სკანდალი აფხაზეთში: ახალი წლის ღამეს გამგებელმა რესტორანში სროლა ატეხა და ორი ადამიანი დაჭრა

სროლა აფხაზეთში

აფხაზეთში მაღალჩინოსანმა ახალი წლის ღამეს რესტორანში ორი ადამიანი დაჭრა. მხოლოდ ოთხი დღის შემდეგ ასლან ბჟანიამ თავისი განკარგულებით მსროლელი თანამდებობიდან დროებით გადააყენა. იგი ოჩამჩირის რაიონის გამგებელი ბესლან ბიგვავა აღმოჩნდა.

მომხდარის შესახებ ოფიციალური ინფორმაცია ძალიან მწირია. შსს-ს პრესსამსახურში მხოლოდ იმას აცხადებენ, რომ რესპუბლიკურ საავადმყოფოში მამაკაცი ცეცხლსასროლი იარაღით დაჭრილი მიიყვანეს და ის სოხუმში, რესტორან „გარუდაში“ დაჭრეს.

• მოსაზრება: რატომ შეიძლება აფხაზეთში ზოგისთვის რაღაცის გაკეთება, სხვებისთვის კი არა?

• მოსაზრება: ემოციების კრიზისი აფხაზეთში
• იარაღი როგორც კულტურა. აფხაზეთის მოსახლეობას თავდაცვის უფლება მისცეს

მეორე დაჭრილის შესახებ, რომელიც რესტორნის მიმტანი  ქალი აღმოჩნდა – სიტყვა არავის დაუძრავს. ასევე, ამ ფაქტზე ეჭვმიტანილებსა და დაკავებულებზე არაფერია ნათქვამი.

“მომხდარის ყველა გარემოების დასადგენად მიმდინარეობს საგამოძიებო და ოპერატიული ღონისძიებები“, – შინაგან საქმეთა სამინისტროს პრესსამსახურმა მომხდარი მოკლედ შეაჯამა.

იმავდროულად, სოციალურ ქსელებში მსროლელის სახელის გახმაურებისთანავე, დაიწყეს ხელისუფლების დადანაშაულება ერთის მხრივ, მის მფარველობაში და საქმის დახურვის მცდელობაში, ხოლო მეორეს მხრივ, ორმაგ სტანდარტებში.

ეს არ არის სროლასთან დაკავშირებული პირველი ინციდენტი სახელმწიფო მოხელეების მონაწილეობით – 2021 წლის სექტემბერში, ოპოზიციონერი დეპუტატი გარი კოკაია სამართალდამცავებმა სცემეს მას შემდეგ, რაც მან სოხუმის ცენტრში მდებარე რესტორანთან ჰაერში ისროლა.

ამ ამბავმა მასიური პროტესტი და პოლიტიკური კრიზისი გამოიწვია, რასაც საბოლოოდ შსს-ს ხელმძღვანელის თანამდებობა შეეწირა.

„ცოტა ხნის წინ, გამარჯვების დღეს, ოპოზიციის დეპუტატმა დღესასწაული ჰაერში იარაღის სროლით აღნიშნა, რამდენიმე საათის შემდეგ მისი სახელიც გაახმაურეს და მის წინააღმდეგ სასწრაფოდ სისხლის სამართლის საქმეც აღიძრა. აქ კი ჩინოვნიკმა ორი ადამიანი დაჭრა და „მიმდინარეობს საგამოძიებო და ოპერატიული ღონისძიებები“. და სად არის ის კანონი, რომლის წინაშეც ყველა თანასწორია?“ – წერს ერთ-ერთი კომენტატორი სოციალურ ქსელში.

თუმცა ბესლან ბიგვავას ბევრი დამცველიც გამოუჩნდა. მის მხარდასაჭერად კოლექტიურ წერილებს ოჩამჩირის რაიონის მცხოვრებლები წერენ.

შემთხვევის ყველა გარემოების გარკვევის შემდეგ, ისინი მის სამსახურში დაბრუნებას ითხოვენ, ვინაიდან „პირველად ომისშემდგომ წლებში ჩვენს რაიონს ჰყავს ხელმძღვანელი, რომლის პრინციპულობის და უანგარობის ყველას სჯერა, პირადი ამბიციების და პოლიტიკური შეხედულებების მიუხედავად.“

ოჩამჩირელებს მიაჩნიათ, რომ ბიგვავამ იარაღი თავდაცვის მიზნით გამოიყენა. მათი ვერსიით, ბესლან ბიგვავა რესტორანში შამპანურის ბოთლით მივიდა, რაც მის ადმინისტრაციას დიდად არ მოეწონა. მოხდა ჩხუბი, რომლის დროსაც სამმა მიმტანმა გამგებელს ცემა დაუწყო, მან კი, თავდაცვის მიზნით, ცეცხლი გაუხსნა.

ბრალდებულის მეგობარი და კოლეგა, გალის რაიონის გამგებელი კონსტანტინე ფილია, ასევე მიიჩნევს, რომ ბესლან ბიგვავა დამნაშავე არ არის. „ეხო კავკაზასთან“ ინტერვიუში ფილია, ისევე როგორც ოჩამჩირის მცხოვრებლები, ბიგვავას ქმედებებს თავდაცვით ხსნის: „ოჩამჩირის გამგებელს რესტორან “გარუდას” ხუთი მიმტანი და თანამშრომელი დაესხა თავს და სცემა“.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო