საპატრიარქო 5 ივლისს, ღირსების მარშის პარალელურად აქციას აანონსებს
საქართველოს საპატრიარქო 5 ივლისს, ღირსების მარშის პარალელურად აქციას აანონსებს. მათ მიერ გავრცელებულ განცხადებაში ასევე ნათქვამია, რომ მიუღებელია საელჩოთა და ევროპარლამენტარების მკვეთრი ჩარევა სასულიერო ცხოვრებაში.
“შევიკრიბოთ, აღვავლინოთ პარაკლისი, ნახოს მსოფლიომ, რომ ღირსებას ვიცავთ”, – წერია მათ განცხადებაში.
მათივე განმარტებით, 29 ივნისს საპატრიარქომ განცხადებით მიმართა ,,თბილისი-პრაიდის’’ ორგანიზატორებს და საქართველოში აკრედიტებულ საელჩოთა ხელმძღვანელებს, თავი შეეკავებინათ ლგბტქ+ პროპაგანდისტული აქტივობების მხარდაჭერისაგან:
“იმედი გვქონდა, რომ ისინი ჩვენი საზოგადოების უდიდესი უმრავლესობის არჩევანს არ უგულებელყოფდნენ, მაგრამ ბოლო დღეების მოვლენებმა ნათლად აჩვენა, თუ რა ზეწოლაც ხორციელდება ქვეყანაში.
ჩვენი ეკლესიისთვის და ჩვენი მოქალაქეებისთვის შემაშფოთებელი და მიუღებელია გარკვეულ საელჩოთა და ევროპარლამენტარების ნაწილის მკვეთრი ჩარევა ჩვენს საზოგადოებრივ და სულიერ ცხოვრებაში და ვთვლით, რომ ეს მათი უფლებამოსილების გადამეტებაა.”
საპატრიარქო განცხადებაში ხაზს უსვამს იმას, რომ ,,პრაიდის“ მიზანი არის გაუკუღმართებული ცხოვრების წესის პროპაგანდა, “რომელიც აზიანებს მომავალი თაობის ცნობიერებას; ეს ქმედება ჩვენს ხალხში, განურჩევლად ეროვნებისა და რელიგიური კუთვნილებისა, დაძაბულობასა და არეულობას იწვევს.”
“მივმართავთ მოსახლეობას, მშვიდობიანად დავაფიქსიროთ ჩვენი პროტესტი და არ ავყვეთ ძალადობრივი კონფრონტაციისათვის მიზანმიმართულ პროვოკაციას“, – ვკითხულობთ განცხადებაში.
აგრესიულ ჯგუფებს, რომლებიც ქვებს, ხისა და რკინის საგნებს ისროდნენ, სათავეში სწორედ სამღვდელოების წარმომადგენლები ედგნენ
გამოხმაურება
საპატრიარქოს განცხადებას გამოეხმაურა პარტია “ევროპული საქართველო”. მათი თქმით, ისინი უერთდებიან ღირსების მარშს. როგორც პარტიის მიერ გავრცელებულ განცხადებაშია ნათქვამი, “ღირსების მარშის” მხარდაჭერა პრინციპული საკითხია.
“ეს არა მხოლოდ ამ უმცირესობების, არამედ თითოეული ჩვენგანის თავისუფლებისა და ღირსების საკითხია. ფაშისტური ძალების წინააღმდეგ ბრძოლა ჩვენი ქვეყნის უსაფრთხოებისთვისაც მნიშვნელოვანია, ამ ძალების აბსოლუტური უმრავლესობა პუტინისტურია და საქართველოში რუსულ ინტერესებს ემსახურება.
ეს ძალები საქართველოს ხელისუფლების წახალისებითა და მხარდაჭერით მოქმედებენ, ამიტომ პასუხისმგებლობა ქართულ ოცნებას ეკისრება. საზოგადოებამ უნდა აიძულოს მთავრობა დროულად შეზღუდოს ისინი”, – აღნიშნულია განცხადებაში.
განცხადება გაავრცელა “თანასწორობის მოძრაობამაც.” მათი თქმით, საპატრიარქოს პოზიცია საფრთხის შემცველია და მოქალაქეებს ღონისძიების მონაწილეების წინააღმდეგ მობილიზებას ირიბად მოუწოდებს:
“აქედან გამომდინარე, მოვუწოდებთ საქართველოს შინაგან საქმეთა სამინისტროს:
– დაიცვას შეკრებაში მონაწილე თითოეული ადამიანის უსაფრთხოება;
– ძალადობრივი და ჰომოფობიური ჯგუფების მიერ განხორციელებული შესაძლო სამართალდარღვევის აღსაკვეთად გამოიყენოს კანონმდებლობით გათვალისწინებული პროპორციული საშუალებები.”
ხოლო “თბილისი პრაიდის” დირექტორი, გიორგი თაბაგარი საკუთარ ფეისბუქგვერდზე წერს:
“რამდენის უფლებას აძლევენ თავს. ბოროტების სავანეა მართლა! არაფერი საერთო ამ განცხადების დამწერ ინსტიტუციას არ აქვს ქრისტიანობასთან!”
ფოთისა და ხობის მიტროპოლიტი, მეუფე გრიგოლი საპატრიარქოს განცხადებას გამოეხმაურა და აღნიშნა, რომ პრაიდის ჩატარება-არ გამართვა სახელმწიფომ უნდა გადაწყვიტოს:
“მე გეტყვით იმავეს, რაც მითქვამს – ეკლესია სახელმწიფო ინსტიტუტების ფუნქციას თავის თავზე ვერ აიღებს. სამწუხაროდ, მოხდა ისე, არ ვიცი ეს შემთხვევით თუ განგებ, რომ ეკლესია აღმოჩნდა სწორედ ამ მოცემულობაში, როდესაც ის ფუნქცია, რაც უნდა სახელმწიფომ განახორციელოს, ანუ, კანონის მიხედვით რაც არის ნებადართული გააკონტროლოს, რატომღაც ეკლესიის გადასაწყვეტი გახდა, სინამდვილეში კი ეკლესია არ არის ამ ფუნქციით დატვირთული.”
მიტროპოლიტის თქმით, მას არ მოსწონს პრაიდი, “მაგრამ ჩემი არ მოწონება არაფერს ნიშნავს. ვიღაცას მე არ მოვწონვარ და ახლა რა ვქნათ, როგორ მოვიქცეთ?!”
_________________________________________________________
● როგორ იბრძვის ლგბტქ თემი საკუთარი უფლებებისთვის საქართველოში და რას მიაღწია?
● ცხოვრება სიძულვილის გარემოში. რას ჰყვებიან ლგბტ ადამიანების მშობლები
● თბილისში პრაიდის კვირეული გაიხსნა. პირველმა დღემ კვერცხების სროლისა და დაკავებების ფონზე ჩაიარა
● ქართველი ტრანსგენდერი: “არასოდეს ვიცი, სახლში ცოცხალი დავბრუნდები თუ არა”
● დასავლეთი თუ რუსეთი? საით მიჰყავს ქვეყანა ქართულ ეკლესიას
_____________________________________________________________
„პრაიდ კვირეული“ თბილისში 1 ივლისს გაიხსნა – პირველმა დღემ კვერცხების სროლისა და დაკავებების ფონზე ჩაიარა. დღის განმავლობაში, პოლიციამ, პრაიდის საწინააღმდეგო, ჰომოფობიური აქციის 20-მდე მონაწილე დააკავა. მათ წვრილმან ხულიგნობასა და პოლიციელის კანონიერი მოთხოვნისადმი დაუმორჩილებლობას ედავებოდნენ და საბოლოოდ ხელწერილის საფუძველზე გაათავისუფლეს.
კვირეული 5 ივლისს “ღირსების მარშით” დასრულდება – ლგბტქ აქტივისტები და მათი მხარდამჭერები თბილისის ცენტრში, რუსთაველის გამზირზე შეიკრიბებიან და მსვლელობას მოაწყობენ.
Tbilisi Pride- ის გეგმებმა გააღიზიანა ექსტრემისტი მემარჯვენეები. ბიზნესმენმა, ულტრა-კონსერვატიული მოძრაობა “ერის” დამფუძნებელმა ლევან ვასაძემ, რომელიც ქვეყანაში ჰომოფობიური და ანტი-ლგბტ მოძრაობის ერთ-ერთი მთავარი ფიგურაა, ხელისუფლებას ულტიმატუმი წაუყენა. 15 ივნისს მან „ქართული ოცნებას“ 10-დღიანი ვადა მისცა მარშის გასაუქმებლად და „გარყვნილების პროპაგანდის“ ამკრძალავი კანონის მისაღებად.
ვასაძის მოთხოვნები ხელისუფლებამ არ დააკმაყოფილა, თუმცა მმართველი გუნდის წარმომადგენლები მიიჩნევენ, რომ თბილისი-პრაიდი არ უნდა ჩატარდეს, რადგან ამ ღონისძიებას სხვადასხვა ძალები პროვოკაციების და დესტაბილიზაციის მოსაწყობად გამოიყენებენ.
29 ივნისს პირველი განცხადება გაავრცელა საქართველოს საპატრიარქომაც. საპატრიარქო მიმართავს ევროპარლამენტარებს და საქართველოში აკრედიტებულ ელჩებს, რომ თავი შეიკავონ ,,თბილისი პრაიდის“ მხარდაჭერისა და წახალისებისაგან, რადგან საპატრიარქოს აზრით, ეს გამოიწვევს საქართველოში “დასავლური ფასეულობების დისკრედიტაციას”.
ასევე, საპატრიარქომ მოუწოდა საქართველოს ხელისუფლებას არ დაუშვას პრაიდის კვირეულის ჩატარება.
განცხადება გაავრცელეს “რიონის ხეობის” მცველებმაც. განცხადებაში ისინი ამბობენ, რომ პრაიდი დიდ დარტყმას აყენებს ეროვნულ ერთობას და პრაიდის იდეა არატრადიციული ცხოვრების წესის პროპაგანდაა.
