შაბათს, 6 ნოემბერს, რუსთავის ციხესთან ფართომასშტაბიანი აქცია დაანონსდა

ხვალ, 6 ნოემბერს, რუსთავის მე-12 ციხესთან, სადაც საქართველოს მესამე პრეზიდენტი მიხეილ სააკაშვილი უკვე 35-ე დღეა შიმშილობს, ფართომასშტაბიანი აქცია დაანონსდა.

როგორც პარტია “ნაციონალური მოძრაობის” თავმჯდომარემ, ნიკა მელიამ სპეციალურ ბრიფინგზე განაცხადა, ეს აქცია იქნება პერმანენტული და მზარდი.

“ერთადერთი ვინც ანთხევს ბოღმას და ზიზღს ეს არის ხელისუფლება, არაკაცების ხელისუფლება, დიახ არაკაცებისაა ხელისუფლება, როდესაც ისინი 35 დღის განმავლობაში 35 დღის მოშიმშილე ქვეყნის მესამე პრეზიდენტს დასცინიან. არაკაცობაა, როდესაც შენ შეგიძლია შეჯიბრი გამართო ხელისუფლებაში ვინ უფრო მწვავედ გააკრიტიკებს და დასცინებს ქვეყნის მესამე პრეზიდენტს. ბიძინა ივანიშვილით დაწყებული, მის ქვემოთ ღარიბაშვილი, კობახიძე კალაძე და სხვები არიან ჩვეულებრივი მკვლელები, რომლებიც ხელებს იფშვნეტენ, როდის მოკვდება და მოკლავენ მიხეილ სააკაშვილს”, – თქვა ნიკა მელიამ.

მისივე განმარტებით, დრო და დრო აქციას შემოუერთდება ყველა პატრიოტი თანამოქალაქე ყველა ქალაქიდან:

“ყველა რეგიონიდან და ყველა სოფლიდან. იქ ვიდგებით მანამ, სანამ მიხეილ სააკაშვილს არ გადაიყვანენ სამოქალაქო სამედიცინო დაწესებულებაში. დამატებით გეგმის კომპონენტებზე დამატებით გაცნობებთ, ვინაიდან წინასწარ არ გვაქვს სურვილი ბიძინა ივანიშვილის დამნაშავე ხელისუფლებას ცხოვრება გავუადვილოთ. ხვალ 5 საათზე ვიკრიბებით რუსთავში და არ ვიშლებით. ეს ყველაფერი [მიხეილ სააკაშვილის სამოქალაქო საავადმყოფოში გადაყვანა] უნდა გაკეთდეს, მანამ სანამ მიხეილ სააკაშვილი კოლაფსში ჩავარდება.” 

6 ნოემბერს თბილისში, თავისუფლების მოედანსა და რუსთაველის გამზირზე აქცია ოპოზიციის ლიდერებმა 31 ოქტომბერს, პარლამენტთან გამართულ აქციაზე დააანონსეს, თუმცა ექსპრეზიდენტის ჯანმრთელობის მდგომარეობის გაუარესების გამო, გეგმები შეიცვალა.

ექსპრეზიდენტის ადვოკატის და “მთავარი არხის” დირექტორის, ნიკა გვარამიას თქმით, მიხეილ სააკაშვილის მდგომარეობა მძიმეა, მას სიარული უჭირს და შესაძლოა, კოლაფსი დაემართოს.

“მივმართავ კვლავ ბიძინა ივანიშვილს, ვითარება არის უკიდურესად მძიმე, მოსალოდნელი არის კოლაფსი, როგორც თვითონ მითხრა სააკაშვილმა ძალიან ცოტა დრო დარჩა აქამდე, მისი შეგრძნებით, არც მე ვარ ექიმი და არც ის, მე ვამბობ, რასაც ვხედავ და რასაც მეუბნება პატიმარი, როგორ გრძნობს თავს მაგასთან დაკავშირებით. ის არ გრძნობს თავს კარგად და ელოდება კოლაფსს, კოლაფსის შემდეგ რა მოხდება არავინ იცის, ეს არის ლატარია – 50/50-ზე და რეალურად ეს ნიშნავს სიკვდილისთვის გაწირვას, თუ ხელისუფლება და ბიძინა ივანიშვილი იმას ელოდება, როდის ექნება მას კოლაფსი და როდის გადაიყვანენ საავადმყოფოში. ეს უნდა მოხდეს მანამდე და ეს კაცი უნდა იყოს გადარჩენილი მანამდე, კოლაფსის შემდეგ არავინ იცის, როგორ შემოტრიალდება ვითარება და კიდევ ერთხელ ვამბობ, რომ ფიზიოლოგიური გადარჩენა არ არის მხოლოდ ჩვენი ამოცანა, ჩვენი ამოცანაა მისი ფსიქიკისა და აზროვნების უნარის გადარჩენა”, – ამბობს გვარამია.

დღესვე მიმართვა გაავრცელა თავად მიხეილ სააკაშვილმაც და საზოგადოებას ხვალ აქციაზე მისვლისკენ მოუწოდა.  ექსპრეზიდენტის თქმით,  მნიშვნელოვანია საპროტესტო აქციები ბევრ ადგილას გაიმართოს. ასევე, სააკაშვილი ამბობს, რომ ის მხარს უჭერს ოპოზიციურ კოალიციას, რადგან საზოგადოება დღეს ბევრად უფრო მზადაა ძირეული ცვლილებებისთვის, ვიდრე ვარდების რევოლუციის წინ.

● თითქმის ერთი თვეა სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?
● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი

მიხეილ სააკაშვილი თბილისში 1 ოქტომბერს დააკავეს, მას შემდეგ, რაც იგი ფარულად დაბრუნდა სამშობლოში.

მესამე პრეზიდენტის წინააღმდეგ საქართველოში რამდენიმე სისხლის სამართლის საქმეა აღძრული. ორ საქმეზე იგი მსჯავრდებულია, ორ საქმეზე კი ბრალდებული.

ძებნილის სტატუსის მქონე ექს-პრეზიდენტი დაკავებისთანავე რუსთავის N12 საპყრობილეში გადაიყვანეს. იმავე საღამოს მან შიმშილობა დაიწყო.

ადვოკატები ითხოვენ, რომ მოშიმშილე პრეზიდენტი, რომლის ჯანმრთელობის მდგომარეობა დამძიმებულია, სამოქალაქო კლინიკაში გადაიყვანონ. სასჯელაღსრულების სამინისტროში კი აცხადებენ, რომ საჭიროების შემთხვევაში ექს-პრეზიდენტს ციხის საავადმყოფოში გადაიყვანენ.

საქართველოს სახალხო დამცველის დასკვნით, ციხის საავადმყოფოში არც მკურნალობისთვის საჭირო აღჭურვილობა არსებობს და არც უსაფრთხო გარემო ყოფილი პრეზიდენტისთვის, რომელსაც ბევრი მტერი ჰყავს დანაშაულებრივი სამყაროს წარმომადგენლებს შორის.

ციხის საავადმყოფოში გადასვლას არც თავად სააკაშვილი თანხმდება. ამ დრომდე, იგი კატეგორიულ უარს ამბობს შიმშილობის შეწყვეტაზეც.