შარლ მიშელი: ევროკომისიამ საქართველოს კანდიდატის სტატუსი მიანიჭა
საქართველომ კანდიდატის სტატუსი მიიღო
ევროპული საბჭოს პრეზიდენტის, შარლ მიშელის განცხადებით ევროკომისიამ საქართველოს კანდიდატის სტატუსი მიანიჭა. ასევე, მიიღო გადაწყვეტილება უკრაინასა და მოლდოვასთან გაწევრიანების მოლაპარაკებების გახსნის შესახებ.
“ევროპულმა საბჭომ გადაწყვიტა, უკრაინასა და მოლდოვასთან გაწევრიანების მოლაპარაკებები გახსნას.
ევროპულმა საბჭომ საქართველოს კანდიდატის სტატუსი მიანიჭა.
ევროკავშირი ბოსნიასა და ჰერცოგოვინასთან მოლაპარაკებებს გახსნის, როცა წევრობის კრიტერიუმების დაკმაყოფილების საკმარისი დონე მიიღწევა და კომისიას მოუწოდა, მარტისთვის მოხსენება გააკეთოს ამ გადაწყვეტილების მიღებასთან დაკავშირებით.
იმედის ნათელი სიგნალი მათი ხალხისთვის და ჩვენი კონტინენტისთვის.” – წერს მიშელი.
The European Council has decided to open accession negotiations with Ukraine & Moldova. #EUCO granted candidate status to Georgia. And the EU will open negotiations with Bosnia and Herzegovina once the necessary degree of compliance with the membership criteria is reached and…
— Charles Michel (@CharlesMichel) December 14, 2023
“ესაა უკრაინის გამარჯვება, ესაა ევროპის გამარჯვება. გამარჯვება, რომელიც მოტივაციას გაძლევს, შთააგონებს და აძლიერებს.” – წერს სოციალურ ქსელ X-ში უკრაინის პრეზიდენტი ვოლოდიმირ ზელენსკი.
გადაწყვეტილებას გამოეხმაურა საქართველოს პრემიერმინისტრი ირაკლი ღარიბაშვილიც:
“გილოცავთ! ევროპულმა საბჭომ მიიღო გადაწყვეტილება საქართველოს მიენიჭოს ევროკავშირის წევრობის კანდიდატის სტატუსი!”
ევროპული საბჭოს გადაწყვეტილებამდე საბჭოს გენერალურმა სამდივნომ გაფართოების შესახებ დასკვნა გამოაქვეყნა. საბჭო საქართველოს მოუწოდებს, აჩვენოს მკაფიო ერთგულება ევროკავშირის ღირებულებების მიმართ, გააგრძელოს პროგრესი რეფორმების დღის წესრიგში და შეასრულოს კომისიის მიერ განსაზღვრული პირობები.
საბჭო მიესალმება, საერთო ჯამში, კარგ საკანონმდებლო ჩარჩოს, ინსტიტუციურ წყობასა და ენერგიულ სამოქალაქო საზოგადოებას, მათ შორის, სადამკვირვებლო ორგანიზაციებს და აცხადებს, რომ ეს ელემენტები საქართველოს დემოკრატიული და კანონის უზენაესობის რეფორმების წინსვლისთვის მყარ საფუძველს აძლევს.
ასევე, ევროკავშირის მინისტრთა საბჭო ხაზს უსვამს, რომ საქართველომ უნდა უზრუნველყოს ფუნდამენტური უფლებების სრული პატივისცემა, მათ შორის, მედიის თავისუფლებისა და პლურალიზმის, აზრის, შეკრების და გამოხატვის თავისუფლებისა და ლგბტ პირების დაცვა დაშინებისგან, ასევე ძალადობისა და დისკრიმინაციისგან.
“საბჭო ხაზს უსვამს ძლიერ მოლოდინს, რომ საქართველო არსებითად გაზრდის შესაბამისობას ევროკავშირის საერთო საგარეო და უსაფრთხოების პოლიტიკის პოზიციებთან და შემზღუდველ ზომებთან, მათ შორის, რუსეთისა და ბელარუსის წინააღმდეგ. ასევე, მოუწოდებს საქართველოს, შემოაბრუნოს უარყოფითი ტენდენცია და განახორციელოს პროგრესი სრული შესაბამისობის მიმართულებით. ეს იქნება ქვეყნის ევროკავშირში გაწევრიანების სტრატეგიული არჩევანის აშკარა ნიშანი”. – წერია დოკუმენტში.
