277 323 840 დრამის (დაახლოებით 4.7 მილიონი დოლარი), ასევე, „ყალბი, სოციალურად საშიში ქმედებების ჩადენაში“.

საგამოძიებო ორგანომ სასამართლოს ორივესთვის პატიმრობის შეფარდების შუამდგომლობით მიმართა.

როგორც ეროვნული უსაფრთხოების სამსახური იტყობინება, სისხლის სამართლის საქმე აღძრულია ქვეყნის შეიარაღებული ძალების სხვა ყოფილი და მოქმედი მაღალჩინოსნების წინააღმდეგაც.

თუმცა, ექსმინისტრის ადვოკატი აცხადებს, რომ დავიდ ტონოიანი ბრალს არ აღიარებს. უფრო მეტიც, ადვოკატი ამტკიცებს, რომ როგორც დაკავების, ისე პატიმრობის შეფარდების შუამდგომლობა უკანონო იყო, რადგან სასამართლომ ადრე უკვე მიიღო გადაწყვეტილება ამავე სისხლის სამართლის ფარგლებში. და ტონოიანის ბრალეულობას უარყოფს სასამართლოს მიერ მანამდე მიღებული მტკიცებულებები.

რაც შეეხება დავიდ გალსტიანს, კომპანია Mosston Engineering-ის დირექტორს, რომელიც მრავალი წლის განმავლობაში აწვდიდა იარაღს სომხეთის შეიარაღებულ ძალებს, ის უკვე იყო დაკავებული 2021 წლის თებერვალში. თუმცა, მაისში, სააპელაციო სასამართლომ პირველი ინსტანციის გადაწყვეტილება შეცვალა და ის გათავისუფლდა.

ეროვნული უსაფრთხოების სამსახურის ინფორმაციით, დავიდ გალსტიანის კომპანიამ 2018 წელს თავდაცვის სამინისტროსთან ხელშეკრულება გააფორმა 1983-1986 წლების წარმოების ჭურვების მიწოდებაზე, თუმცა, 1977 წელს გამოშვებული სამხედრო მასალა მიაწოდა.

დადგენილია, რომ ტაქტიკური მახასიათებლებით ისინი საგრძნობად ჩამორჩებოდა მათ, რომელიც არმიას ესაჭიროებოდა და მისი საშუალებით „შეუძლებელი იყო სამხედრო ამოცანების გადაწყვეტა“. ამასთან დაკავშირებით, დაკავებული ეჭვმიტანილია ერთ მილიონ დოლარზე მეტის მითვისებაში.

Mosston Engineering-ის ხელმძღვანელის ადვოკატმა ჯერ კიდევ თებერვალში განაცხადა, რომ სასამართლოს კონტრაქტის შესაბამისი საბრძოლო მასალის მიწოდების უტყუარი მტკიცებულებები წარუდგინეს:

„სინამდვილეში, ეს ეპიზოდი, რომელიც 70-იან წლებს უკავშირდება, ძალიან სასაცილოა, იმიტომ რომ, თავად საქმის მასალები, წარმოდგენილი ყველა მტკიცებულება უარყოფს 70-იანი წლების ჭურვების მიწოდებას. უბრალოდ, ადამიანებს, რომლებიც არ იყვნენ სფეროს სპეციალისტები, არ შეეძლოთ განსხვავების დანახვა კონკრეტული ჭურვების წარმოების თარიღსა და კონკრეტულ ციფრებს შორის, რომლებიც ჭურვის დეტალებზე იყო მითითებული. პრობლემა ამაში მდგომარეობდა“.

კიდევ ვის ეხება ეს საქმე

29 სექტემბერს, სომხურმა მედიამ ინფორმაცია გაავრცელა ამავე საქმეზე სომხეთის შეიარაღებული ძალების გენშტაბის ხელმძღვანელის მოადგილის, სტეპან გალსტიანის დაკავების შესახებ. სულ მცირე, ოფიციალურად დადასტურებულია ინფორმაცია იმის შესახებ, რომ ის ეროვნული უსაფრთხოების სამსახურში იყო დაბარებული.

მანამდე მედიაში ქვეყნდებოდა ინფორმაცია იმის შესახებ, რომ ამ საქმეზე უკვე დააკავეს სომხეთის შეიარაღებული ძალების ავიაციის ყოფილი ხელმძღვანელი, ავეტიკ მურადიანი.

ეროვნული უსაფრთხოების სამსახურის ინფორმაციაში სახელი მითითებული არ იყო, მაგრამ ითქვა, რომ მაღალჩინოსანმა სამხედრომ იცოდა, რომ ერთ-ერთმა მიმწოდებელმა კომპანიამ ჯერ კიდევ 2011 წელს შემოიტანა ვადაგასული და უხარისხო სამხედრო მასალა, მაგრამ ამან ხელი არ შეუშალა მათ შესყიდვას, რისთვისაც სახელმწიფო ბიუჯეტიდან 4.7 მილიონი დოლარი გადაიხადეს. 2009-დან 2019 წლამდე ავიაციის მიმართულების ხელმძღვანელის თანამდებობას გენერალ-მაიორი ავეტიკ მურადიანი იკავებდა.

ჭორებსა და საკუთარ წყაროებზე დაყრდნობით სომხური მედია წერს, რომ უახლოეს მომავალში შესაძლოა დააკავონ სომხეთის თავდაცვის ყოფილი მინისტრი სეირან ოჰანიანი და სომხეთის შეიარაღებული ძალების გენშტაბის ყოფილი ხელმძღვანელი, იური ხაჩატუროვი. ორივე მათგანს ეს თანამდებობები 2008-2016 წლებში ეკავათ.

ეროვნული უსაფრთხოების სამსახურის ბოლო განცხადებაში ნათქვამია, რომ „ტარდება ფართომასშტაბიანი ოპერატიულ-სამძებრო და საგამოძიებო ღონისძიებები დანაშაულის მთელი ჯაჭვის სრულად გამოვლენისა და მასში მონაწილე ყველა პირის იდენტიფიცირების მიზნით“.