საქართველოს პრეზიდენტმა სალომე ზურაბიშვილმა ევროპარლამენტში სიტყვით გამოსვლისას საქართველოს მთავრობას მიმართა და განაცხადა, რომ საქართველომ უნდა მიიღოს სტატუსი. მისივე თქმით, “არ აქვს აზრი” მის მიმართ მუქარებს.
რა თქვა საქართველოს პრეზიდენტმა
● “პრეზიდენტის პოზიცია უნდა იყოს ნამდვილად პატივისცემის ღირსი, ისევე როგორც დიდ ქვეყნებში, არ უნდა ხორციელდებოდეს ზეწოლა გარედან და ქვეყნის შიგნიდან. მე მსურს მივმართო საქართველოს მთავრობის წარმომადგენლებს, რადგანაც არ აქვს აზრი ჩემს მიმართ მუქარების გაჟღერებას, რადგანაც მე გავაკეთებ ყველაფერს, რაც ჩემს ძალაშია საქართველოს უკეთესი მომავლისკენ.
● მსურს შევახსენო, რომ ის მოთხოვნები, რაც წარდგენილი იყო ევროკავშირის მიერ უნდა დაკმაყოფილდეს დროულად. ევროკავშირი გვეხმარება იმ რთულ კიბეზე ასვლაში რასაც ევროპასთან დაახლოება ეწოდება.
● ბოლო 20 წელია ჩვენ ძალიან აქტიურად ვიბრძვით, ასოცირების შეთანხმებას მივაღწიეთ, თავიდან გვეგონა, რომ ეს შეუძლებელი იყო, ძალიან მნიშვნელოვანი გახლავთ ჩვენთვის ევროპული პერსპექტივის მოცემა.
● რუსეთის მიმართ მადლიერება არ არის საჭირო, რადგანაც არ არის სწორი ეკონომიკური ურთიერთობების აღდგენა რუსეთთან. ჩვენი პარტნიორები ძალიან აქტიურად მუშაობენ იმაზე, რომ დაიცვან საქართველოს მომავალი და შეთანხმება, რომელიც დაიდო, რამაც შეაჩერა რუსეთის ჯარების შესვლა საქართველოში, ძალიან დასაფასებელი იყო. მნიშვნელოვანია, რომ ხაზი გავუსვათ, ევროპის გარეშე თბილისიც იქნებოდა ოკუპირებული.
● მიუხედავად იმისა, რომ ჩემი ვეტოები უარყოფილი იქნება უმრავლესობის მიერ, ეს მხარდაჭერილი იქნება ასობით ათასი ქართველის მიერ, რადგანაც ჩვენ გვაქვს საერთო პრინციპი. მე ნამდვილად აქტიურად ვმუშაობ საქართველოს ევროინტეგრაციისკენ, მე ვახორციელებ შეხვედრებს სხვადასხვა ევროპულ ქვეყნებში.
● ეროვნული ერთობა აძლევს საქართველოს საშუალებას, დაძლიოს პოლარიზაცია და გაიმარჯვოს – საქართველო არ გახლავთ გამონაკლისი ამ მიმართულებით, მაგრამ პოლარიზაცია მცირე ზომის ქვეყანაში ძალიან დესტრუქციული გახლავთ და დესტაბილიზაციას იწვევს.
● იმ ქვეყანაში, სადაც ხორციელდება ოკუპაცია და სადაც მიმდინარეობს სიძულვილის ენით საუბარი, პოლარიზაცია არგებს მხოლოდ და მხოლოდ ჩვენს მტერს და არა ჩვენს ქვეყანას.
● მსურს ხაზი გავუსვა იმას, რომ კავშირი საქართველოსა და ევროპას შორის ძალიან მყარი გახლავთ – ეს უმნიშვნელოვანესი პერიოდია და მე ნამდვილად მსურს, ვიხილო საქართველო ისეთ მდგომარეობაში, როდესაც შეძლებს გადალახოს ყველა გამოწვევა და მიაღწიოს ევროინტეგრაციას. მხოლოდ და მხოლოდ, ერთი გზა გვაქვს ამისთვის, უნდა მიიღოს საქართველომ კანდიდატის სტატუსი და მე დარწმუნებული ვარ, ასეც იქნება.
საქართველოს პრეზიდენტმა სალომე ზურაბიშვილმა 26 მაისისადმი მიძღვნილ ღონისძიებაზე სიტყვით გამოსვლისას განაცხადა, რომ საზოგადოება არ დათმობს ევროპულ არჩევანს და “დროა”, მთავრობამ შეასრულოს პირობა. მან ასევე მან ხაზი გაუსვა ხელისუფლების მიერ საზოგადოებაში შიშის გაღვივების მცდელობასა და ანტიდასავლურ პროპაგანდას.
“გაუგებარი და შეურაცხმყოფელია, როცა დღეს ვითვლით, თუ რამდენ მილიონს მოგვიტანს “ფრენების საჩუქარი”. ნუთუ ჩვენი ღირსება 200 თუ 300 მილიონად იყიდება?!და ახლა ამ ტრიბუნიდან მინდა მივმართო გიორგი ანწუხელიძის და გიგა ოთხოზორიას ოჯახებს. მე, როგორც ამ ქვეყნის უმაღლესი მთავარსარდალი ბოდიშს გიხდით იმ შეურაცხყოფისთვის, რომელიც არა მხოლოდ თქვენი, არამედ მთელი ქვეყნის შეურაცხყოფაა!
გაუგებარი გახდა ჩვენი საგარეო პოლიტიკა. კონსტიტუციაში კი ევროპაა ჩაწერილი – ყოველდღიური განცხადებები კი ევროპისგან გვაშორებს და იზოლაციისკენ მივყავართ. ისმის კითხვა სად გაქრა სიტყვები “ევროპა ჩვენი ცივილიზაციური არჩევანია”. – განაცხადა საქართველოს პრეზიდენტმა.
მისივე თქმით, გაუგებარია, როცა ევროპას და ამერიკას ყველაფერს აბრალებ, მეორე ფრონტის გახსნის მცდელობას, ქართველობის წართმევას, გარყვნილებას და მაინც, საკუთარ შვილებს ევროპასა და ამერიკაში უშვებ, საქართველოში კი ახალ თაობას ევროპულ “მომავალს უსპობ.”
