"შინ ევროპისკენ" - 20 ივნისს თბილისში ქვეყნის ევროპული კურსის მხარდამჭერი მასშტაბური აქცია გაიმართება
აქცია საქართველოს ევროპული კურსის მხარდასაჭერად
20 ივნისს, 20:00 საათზე, თბილისში, პარლამენტის შენობასთან, ლოზუნგით „შინ ევროპისკენ“, საქართველოს ევროპული კურსის მხარდამჭერი აქცია გაიმართება. აქციაზე ის ადამიანები შეიკრიბებიან, რომლებიც მხარს უჭერენ ქვეყნის დასავლურ კურსს და აპროტესტებენ ხელისუფლების ანტიდასავლურ პოლიტიკას.
24 ივნისს, საქართველო ევროკავშირისგან ელოდება გადაწყვეტილებას – მიანიჭებენ თუ არა კანდიდატის სტატუსს. წინასწარი პასუხი ცნობილია – საქართველოს შანსები მინიმალურია. ევროკომისიამ უკრაინასა და მოლდოვისთვის სტატუსის მინიჭებაზე რეკომენდაცია გასცა, საქართველოსთვის კი არა. საქართველოს აქვს რეფორმების გრძელი სია, რომელიც უნდა განხორციელდეს კანდიდატის სტატუსის მიღებამდე.
მათ შორის მთავარია სასამართლო და საარჩევნო რეფორმები, ასევე „დეოლიგარქიზაცია“ [საქართველოს მმართველი პარტიის დამფუძნებელი მილიარდერი ბიძინა ივანიშვილია, რომელიც 2012-2013 წლებში ქვეყნის პრემიერ-მინისტრი იყო. ამის შემდეგ მან განაცხადა, რომ პოლიტიკიდან მიდის. ბიძინა ივანიშვილს ოფიციალური თანამდებობა არ აქვს, მაგრამ არავისთვისაა საიდუმლო, რომ ქვეყანას ჩრდილიდან სწორედ ის მართავს_JAMnews]
- ემუქრება თუ არა ივანიშვილს სანქციები და რას შეცვლის ეს ქვეყანაში?
- სამოქალაქო ინიციატივა მთავრობას: დაუყოვნებლივ დაიწყეთ რეფორმები
აქციის მთავარი ორგანიზატორია სამოქალაქო მოძრაობა „სირცხვილია“. თუმცა ამ აქციას სოლიდარობას უცხადებს მრავალი სხვა საზოგადოებრივი ორგანიზაცია, პოლიტიკური პარტია, არასამთავრობო ორგანიზაცია, ექსპერტები, საზოგადო მოღვაწეები, კულტურის წარმომადგენლები, ჟურნალისტები და რიგითი მოქალაქეები.
ბევრმა მათგანმა გადაიღო ვიდეო რგოლები, დაწერა პოსტები სოციალურ ქსელებში და მოუწოდა ადამიანებს გამოვიდნენ ქუჩაში 20 ივნისს და აჩვენონ „ევროპას, რომ საქართველოში ხალხი ევროპულ გზას ირჩევს“.
იქნება თუ არა აქციაზე პოლიტიკური მოთხოვნები, ჯერჯერობით უცნობია. ბევრი პოლიტიკოსი და ექსპერტი მიიჩნევს, რომ ევროკავშირის მხრიდან დიდი კრიტიკის შემდეგ, აქციის მონაწილეებმა პრემიერის გადადგომა და ვადამდელი საპარლამენტო არჩევნები უნდა მოითხოვონ.
გარდა ამისა, 20 ივნისს, საზოგადოების კრიტიკული ნაწილი საქართველოში ასევე აღნიშნავს ფართომასშტაბიანი ანტისამთავრობო პროტესტის მკაცრი დარბევის მესამე წლისთავს. მაშინ მთავარი მოთხოვნა იყო საარჩევნო სისტემის რეფორმა, რასაც ოპოზიციამ სრულად ვერ მიაღწია დღემდე.
2020 წლის 20 ივნისს, პოლიციამ რუსთაველის გამზირზე, პარლამენტის წინ ათასობით ახალგაზრდას ცრემლსადენი გაზი, წყლის ჭავლი და რეზინის ტყვიები ესროლა. ორმა ადამიანმა თვალი დაკარგა, 200-ზე მეტი დაშავდა.
აქციისთვის მზადება უკვე დაიწყო
რუსთაველის გამზირზე აქციისათვის მზადება უკვე დაიწყო. ახლა პარლამენტის წინ დიდ სცენას ამონტაჟებენ.
უკვე ცნობილია, რომ აქციაზე შეკრებილ მოქალაქეებს სიტყვით მიმართავენ სამოქალაქო საზოგადოების, უკრაინის ხელისუფლებისა და ევროკავშირის წარმომადგენლები.
ამის შემდეგ, 21:00 საათზე, აქციის მონაწილეები მსვლელობით გაემართებიან ევროპის მოედნისკენ, სადაც ღონისძიების დასკვნითი ნაწილი გაიმართება.
„სირცხვილიას” წევრის, გიორგი მჟავანაძის ინფორმაციით, აქციის დასასრულს სამოქალაქო საზოგადოება ახალ ინიციატივას დააანონსებს და საზოგადოების ყველა ჯგუფს გაერთიანებისაკენ მოუწოდებს.
უკვე ცნობილია, რომ დღევანდელ აქციას საქართველოს რამდენიმე უნივერსიტეტის სტუდენტებიც უერთდებიან. გარდა ამისა, თბილისის გარდა, აქცია გაიმართება საქართველოს სხვა ქალაქებშიც – 18:00 საათზე ზუგდიდში, 19:00 საათზე ბათუმში და 15:00 საათზე ქუთაისში.
ამასთან, მსგავსი შეკრებები დაგეგმილია ევროპის ქალაქებშიც – ლონდონში, პრაღაში, ჰანოვერში, პარიზში, ბუდაპეშტში, ბერლინში, ჰამბურგში, შტუტგარტში, რეიკიავიკში, ათენსა და ბრიუსელში.
