"ღრმა მწუხარებით ვაკვირდებით საქართველოს ხელისუფლების გადაწყვეტილებას" - შოლცი და მაკრონი
შოლცი და მაკრონი რუსულ კანონზე
საფრანგეთის პრეზიდენტი, ემანუელ მაკრონი და გერმანიის კანცლერი, ოლაფ შოლცი საერთო განცხადებას ავრცელებენ, რომელშიც რუსულ კანონს და “ქართული ოცნების” მიერ არჩეულ გეზს აკრიტიკებენ.
“ჩვენ, გერმანია და საფრანგეთი, ღრმად შეშფოთებულები ვართ ვითარებით საქართველოში.
ორივე ქვეყანა საქართველოს ევროპული გზის ერთგული მხარდამჭერი იყო და 2023 წლის დეკემბერში ევროპული საბჭოს გადაწყვეტილებას, საქართველოსთვის კანდიდატის სტატუსი მიენიჭებინა, აქტიურად ემხრობოდა.
ღრმა მწუხარებით ვაკვირდებით საქართველოს ხელისუფლებისა და მმართველი პარტიის გადაწყვეტილებას, ჩვენი საერთო ევროპული ღირებულებებისა და ქართველი ხალხის მისწრაფებების წინააღმდეგ მოქმედებით ამ გზიდან გადაუხვიოს, მაგალითად ე.წ. “უცხოური გავლენის გამჭვირვალობის შესახებ” კანონის მიღებით.
საქართველოს ევროპული გზა უკვე მონიშნულია, მაგრამ წინსვლის სიჩქარე და მიმართულება საქართველოზეა დამოკიდებული.” – წერია განცხადებაში.
გუშინ გავრცელდა ინფორმაცია იმის შესახებ, რომ აშშ-ის კონგრესის საგარეო ურთიერთობათა კომიტეტის წევრი და ჰელსინკის კომისიის თავმჯდომარე ჯო უილსონი, საქართველოში მომხდარი მოვლენების საპასუხოდ კანონპროექტის ინიციირებას გეგმავს, რომლის მიხედვით, სანქციები დაუწესდებათ იმ პირებს, ვინც რუსული კანონის მიღებაზეა პასუხისმგებელი.
კანონპროექტის მიხედვით, პასუხს აგებენ ის პირებიც, ვინც სხვა უკანონობებზეა პასუხისმგებელი, მაგალითად ელიტური კორუფცია, რუსეთის სანქციების თავიდან არიდება და სხვა დანაშაულებრივი ქმედებები.
ამავდროულად, კანონპროექტის თანახმად, საქართველოსთან გაძლიერდება სავაჭრო, კულტურული და სამხედრო თანამშრომლობა ქვეყნის პრორუსული კურსის შეცვლის შემდეგ.
ამასთან, გუშინ საქართველოს პრეზიდენტმა სალომე ზურაბიშვილმა რუსულ კანონს ვეტო დაადო. როგორც ზურაბიშვილმა ბრიფინგზე განაცხადა, მოტივირებული შენიშვნები პარლამენტს უკვე გადაეგზავნა.
