საქართველოში შიდა ფრენები განახლდა

ხუთთვიანი პაუზის შემდეგ დღეიდან, 24 ივლისიდან საქართველოში კორონავირუსის გავრცელების საფრთხის გამო შეჩერებული შიდა ფრენები განახლდა.

დღეიდან რეგულარული რეისები შესრულდება ნატახტარიდან მესტიისა და ამბროლაურის, ხოლო თბილისიდან ბათუმის მიმართულებით.

24-დან 31 ივლისამდე პერიოდში მესტია-ნატახტარის მიმართულებაზე ჯამურად ექვსი რეისი, თბილისი-ბათუმის მიმართულებაზე ხუთი რეისი, ხოლო ამბროლაური-ნატახტარის მიმართულებაზე სამი რეისი შესრულდება.

„შიდა ტურიზმის სტიმულირების მიზნით, შიდა ფრენების დაწყება მნიშვნელოვანია. ამას ელოდება როგორც ჩვენი ქვეყნის მთიანი რეგიონის მოსახლეობა, ისე ადგილობრივი ვიზიტორებიც. მოლოდინი რომ დიდია, ეს ბილეთების გაყიდვაზეც აისახა. ამ დროისთვის არსებული ინფორმაციით, 300-ზე მეტი ბილეთია სხვადასხვა მიმართულებით უკვე გაყიდული“, – აცხადებს აეროპორტების გაერთიანების ხელმძღვანელი, თამარ არჩუაძე.

არჩუაძის თქმით,  ნატახტარის, ამბროლაურისა და მესტიის აეროპორტებში დაცულია უსაფრთხოების ყველა ნორმა. აეროპორტებიში მოწყობილია  დეზობარიერები, მგზავრებს კი თერმოსკრინინგი უტარდებათ. 

აგვისტოდან ნატახტარი-მესტიის რეისი კვირაში ხუთჯერ შესრულდება, ნატახტარი – ამბროლაურის – კვირაში სამჯერ, ხოლო თბილისი-ბათუმის – კვირაში ოთხჯერ.