საქართველოში შეიქმნა პორტალი, რომელიც ოჯახის ექიმის მოძიებაში დაგვეხმარება

http://ambulatoria.moh.gov.ge/ – იმ პორტალის მისამართია, რომელიც საქართველოს მოქალაქეებს ოჯახის ექიმის მოძიებაში დაეხმარება.

ჯანდაცვის მინისტრის, ეკატერინე ტიკარაძის განმარტებით, თუ მოქალაქისთვის არ არის ცნობილი, რომელ პოლიკლინიკურ ერთეულსა და ოჯახის ექიმზე არის მიბმული, ეს პორტალი ამის გარკვევაში დაეხმარება.

„ამ პორტალის საშუალებით, ყველა ჩვენს მოქალაქეს, პირადი ნომრის მითითებით, მიეცემა ინფორმაცია, თუ რომელ პირველადი ჯანდაცვის ცენტრზე არიან მიმაგრებულები და ასევე, ოჯახის ექიმის სახელი და გვარი; აქვე მითითებული იქნება პირველადი ჯანდაცვის ცენტრის ტელეფონის ნომერი და მათ შეეძლებათ, გაიარონ კონსულტაცია საკუთარ ოჯახის ექიმთან“, – განაცხადა ჯანდაცვის მინისტრმა.

მისივე თქმით, ეს პორტალი განტვირთავს 112-ში შემავალ ზარებს და საგრძნობლად შეუმცირდება ლოდინის დრო მათ, ვისაც გადაუდებელი სასწრაფო დახმარება სჭირდება.

ტიკარაძემ ექიმების გაზრდილი ხელფასების შესახებაც ისაუბრა და განაცხადა, რომ ამოქმედდა დადგენილება, რომლის თანახმადაც, კლინიკებს კოვიდის მართვაში ჩართული მედპერსონალისთვის გაზრდილი ხელფასის ანაზღაურების ვალდებულება აქვთ.

თუ მოქალაქე სარგებლობს საყოველთაო ჯანდაცვის პროგრამით, უნდა მიმართოს ოჯახის ექიმს ან იმ სამედიცინო დაწესებულებას, სადაც რეგისტრირებულია.

თუ მოქალაქე სარგებლობს კერძო დაზღვევით, უნდა დაუკავშირდეს სადაზღვევო კომპანიის ოჯახის ექიმს.

● საქართველოში პირველად დაფიქსირდა კორონავირუსის 3 ათას შემთხვევაზე მეტი ერთ დღეში

დღევანდელ ბრიფინგზე განცხადება გააკეთა დაავადებათა კონტროლის ეროვნული ცენტრის ხელმძღვანელმა ამირან გამყრელიძემაც. მისი თქმით, ვირუსის შიდა გავრცელება სერიოზულია და ინფექციის დაწყებიდან დაახლოებით 4 000 სამედიცინო პერსონალია ინფიცირებული.

გამყრელიძემ ხაზი გაუსვა იმას, რომ უახლოეს მომავალში მოსალოდნელია სერიოზული შემზღუდავი ღონისძიებები, თუმცა სრულმასშტაბიანი ლოქდაუნი არ იგეგმება.

“ქვეყანაში მთელი რიგი შეზღუდვები კიდევ უფრო გამკაცრდება. თუ რაზეა საუბარი ამაზე წინასწარ ვერ გეტყვით. მე ჩემს რეკომენდაციებს საკოორდინაციო საბჭოს სხდომაზე ვაჟღერებ, იმიტომ, რომ საბჭო გადაწყვეტილებას შეთანხმებით იღებს.

ის, რაც განახორციელა ჩინეთმა უხანში სამი თვის განმავლობაში, ასეთი სრული ჩაკეტვა არ განიხილება. განიხილება სერიოზული შემზღუდავი ღონისძიებები, რომელთა ნაწილი დაწესებულია და ნაწილი კიდევ უფრო გამკაცრდება. თუმცა, მარტო გამკაცრება მნიშვნელოვანი არ არის, მნიშვნელოვანია ამ დაწესებული შეზღუდვების აღსრულება”, – განაცხადა გამყრელიძემ.

● კორონავირუსის საწინააღმდეგო პირველი ნამდვილი ვაქცინა?

● გიორგი გახარია: ქუჩაში პოლიტიკური აქტივობა დააჩქარებს ჩვენთან პიკის მოსვლას

გამოვლენის მაჩვენებელზე საუბრისას ამირან გამყრელიძემ განაცხადა, რომ შესაძლოა, კოვიდინფიცირებულთა დღიური მაჩვენებელი რეგისტრირებულზე ორჯერ მეტი იყოს.

მისი თქმით, შეფასებითი მაჩვენებლის მიხედვით, საქართველოში დღეს შეიძლება, დღიურად კოვიდით ინფიცირების ახალი შემთხვევების რაოდენობა 5000-დან 6000-მდე მერყეობდეს.

“გავრცელების ე.წ. შეფასებითი მაჩვენებელი სხვადასხვა მიდგომით და ფორმულით ითვლება და საქართველოს შემთხვევაში, საერთაშორისო ორგანიზაციების შეფასებით, შესაძლოა, დღიური შემთხვევების რაოდენობა რეგისტრირებულს მაქსიმუმ ორჯერ აღემატებოდეს”, – განმარტა ამირან გამყრელიძემ.