ევროკავშირის სანქციების ფარგლებში, საქართველოდან რუსეთში და ბელარუსში მანქანების რეექსპორტი აიკრძალა
საქართველოდან მანქანების რეექსპორტი აიკრძალა
ევროკავშირის სანქციების მე-11 პაკეტის ფარგლებში საქართველოდან რუსეთსა და ბელარუსში ავტომობილების რეექსპორტი აიკრძალა. ინფორმაციას შემოსავლების სამსახური ავრცელებს.
რას ნიშნავს რეექსპორტი
რეექსპორტი საშუალებას იძლევა, საქართველოს საბაჟო ტერიტორიაზე შემოტანილი უცხოური საქონელი გატანილ იქნას საქართველოს საბაჟო ტერიტორიიდან სხვა ქვეყანაში.
რეექსპორტის განხორციელებისას საქონელი უნდა დარჩეს უცვლელ მდგომარეობაში, გარდა იმ ცვლილებებისა, რომლებიც გამოწვეულია:
● ბუნებრივი ცვეთით;
● ტრანსპორტირებით;
● შენახვის ნორმალური პირობებისთვის დამახასიათებელი ბუნებრივი დანაკარგებით.
“საქართველოს ტერიტორიაზე ამერიკის შეერთებული შტატებიდან შემოყვანილ მანქანებზე 1-ლი აგვისტოდან ამოქმედდა რეექსპორტზე/ექსპორტზე შეზღუდვა, ხოლო ევროპიდან შემოყვანილზე შეზღუდვა ამოქმედდება 26 სექტემბრიდან, როგორც ამას ითვალისწინებს დაწესებული სანქციების მე-11 პაკეტი”, – აცხადებს შემოსავლების სამსახური.
ამასთან, 23 ივნისს დამტკიცებული სანქციების პაკეტის მიხედვით, რუსეთში შესვლა 1 900 კუბურ სანტიმეტრზე მეტი მოცულობის მანქანებს და ყველა ელექტრო და ჰიბრიდულ ავტომობილს ეკრძალებათ.
სანქციებამდე რეექსპორტის მხრივ ასეთი სურათი იყო:
● “თქვენ ჩვენი რაღაც რესპუბლიკა იყავით” – რას ამბობენ რუსეთის მოქალაქეები, რომლებიც ბათუმში საკრუიზო ლაინერით შემოვიდნენ
● BBC: ქართველების პროტესტის შემდეგ, რუსულმა კრუიზმა ბათუმი დატოვა
● TI: უკრაინაში ომის დაწყების შემდეგ, რუსეთის მოქალაქეები საქართველოში თვეში საშუალოდ 1300 კომპანიას არეგისტრირებენ
შემოსავლების სამსახურმა შეზღუდვების შესახებ ინფორმაცია მხოლოდ მას შემდეგ გაასაჯაროვა, რაც სოციალურ ქსელში რუსეთის მოქალაქის ვიდეო გავრცელდა, რომელიც, სავარაუდოდ, რუსთავის ავტობაზრობის მიმდებარე ტერიტორიაზეა გადაღებული.
რუსეთის მოქალაქის თქმით, მათ “გლობალური პრობლემები გაუჩნდათ” და რუსები საქართველოდან მათი “საყვარელი ავტომანქანების” შეძენას ვეღარ შეძლებენ. მისივე განმარტებით, ამოქმედდა საქართველოდან სომხეთის გავლით მანქანების რეექსპორტზე შეზღუდვებიც, რის შესახებაც შემოსავლების სამსახურს არ უსაუბრია.
“რუსეთის ფედერაციაში მანქანების რეექსპორტი აღარ კეთდება, მორჩა. საქართველოდან რუსეთში რეექსპორტი აღარ არსებობს. ყველა თქვენი საყვარელი ავტომანქანა 2018-2019 წლის წარმოებული მერსედესები, BMW-ები უკვე აღარ შეგიძლიათ გააფორმოთ რუსეთსა და ბელარუსზე.
კიდევ ერთი ცუდი ამბავი: საქართველო ასევე არ ატარებს მანქანებს სომხეთიდან, რომლებსაც ტრანზიტული ნომრები აქვთ. სანომრე ნიშნები მხოლოდ რკინის უნდა იყოს. ამიტომ თუკი შეიძინეთ, ან აპირებთ შეიძინოთ ავტომანქანა სომხეთში თქვენ აუცილებლად უნდა გაიფორმოთ საკუთარ სახელზე. შეზღუდვა ასევე ეხება ავტომანქანებს, რომლებიც განბაჟებულია სომხეთში და რომლებიც საქართველოდანაა შეტანილი. საქართველო არც ასეთ მანქანებს ატარებს. აი ასეთი ამბებია პირველი აგვისტოდან. აღარ იფიქროთ უტილიზაციის მოსაკრებელზე, ახლა უფრო გლობალური პრობლემები გაგვიჩნდა.” – აცხადებს რუსეთის მოქალაქე.
