საოლქო კომისიებთან ოპოზიციის წევრები და სამოქალაქო აქტივისტები აქციებს მართავენ
საოლქო კომისიებთან, სადაც საჩივრებს განიხილავენ, ოპოზიციის წევრები და აქტივისტები აქციებს მართავენ.
აქციები იმართება გლდანში, ისანში, საბურთალოზე, სამგორში, ასევე წყალტუბოსა და ბათუმში. ოპოზიციის წევრები ითხოვენ, რომ საჩივრების განხილვას დაესწრონ, რის საშუალებასაც მათ იქ მობილიზებული სამართალდამცავები არ აძლევენ.
● რა გეგმა აქვს ქართულ ოპოზიციას, რომელიც არ ცნობს საპარლამენტო არჩევნების შედეგებს
საბურთალოს საოლქო კომისიასთან სამართალდამცველებსა და აქციის მონაწილეებს შორის დაპირისპირება მოხდა.
დაპირისპირებისას “ერთიანი საქართველოს” სამი წევრი დააკავეს. პარტია “მოქალაქეების” დამფუძნებელმა ალეკო ელისაშვილმა კი დაზიანება მიიღო.
“მე მაქვს უფლება კანონით, რომ შევიდე და დავესწრო. სახეზე არ გვეცნობითო, ასე მითხრეს. იტყუებიან, რა თქმა უნდა, თავსაც იტყუებენ.
ჯერ არის ჩემთვის კაცობა, მანდატისთვის და პარლამენტში შესასვლელად კი არ დავიბადე. ეს ოხერი რა ბალანსი ვერ დასვი, რა ვერ დათვალე 21-ე საუკუნეა, აიღე კალკულატორი და დათვალე. ქვის ხანა ხომ არაა, თითებით და ქვებით რომ ითვლიდნენ?” – ამბობს ალეკო ელისაშვილი, რომელიც კენჭს სწორედ საბურთალოზე იყრიდა.
დაძაბულობა იყო ბათუმშიც, სადაც მაღაზიის მინა ჩაიმტვრა და “ნაციონალური მოძრაობის” წევრი, გიორგი კირთაძე დაშავდა.
“დაშავდა ოპოზიციის ლიდერი, ბათუმის მაჟორიტარი დეპუტატობის კანდიდატი გიორგი კირთაძე, საბედნიეროდ გადარჩა. ჩვენ არ გავჩერდებით, იმიტომ რომ ხმებს იპარავენ, სიცოცხლის ფასად დავიცავთ ჩვენს უფლებებს. არ ვაპირებთ დაშლას, დაუყოვნებლივ ვადამდელი საპარლამენტო არჩევნები ჩატარდეს”, – განაცხადა აქციის ერთ-ერთმა მონაწილემ.
“ამათ ეს არჩევნები, ეს სიყალბე არ შერჩებათ. მე ვიბრძვი, რომ ამ უსამართლობას დავუსვა წერტილი. არ იყო ჩემი საქმე პოლიტიკა, მაგრამ ამათმა სიმახინჯემ, ამ მახინჯმა სისტემამ აქაც მომიყვანა”, – განაცხადა პანკისში ჩატარებული სპეცოპერაციის დროს მოკლული თემირლან მაჩალიკაშვილის მამამ, მალხაზ მაჩალიკაშვილმა, რომელიც ერთ-ერთ საოლქო საარჩევნო კომისიასთან საპროტესტო აქციას შეუერთდა.
დაძაბულობის ეპიცენტრშია ისნის რაიონი, სადაც “ნაციონალური მოძრაობის” ისნის მაჟორიტარობის კანდიდატი, ხატია დეკანოიძე იმყოფება.
მისი თქმით, 81-ე უბანზევე დაკარგულია ბიულეტენები. ეს ნიშნავს, რომ ე.წ. კარუსელი ტრიალებდა. 45 ოქმზე კი არ ჯდება ბალანსი.
“მოვედით გასაპროტესტებლად. საჩივრებზე ჩვენი წარმომადგენლები იყვნენ შიგნით და არცერთ საჩივარს არ იხილავენ. ეს გამყალბებლები, ეს ბიძინას მონები ხელს იწევენ ფორმალურად, ჩემს წარმომადგენელს მიაყენეს სიტყვიერი და ფიზიკური შეურაცხყოფა, მოძალადე აღმოჩნდა საოლქო საარჩევნო კომისიის თავმჯდომარის მძღოლი, რომელმაც ჩვენს ერთ-ერთ წარმომადგენელს წიხლი ჩაარტყა”, – განაცხადა ხატია დეკანოიძემ.
ისანში პოლიციამ რამდენიმე აქტივისტი დააკავა. დაკავებას წინ უძღოდა პოლიციასა და აქციის მონაწილეებს შორის კიდევ ერთი დაპირისპირება.
აქტივისტები საარჩევნო კომისიის შენობაში შესვლას და საჩივრების განხილვაზე დასწრებას მოითხოვდნენ, თუმცა ამის უფლება პოლიციამ არ მისცა.
“ჩემს წარმომადგენლებს მიაყენეს სიტყვიერი და ფიზიკური შეურაცხყოფა. მოძალადე აღმოჩნდა საოლქო-საარჩევნო კომისიის თავმჯდომარის მძღოლი, რომელმაც წიხლი ჩაარტყა მუცელში ჩვენს ერთ-ერთ წარმომადგენელს და გავიყვანეთ სასწრაფოთი. ეს ზონდერი კიდევ არის შიგნით ყოველგვარი უფლებამოსილების გარეშე”, – აცხადებს ხატია დეკანოიძე.
● არასამთავრობოები: მთავრობამ ვერ უზრუნველყო არჩევნების დემოკრატიულად ჩატარება
“ბიძინა ივანიშვილო, დაგიჯდება ფასად ეს უნამუსო თაღლითობა, რაც ჩაიდინე საქართველოს საპარლამენტო არჩევნებზე!”, – მიმართა ხელისუფლებას “ერთიანი საქართველოს” ლიდერმა, ნინო ბურჯანაძემ პოლიციის განყოფილებასთან, სადაც მისი პარტიის წევრები არიან დაკავებული.
რაც შეეხება პრორუსული პარტიის, “პატრიოტთა ალიანსის” ლიდერს, ირმა ინაშვილს – რომლის პარტიაც სხვებთან ერთად არ აპირებს შევიდეს პარლამენტში – ტელეკომპანია “პირველის” ეთერით მიმართა ბიძინა ივანიშვილს:
“არ ველოდი სიმართლე გითხრათ, რომ ბიძინა ივანიშვილი იქნებოდა ასეთი უსამართლო კაცი. ჩემ ცხოვრებაში არ მინახავს ბიძინა ივანიშვილზე უფრო უსამართლო ადამიანი, და ძალიან მტკივა გული ამ სამწუხარო აღმოჩენის გამო”, – განაცხადა ირმა ინაშვილმა.
აქციებს ეხმაურებიან ხელისუფლების წარმომადგენლებიც
როგორც “ქართული ოცნების” ერთ-ერთმა ლიდერმა, მამუკა მდინარაძემ განაცხადა, საბურთალოზე რომ გადაითვალონ, შეიძლება, ციფრები ქართული ოცნების საზიანოდ აღმოჩნდეს შეტანილი.
ხოლო პარლამენტის ყოფილი თავმჯდომარე ირაკლი კობახიძე ამტკიცებს, რომ ეს აქციები მოწმობს იმას, რომ ამ პოლიტიკოსების რეალური მიზანი საერთოდ არ არის რაიმეს დაზუსტება.
“პირიქით, მათ ეშინიათ დაზუსტების, გამომდინარე იქიდან, რომ ხმების გადათვლა დაადასტურებს იმ შედეგებს, რომელიც საბოლოო ჯამში დაფიქსირდა ცესკოს მიერ. გამოვა ისე, რომ რასაც ისინი აპროტესტებენ, იყო სრული ფარსი. აქედან გამომდინარე, ისინი ახორციელებენ დესტრუქციას, რაც კიდევ ერთხელ მოწმობს, რომ რეალურად არჩევნები ჩატარდა სათანადოდ და დაზუსტებაც, ბუნებრივია, ამ ყველაფერს აჩვენებს” – ამბობს კობახიძე.
ამჟამად, ცესკოს მიხედვით, ოფიციალური შედეგები ასეთია:
1. მმართველი პარტია “ქართული ოცნება” – 48,24%
2.”ნაციონალური მოძრაობა -გაერთიანებული ოპოზიცია” – 27.15%
3. “ევროპული საქართველო – 3,79%
4. “პატრიოტთა ალიანსი” – 3.14%
5. “ლელო” – 3.16%
6. “სტატეგია აღმაშენებელი” – 3.15%
7. “გირჩი” – 2.89%
8. მოქალაქეები – ალეკო ელისაშვილი – 1.33%
● ოპოზიციურმა პარტიებმა ერთობლივ დოკუმენტს მოაწერეს ხელი. ისინი პარლამენტში არ შევლენ
