საქართველოში პირველი ღრმაწყლოვანი პორტის მშენებლობა დაიწყო. ფოტორეპორტაჟი
ანაკლიაში (დასავლეთ საქართველო) ღრმაწყლოვანი პორტის საზღვაო სამუშაოები დაიწყო.
სახმელეთო სამუშაოები აქ 2017 წლიდან მიმდინარეობს, თუმცა ახლა მშენებლობა უკვე ზღვას მიადგა.
პორტი მნიშვნელოვანი ინფრასტრუქტურული პროექტია საქართველოსთვის, რადგან იგი გზას გაუხსნის ცენტრალური აზიის ტვირთებს ევროპისკენ და პირიქით. პირველ ქართულ ღრმაწყლოვან პორტს, რომელიც ანაკლიაში შენდება, პრეტენზია აქვს, რომ თურქეთისა და რეგიონის სხვა ქვეყნების პორტების სერიოზული კონკურენტი გახდეს.
ეკონომიკის მინისტრის გიორგი ქობულიას განცხადებით, ანაკლიის პროექტი საქართველოს ეკონომიკური ზრდის ორ ძალიან მნიშვნელოვან გამოწვევას უპასუხებს. ეს გამოწვევებია: პირველი -საქართველოს გეოგრაფიული მდებარეობის გამოყენება და ქვეყნის ლოგისტიკურ ჰაბად გარდაქმნა და მეორე – საქართველოს საზღვაო ქვეყნად ჩამოყალიბება.
ანაკლიის სანაპირო, ის ადგილი სადაც პორტი უნდა აშენდეს, უკვე სავსეა მძიმე ტექნიკით. ცოტა ხანში აქ საქართველოსთვის უპრეცედენტო სამუშაოები დაიწყება:
ანაკლიის ნაპირებს უკვე მოადგა მსოფლიოში ერთ-ერთი უდიდესი დამაღრმავებელი გემი „ათენა“, რომელიც საზღვაო სამუშაოების მთავარი შემსრულებელი იქნება.
„ათენამ” ანაკლიის ნაპირი უნდა გააღრმავოს, ამისთვის კი, ზღვიდან 5 მლნ კუბურ მეტრამდე ქვიშა უნდა ამოიღოს.
ზღვიდან ამოღებულ ქვიშას 10 კმ სიგრძის დამბა და 2,5 სიგრძის სამელიორაციო არხი დააკავებს.
წყალზე უკვე ტივტივებს უზარმაზარი, 2,5 კილომეტრი სიგრძის გიგანტური მილები, დამონტაჟებულია ვერტიკალური დრენაჟები.
ზღვიდან ამოღებულ ქვიშას ნაპირზე დაყრიან, ამისთვის უკვე გასუფთავებულია 110 ჰა ფართობის ტერიტორია.
“ეს არის ურპეცედენტო მასშტაბის პროექტი რეგიონში, რომელშიც სხვადასხვა ქვეყნის ინვესტორები მონაწილეობენ. წლების განმავლობაში, ქართველო და უცხოელი ეკონომისტების დათვლით, ანაკლიის პროექტის მთლიანად განვითარებამ ქვეყანაში 60 მილიარდის კონტრიბუცია უნდა შექმნას“, – ამბობს „ანაკლიის განვითარების კონსორციუმის“ დამფუძნებელი, მამუკა ხაზარაძე.
ანაკლიაში ღრმაწყლოვანი პორტის საზღვაო სამშენებლო სამუშაოების დაწყების ოფიციალურ ღონისძიებაზე ეკონიმიკის მინისტრმა განაცხადა, რომ “ანაკლიის პროექტი საქართველოს კონკურენტუნარიანობას მნიშვნელოვნად გაზრდის”.
___________________
პროექტს, რომელშიც უახლოეს ორ წელიწადში 600 მილიონი აშშ დოლარი ჩაიდება და 1500 ადამიანი დასაქმდება, საერთაშორისო ტენდერში გამარჯვებული საზღვაო-ინფრასტრუქტურული კომპანია Van Oord-ი ატარებს. Van Oord-ი ჰოლანდიური კომპანიაა. მის პროექტებს შორისაა დუბაის „პალმების კუნძული“, როტერდამის პორტის გაფართოება, სუეცის მეორე არხის აშენება.
მშენებლობის პირველი ფაზა 2020 წელს დასრულდება. სწორედ 2020 წელს მიიღებს ანაკლია პირველ გემებსაც – ანაკლიის პორტის პირველი ფაზის დასრულების შემდეგ საქართველო მიიღებს 10,000-კონტეინერიან (TEU) პანამაქსის და პოსტპანამაქსის ტიპის გემებს, რომელთა მიღებასაც დღეს საქართველოს ვერც ერთი პორტი – ვერც ბათუმი და ვერც ფოთი ვერ ახერხებს.
გეგმის მიხედვით, 2021 წლისთვის ანაკლიის პორტი 1 მილიონამდე TEU კონტეინერის და 1.5 მილიონი ტონა მშრალი ნაყარი ტვირთის გატარებას შეძლებს.
ანაკლიის ღრმაწყლოვანი პორტის მშენებლობა სულ 9 ფაზად არის დაგეგმილი. პროექტის ჯამური ღირებულება 2.5 მილიარდ აშშ დოლარს შეადგენს და საზღვაო აკვატორიის 16 მეტრამდე დაღრმავებას ითვალისწინებს.
