საქართველოს პრემიერმინისტრი: [რუსული კანონის] მიღების შემდეგ ევროკავშირთან მოლაპარაკებების გახსნის შანსი გაიზარდა
საქართველოს პრემიერმინისტრი რუსულ კანონზე
საქართველოს პრემიერმინისტრის ირაკლი კობახიძის თქმით, ე.წ. გამჭვირვალობის კანონის მიღების შემდეგ საქართველოსთვის ევროკავშირში გაწევრიანების მოლაპარაკებების გახსნის შანსი გაიზარდა.
“რაც შეეხება მოლაპარაკებების გახსნას და შანსებს, კანონის ინიცირებამდე მოლაპარაკებების გახსნის შანსი იყო ნული, ამ ლოგიკური დასკვნის გამოტანის საშუალებას გვაძლევდა ჩვენ ის შეხვედრები, რომლებიც იმართებოდა ევროკავშირის კონკრეტულ წარმომადგენლებთან, დღეს ეს შანსი, კანონის მიღების შემდეგ, გაზრდილია დაახლოებით 20-30%-მდე, ეს არის დღევანდელი მოცემულობა”, – თქვა მან.
ჟურნალისტმა პრემიერ ჰკითხა, რის საფუძველზე ამბობს ამას, როცა დასავლელი პარტნიორები საპირისპიროს აცხადებენ, კობახიძე პასუხობს:
ეს ხომ პოლიტიკაა – ერთია განცხადებები და მეორეა შედეგი. 2023 წელსაც იყო განსხვავებული განცხადებები, მაგრამ მივიღეთ კანდიდატის სტატუსი, იმიტომ, რომ სადაც პრინციპულად დადგები, იქ შედეგსაც მიიღებს
16 ივნისს ცნობილი გახდა, რომ ევროკავშირმა საქართველოს წინააღმდეგ სანქციების დოკუმენტი მოამზადა. პერსონალური სანქციები, ფინანსური დახმარებების შეწყვეტა და უკიდურეს შემთხვევაში უვიზო მიმოსვლის დროებით შეჩერება – “რადიო თავისუფლებამ” მოიპოვა ევროკომისიის დოკუმენტი, რომელშიც საუბარია იმ ნაბიჯებზე, რაც ევროკავშირმა შეიძლება გადადგას, თუ საქართველოში პოლიტიკური ვითარება არ გაუმჯობესდება.
დოკუმენტი მომზადდა ევროკომისიის და ევროპის საგარეო ქმედებათა სამსახურის მიერ ევროკავშირის წევრი ქვეყნების საგარეო საქმეთა მინისტრების 27 მაისს გამართული შეხვედრის შემდეგ, რომელშიც განსაზღვრულია ის ნაბიჯები, რაც ევროკავშირმა საქართველოში განვითარებული პოლიტიკური მოვლენების გამო შეიძლება გადადგას.
