საქართველოში ეპიდვითარება საგანგაშოა. გაბუნიას თქმით, სიკვდილიანობის კლება მოსალოდნელი ვერ იქნება

ჯანდაცვის მინისტრის მოადგილის, თამარ გაბუნიას თქმით, კორონავირუსით სიკვდილიანობის კლება საქართველოში მოსალოდნელი არ არის. ქვეყანაში იზრდება კორონავირუსით გარდაცვლილი ორსულების რაოდენობაც. ასევე, მძიმეა მდგომარეობა ციხეებშიც

“როდესაც ჩვენ ორი კვირის წინ გვქონდა შემთხვევების მაღალი რაოდენობა, ეს, რა თქმა უნდა, არის უკვე ის შემთხვევები, რომლებიც დაყოვნებულია, მძიმეა, იმყოფება ხანგრძლივ ჰოსპიტალურ მკურნალობაზე. საუბედუროდ, ასეთ შემთხვევებში გამოსავალი ხშირად არის არაკეთილსაიმედო”, – აცხადებს მინისტრის მოადგილე.

კიდევ ერთი ორსული ქალი საკეისრო კვეთის შემდეგ დღეს დილით გარდაიცვალა. როცა მისი მდგომარეობა დამძიმდა, იგი ბათუმიდან ქუთაისში, კლინიკა “ბომონდში” გადაიყვანეს. გამოცემა “ბათუმელების” ცნობით, ახალშობილი თავს კარგად გრძნობს. 

ეს უკვე ორსულის გარდაცვალების მეთერთმეტე შემთხვევაა.

დღეს საქართველოში მორიგი ანტირეკორდი დაფიქსირდა. გასული დღე-ღამის განმავლობაში კორონავირუსით კიდევ 79 ადამიანი გარდაიცვალა, დადასტურდა 4 128 ახალი შემთხვევა.

26 აგვისტოს მონაცემებით, ვირუსს გავრცელებიდან დღემდე 7 028 ადამიანი ემსხვერპლა.

დღესვე სპეციალური ბრიფინგი გამართა ყველაზე დიდმა ოპოზიციურმა პარტია “ერთიანმა ნაციონალურმა მოძრაობამ.”

პარტიის ერთ-ერთმა ლიდერმა, ხატია დეკანოიძემ განაცხადა, რომ “ნაციონალური მოძრაობა” გამოდის შემდეგი ინიციატივით:

• აუცილებელია, გაუქმდეს სრულად ვაქცინირებული ოჯახისთვის კომუნალური გადასახადები სამი თვით და ამით წავახალისოთ ოჯახები;
• ასევე, სრულად ვაქცინირებული ადამიანებისთვის განახევრდეს ტრანსპორტის ფასი;
• აუცილებელია, სოციალურად დაუცველებს, ვინც სრულად არიან ვაქცინირებული, დამატებით მიეცეთ ერთი თვის დახმარება და ამითაც დავეხმაროთ ჩვენს თანამოქალაქეებს, რომ კიდევ უფრო გაფართოვეს მათი რიცხვი, ვინც უმძიმესი დელტა შტამისგან დაცულები იქნებიან;
• სრულად ვაქცინირებულ პენსიონერებს უნდა მიეცეთ დამატებით ნახევარი თვის პენსია, რაც, ასევე არის მნიშვნელოვანია, რომ ეს ადამიანები, ვინც ყველაზე დიდი რისკის ჯგუფია, ჩაერთონ ვაქცინაციაში, მივიდნენ მათთან ბრიგადები და დაიწყოს მასიური ვაქცინაცია;
• გარდა ამისა, ყველა ადამიანს, ვინც სრულად არის ვაქცინირებული, თვითდასაქმებული, აუცილებლად უნდა გაუნახევრდეს წლიური საშემოსავლო გადასახადი.

მანვე მოუწოდა ხელისუფლებას, დაუყოვნებლივ შემოიტანონ დამატებითი ვაქცინები “ბუსტერ” დოზებისთვის. 

ციხეებში არსებულ მძიმე ეპიდემიოლოგიურ მდგომარეობაზე საუბრობენ პატიმრების ახლობლებიც. მათი თქმით, კორონავირუსი მინიმუმ ოთხ საპატიმრო დაწესებულებაში გავრცელდა. 

“ჩემმა მეუღლემ დამირეკა ორი დღის წინ, ძალიან ცუდად ვარ, სუნთქვა მიჭირსო. შეიძლება ისევ საავადმყოფოში გადამიყვანონო, გეგუთშიც დაფიქსირდა, მაგრამ არ იძახიან. ძალიან ვნერვიულობთ, ქსანშიც დაფიქსირდა, მაგრამ ყველა უარყოფს. ტელეფონში რომ თქვან, სჯიან ან პაემნის უფლებას არ აძლევენ, ან ტელეფონზე დარეკვის”, – ამბობს ერთ-ერთი პატიმრის ცოლი ტელეკომპანია “ფორმულასთან” საუბრისას.

საუბარია გლდანის მიმღებ N8 დაწესებულებაზე, ქუთაისის მიმღებ N2 დაწესებულებაზე, ქსნის მე-15 დაწესებულებასა და გეგუთის ციხეზე.

_____________________________________________

● საქართველოს კლინიკების ასოციაცია: ლეტალობის ასეთი მაჩვენებელი კატასტროფულია
● Covid-19-ის მეოთხე ტალღა – რა ხდება საქართველოში. ბოლო მონაცემები
● საქართველოში საველე ჰოსპიტლებმა დაიწყო მუშაობა

________________________________________________

ეპიდვითარების გაუარესების გამო, 2 ოქტომბერს დაგეგმილი თვითმმართველობის არჩევნების გადადების მოთხოვნით გამოვიდა საქართველოს სახალხო დამცველი ნინო ლომჯარია.

ბოლო თვეებია საქართველოში ყოველდღიურად კორონავირუსით 6000-მდე ინფიცირების და 50-ზე მეტი გარდაცვალების შემთხვევაა.

18 აგვისტოს ბრიფინგზე ჯანდაცვის მინისტრის მოადგილემ, თამარ გაბუნიამ თქვა, რომ ინფიცირების ტემპი ისევ მაღალია და სტაბილიზაციის ნიშნები არცერთ რეგიონში არ არის.

დაავადებათა კონტროლის ცენტრი ამბობს, რომ თუ  დადებითობის მაჩვენებელი 4 პროცენტზე დაბლა არ იქნება,  სწავლის დაწყების რეკომენდაციას ვერ გასცემენ.

ბოლო ერთი კვირაა, ეს მაჩვენებელი 10-12 პროცენტია,