რა ვქნა თუ გამოცდის დღეს სიცხე მაქვს? საქართველოში ეროვნული გამოცდები დაიწყო - დეტალური გზამკვლევი
საქართველოს 25 საგამოცდო ცენტრში, 1 ივლისს, ერთიანი ეროვნული გამოცდები დაიწყო. თვის ბოლომდე გამოცდებს ჩააბარებენ: აბიტურიენტები, მაგისტრანტები, სტუდენტები, რომლებსაც საგრანტო ქულის გაუმჯობესება სურთ, მასწავლებლები და პროფესიული განათლების მიღების მსურველები.
![](https://jam-news.net/app/uploads/2021/07/206931548_4060330494014993_1149830283348060024_n-1024x683.jpg)
სულ, წელს, გამოცდებისთვის 38 400 აბიტურიენტი, 12 800-ზე მეტი მაგისტრანტი და 28 700-ზე მეტი მასწავლებელია დარეგისტრირებული.
ასევე, წელს გრანტის გასაუმჯობესებლად თავიდან აბარებს გამოცდას 3700 სტუდენტიც.
ჯამში, საგამოცდო პროცესებისთვის დარეგისტრირებულთა რაოდენობა აღემატება 83 600 ადამიანს.
როგორ იცავენ უსაფრთხოებას საგამოცდო ცენტრებში; რა უნდა ქნათ, თუ თუ გამოცდამდე, ან გამოცდის დღეს სიცხე გექნებათ, ან კოვიდი დაგიდასტურდებათ?
დეტალური გზამკვლევი პანდემიის დროს გამოცდებში მონაწილეებისთვის:
უსაფრთხოების რა წესები მოქმედებს გამოცდებზე
ბოლო ორი წელია, კოვიდ პანდემიის გამო, აბიტურიენტებსაც და გამოცდების ჩაბარების სხვა მსურველებსაც გარკვეული წესების დაცვა უწევთ.
კერძოდ:
- საგამოცდო ცენტრის შესასვლელში ყველამ უნდა დააბიჯოს ფეხი დეზობარიერს;
- ყველას გაუზომავენ სიცხეს;
- საგამოცდო ცენტრებში დაცულია დისტანცია – ოთახში 10 მაგიდაზე მეტი არ დგას. მაგიდებს შორის დაშორება ორი მეტრია, ხოლო ერთმანეთის მიმდევრობით განლაგებულ მაგიდებს შორის მანძილი ერთი მეტრი.
- ყველა საგამოცდო მაგიდას წინა მხრიდან აქვს გამჭვირვალე დამცავი ფარი.
- გამოცდების დაწყებამდეც და შუალედებშიც, საგამოცდო ლეპტოპები სპეციალური ხსნარებით იწმინდება.
- თუ საგამოცდო ცენტრში, სადაც ფანჯრები მუდმივად ღიაა, ჰაერის ტემპერატურა 30 გრადუსს მიაღწევს, ნებადართულია კონდიციონერის ჩართვა.
- გასული წლისგან განსხვავებით, წელს გამოცდაში მონაწილე პირებს, პირბადე უნდა ეკეთოთ მთელი საგამოცდო პროცესის განმავლობაში. გასულ წელს, პირბადის გაკეთება სავალდებულო იყო იქამდე, ვიდრე პირი საგამოცდო მაგიდასთან მივიდოდა.
რა ხდება მაშინ, თუ სიცხე გაქვთ?
გამოცდების ეროვნული ცენტრის ინფორმაციით, სიცხიანები გამოცდებს არ გამოეთიშებიან.
საგამოცდო ცენტრებში არსებობს საერთო საგამოცდო სივრცეები და სპეციალური, სარეზერვო სივრცეები, სადაც უსაფრთხოების უფრო მკაცრი ზომებია დაცული – სამმაგი ფარები მაგიდებთან და ორ მეტრზე მეტი დისტანცია.
ასევე, წელს ყველა საგამოცდო ცენტრში იქნება ექიმი, რომელიც გადაწყვეტს, სიცხიანმა პირებმა რომელ სივრცეში უნდა ჩააბარონ გამოცდა.
„თუ პირი, რომელსაც აქვს ტემპერატურა, მაგრამ კოვიდი არ არის დადასტურებული, მოვიდა საგამოცდო ცენტრამდე, მას ცენტრში ვუშვებთ. ის გამოცდას ჩააბარებს. მნიშვნელობა აქვს სხვა რა სიმპტომი ექნება მას. აქ უკვე ერთვება ექიმი“, – გვითხრეს გამოცდების ეროვნული ცენტრის პრესსამსახურში.
უფრო დეტალურად, როგორ აბარებს გამოცდას სიცხიანი გამოსაცდელი:
თუ გამოცდამდე გაქვთ სიცხეები, გამოცდაზე დაგიშვებენ თუ:
- გექნებათ PCR ტესტის უარყოფითი პასუხი და წარადგენთ ცნობას, რომ არ გაქვთ კოვიდი;
- ან, წარადგენთ ცნობას (ფორმა №100), რომ გაქვთ ქრონიკული სიცხეები. ასეთ ცნობას გასცემს ოჯახის ექიმი, ან, დაავადების არსებობის შემთხვევაში, შესაბამისი ექიმი-სპეციალისტი.
თუ გამოცდის დღეს დაგიფიქსირდათ სიცხე, გამოცდებს მაინც ჩაგაბარებინებენ, მაგრამ, ექიმი გადაწყვეტს, რომელ ოთახში ჩააბაროთ გამოცდა:
- თუ თერმოსკრინინგის აპარატმა აჩვენა სიცხე 37 გრადუსი, ან 37 გრადუსზე მეტი, 15 წუთში ტემპერატურას ვერცხლისწყლის თერმომეტრით გადაგიმოწმებენ.
- თუ გადამოწმების შემდეგ, სიცხე იქნება 37.5-მდე (მაგალითად, 37.4), მაგრამ თან გექნებათ გამოცდამდე არაუმეტეს 72 საათით ადრე ჩატარებული PCR ტესტის უარყოფითი პასუხი, გამოცდას ჩააბარებთ, საერთო საგამოცდო ოთახში.
- თუ PCR-ის პასუხი არ გექნებათ, მაგრამ, არც სხვა რაიმე რესპირატორული სიმპტომი (ხველა, ცემინება, სურდო, ქოშინი), ექიმის გადაწყვეტილებით, თქვენ მოგცემენ საშუალებას გამოცდა ჩააბაროთ საერთო საგამოცდო ოთახში.
- თუ სიცხესთან ერთად, სხვა სიმპტომებიც გექნებათ, გამოცდის ჩასაბარებლად სარეზერვო ოთახში გადაგიყვანენ.
- თუ სიცხე 37.5 გრადუსზე მეტია და გაქვთ უარყოფითი PCR, გამოცდაზე დაგსვამენ სამმხრივი ფარით აღჭურვილ მაგიდასთან;
- თუ სიცხე მაღალია, მაგრამ არც სხვა სიმპტომები გაქვთ და თქვენი PCR-ც უარყოფითია, გამოცდას სხვებთან ერთად ჩააბარებთ საერთო საგამოცდო ოთახში.
- თუ მაღალ სიცხესთან ერთად, ხველას, ქოშინს ან სურდოსაც უჩივით, მაშინ თქვენ აუცილებლად გადაგიყვანენ სარეზერვო საგამოცდო ოთახში.
- გამოცდების ეროვნულ ცენტრში ამბობენ, რომ ყველა შემთხვევაში, ექიმი მიაქცევს ყურადღებას სიცხის გარდა სხვა სიმპტომებს და ისე მიიღებს გადაწყვეტილებას.
- რაც მთავარია, სიცხიანი ადამიანები, რომელთაც არ აქვთ კოვიდი, გამოცდას არ გამოეთიშებიან.
თუ კოვიდ ინფექცია გაქვთ
გამოცდების ეროვნული ცენტრის ინფორმაციით, თუ პირს გამოცდამდე (მაგალითად, პირველ გამოცდამდე) დაუდასტურდა კოვიდ ინფექცია, მან ამის შესახებ უნდა აცნობოს გამოცდების ეროვნულ ცენტრს, ნომერზე: 0322 47 33 33.
ცენტრი ამ ინფორმაციას გადაამოწმებს დაავადებათა კონტროლის ეროვნულ ცენტრში და ამ პირს მიეცემა საშუალება, გამოცდა ინფიცირებიდან 14 დღის გასვლის შემდეგ ჩააბაროს, ცალკე, დამატებით სესიაზე.
თუ მაგალითად, პირმა გამოტოვა პირველი გამოცდა, მაგრამ, მეორე გამოცდის დროს უკვე გამოჯანმრთელებულია, ის ჩვეულებრივად გააგრძელებს გამოცდების ჩაბარებას და გამოტოვებულ გამოცდას მისთვის დანიშნულ დამატებით სესიაზე ჩააბარებს.
ასეთი პირი საქართველოს მასშტაბით ერთიც რომ იყოს, მისთვის გამოცდა მაინც დაინიშნება.
ეს პრინციპი მოქმედებს ყველა გამოცდის წინ. მთავარია, პირმა, რომელსაც უკვე აქვს დადებითი პასუხი, დროულად აცნობოს ცხელ ხაზზე გამოცდების ეროვნულ ცენტრს.
და ეს პრინციპი მოქმედებს ყველასთვის, იქნება ეს აბიტურიენტი თუ მასწავლებლობის მსურველი.
„წელს გვაქვს რეკომენდაცია, რომ კოვიდ ინფექციის გამო, საგამოცდო პროცესს არცერთი პირი არ უნდა გამოეთიშოს“, – უთხრეს ჯემნიუსს გამოცდების ეროვნულ ცენტრში.
ეროვნული გამოცდები – განრიგი
2021 წლის საგამოცდო პერიოდი 1 ივლისს დაიწყო და 30 ივლისს დასრულდება.
საქართველოს მასშტაბით გახსნილია 25 საგამოცდო ცენტრი, შემდეგ ქალაქებში: თბილისში, რუსთავში, გორში, ახალციხეში, თელავში, ოზურგეთში, ქუთაისში, ბათუმში, ხულოში, ფოთსა და ზუგდიდში.
ეროვნული გამოცდები აბიტურიენტებისთვის, ქართული ენისა და ლიტერატურის გამოცდით დაიწყო. გამოცდების უმეტესობა დღეში ორ სესიად ტარდება. პირველ დღეს, კოვიდის გამო, გამოცდა უკვე გამოტოვა 20-მდე აბიტურიენტმა.
14 ივლისიდან გამოცდებში მასწავლებლები და მასწავლებლობის მსურველი პირები ჩაერთვებიან.
28 ივლისს სტუდენტთა საგრანტო კონკურსი ჩატარდება, ხოლო საერთო სამაგისტრო გამოცდას მაგისტრანტობის კანდიდატები 27-30 ივლისს ჩააბარებენ.
წელს პირველად ტარდება გამოცდა სპეციალური მასწავლებლებისა და უფროსი სპეციალური მასწავლებლებისთვის.