"ყველგან მივწვდებით" - ზელენსკი ადასტურებს, რომ აფხაზეთში რუსულ ხომალდებზე იერიშებს მიიტანენ
სამხედრო ფლოტი ოჩამჩირეში
უკრაინის პრეზიდენტის, ვოლოდიმირ ზელენსკის თქმით, უკრაინა ოკუპირებულ აფხაზეთში რუსულ ხომალდებზე იერიშისგან თავს არ შეიკავებს. ზელენსკიმ რუსეთის მიერ ოჩამჩირეში საზღვაო სამხედრო ბაზის გახსნის გეგმებზე საუბრის დროს აღნიშნა, რომ შავი ზღვის ფლოტს ყველგან მისწვდებიან.
“რუსეთის სამხედრო ფლოტს აღარ შეუძლია შავი ზღვის დასავლეთ ნაწილში მოქმედება და გარბის ყირიმიდან. ეს ისტორიული მიღწევაა. მცირე ხნის წინ რუსეთის მეთაურს მოუწია გამოეცხადებინა შავი ზღვის ფლოტის ახალი ბაზის საქართველოს ოკუპირებულ ტერიტორიაზე შექმნის შესახებ, ანუ ზღვის სამხრეთ-აღმოსავლეთში, უკრაინული რაკეტებისა და საზღვაო დრონებისგან მაქსიმალურად შორს, მაგრამ ჩვენ მათ ყველგან მივწვდებით”. – თქვა ზელენსკიმ ყირიმის პლატფორმის საპარლამენტო სამიტზე.
დღესვე უკრაინის თავდაცვის ძალების დაზვერვის მთავარი სამმართველოს (ГУР) სპიკერმა, ვადიმ სკიბიცკიმ Апостроф TV-სთან ოჩამჩირის პორტში რუსეთის მიერ ჩატარებულ სამუშაოებზე ისაუბრა.
როგორც სკიბიცკი განმარტავს, რუსეთის მიერ შავი ზღვის ფლოტის ხომალდების დისლოკაციის შეცვლა განპირობებულია ანექსირებულ ყირიმზე უკრაინის გახშირებული იერიშებითა და ოპერაციებით.
მისივე თქმით, რუსეთის შავი ზღვის ფლოტის ხომალდების ნაწილი ნოვოროსიისკის პორტში გადაიყვანეს, თუმცა ეს პატარა ადგილია და ყველა გემს ვერ დაიტევს, რის გამოც კრემლმა საქართველოს ოკუპირებული ტერიტორიის გამოყენება გადაწყვიტა.
“ქალაქ ოჩამჩირეში, აფხაზეთში მიმდინარეობს აქტიური სამუშაოები. რუსებმა იქ ფსკერის გაღრმავების სამუშაოები ჩაატარეს, პორტის ინფრასტრუქტურა განაახლეს, რათა აქ განლაგებული სამხედრო ხომალდები უზრუნველყოფილი იყოს. თუმცა ეს მაინც პატარა ადგილი იქნება”. – თქვა სკიბიცკიმ.
რუსეთს სამხედრო გემების ნაწილის ყირიმიდან საქართველოს ოკუპირებულ ტერიტორიაზე გადაყვანის შესახებ ინფორმაცია ვადიმ სკიბიცკიმ პირველად 23 ოქტომბერს გაავრცელა.
დაზვერვის პრესსპიკერი ხაზს უსვამს, რომ რუსებმა “გაიაზრეს საგრძნობი სამხედრო საფრთხე” მას შემდეგ, რაც უკრაინამ ყირიმში სპეცოპერაციების სერია განახორციელა.
● უკრაინის დაზვერვა: რუსეთს სამხედრო ფლოტის ნაწილი ყირიმიდან ოჩამჩირეში გადაჰყავს
● NATO-მ რეზოლუცია მიიღო, რომელშიც ოჩამჩირეში რუსული ბაზის განთავსებასაც გმობს
● მოსაზრება: რუსული ბაზა ოჩამჩირეში შეიძლება ლეგიტიმურ სამიზნედ იქცეს
რუსული სამხედრო ბაზა ოჩამჩირეში – რა ვიცით?
აფხაზეთის ე.წ. პრეზიდენტის, ასლან ბჟანიას თქმით, ოჩამჩირეში რუსეთის მუდმივი საზღვაო ბაზა მოეწყობა. ამის შესახებ ბჟანიამ რუსულ მედია Известия-სთან მიცემულ ინტერვიუში 5 ოქტომბერს ისაუბრა.
“ჩვენი დღესასწაულის დღეს ჩვენთან შემოვიდა პატარა სარაკეტო ხომალდი, ჩვენ მის ბორტზე ავედით. ძალიან განვითარებული ხომალდია სერიოზული საბრძოლო შესაძლებლობებით. ჩვენ ხელი მოვაწერეთ შეთანხმებას და უახლოეს მომავალში, ოჩამჩირის რაიონში რუსეთის საზღვაო ძალების მუდმივი ბაზა მოეწყობა.
ეს ყველაფერი მიმართულია რუსეთისა და აფხაზეთის თავდაცვისუნარიანობის გაზრდისკენ და ასეთი ტიპის თანამშრომლობა გაგრძელდება, რადგან ეს ემსახურება რუსეთისა და აფხაზეთის ფუნდამენტურ ინტერესებს და უსაფრთხოება ამ მხრივ ყველაზე მნიშვნელოვანია”. – ამბობს ბჟანია.
აფხაზეთის რესპუბლიკის უშიშროების საბჭოს მდივანი, სერგეი შამბა ასლან ბჟანიას განცხადებას გამოეხმაურა და აღნიშნა, რომ ეს შეთანხმება “დღეს არ იყო მიღწეული” და გადაწყვეტილება წინა, ერთობლივ შეხვედრებზე მიიღეს.
მისივე თქმით, აფხაზეთისთვის ეს არის რუსეთის ფედერაციასთან სამოკავშირეო ხელშეკრულებების განხორციელების მაგალითი.
საქართველოს საგარეო უწყება აღნიშნულთან დაკავშირებით “შეშფოთებას” გამოთქვამს და აღნიშნავს, რომ მსგავსი ქმედება საქართველოს სუვერენიტეტისა და ტერიტორიული მთლიანობის დარღვევაა.
ოჩამჩირეში რუსული საზღვაო ბაზის წინააღმდეგ ქართული ოპოზიცია პარლამენტისგან რეზოლუციის მიღებას ითხოვს. შესაბამისი რეზოლუციის პროექტი საკანონმდებლო ორგანოში 9 ოქტომბერს დარეგისტრირდა. რეზოლუციის ავტორები ოპოზიციის წარმომადგენლები, საპარლამენტო პოლიტიკური ჯგუფი „საქართველოსთვის“ და დამოუკიდებელი დეპუტატი თეონა აქუბარდია არიან.
“რეზოლუციის პროექტი მტკიცედ გმობს რუსეთის მიერ საქართველოს სუვერენული რეგიონების, აფხაზეთისა და ცხინვალის რეგიონის ოკუპაციას, მილიტარიზაციას და მათი ანექსიისკენ მიმართულ აგრესიულ ქმედებებს, რომლის ახალი გამოხატულებაა აფხაზეთში, ოჩამჩირის პორტში რუსეთის მუდმივმოქმედი სამხედრო საზღვაო ბაზის გახსნის გადაწყვეტილება, ისევე როგორც აფხაზეთის რუსეთ-ბელარუსის კავშირში ინტეგრაციის მცდელობა.” – ვკითხულობთ აღნიშნულ ინიციატივაში.
● “შემაშფოთებელია განცხადება ოჩამჩირეში რუსული ბაზების მოწყობაზე” – გამოხმაურება თბილისში
● კომენტარი აფხაზეთიდან სამხედრო ბაზაზე: ეს არის უსაფრთხოების გარანტი და გადაწყვეტილება დღეს არ მიღებულა
NATO-ს რეზოლუცია
9 ოქტომბერს ჩრდილოატლანტიკური ალიანსის საპარლამენტო ასამბლეამ სამი რეზოლუცია მიიღო, რომლებშიც საქართველოს ევროატლანტიკური მისწრაფებებისა და ტერიტორიული მთლიანობის მხარდაჭერაზე საუბრობს. ასევე, რეზოლუცია გმობს ოჩამჩირეში რუსული სამხედრო ბაზის განთავსებას.
“ვგმობთ რუსეთის გაცხადებულ მისწრაფებას ოჩამჩირეში სამხედრო-საზღვაო ბაზა ააშენოს, რომელიც განთავსებულია რუსეთის მიერ საქართველოს ოკუპირებულ ტერიტორიაზე, რაც შავი ზღვის რეგიონში შემდგომი დესტაბილიზაციის საშიშროებას ქმნის.
მხარს ვუჭერთ, რომ კვლავ დადასტურდეს 2008 წლის ბუქარესტის სამიტის გადაწყვეტილება, რომლის თანახმადაც საქართველო გახდება NATO-ს წევრი გაწევრიანების სამოქმედო გეგმით, როგორც გაწევრიანების პროცესის განუყოფელი ნაწილი.
ასევე სწრაფად უნდა მოხდეს საჭიროებებზე მორგებული პაკეტის იმპლემენტაცია, რომლის ფარგლებშიც გამოიხატება საქართველოსა და მოლდოვის მხარდაჭერა, ასევე აქტიურად გაგრძელდეს საქართველოს მხარდაჭერა ევროატლანტიკური ინტეგრაციის გზაზე, გარდა ამისა მისი მხარდაჭერა ჩრდილოატლანტიკურ ალიანსში გაწევრიანებისთვის გადადგმულ ნაბიჯებში, რომლებიც ჩატარებულ რეფორმებში აისახება.” – წერია ალიანსის მიერ მიღებულ ერთ-ერთ რეზოლუციაში.
