სალომე ზურაბიშვილი: აშშ-ს არ შეუძლია კავკასიაში დამცირდეს ერთი ადამიანის მიერ, რომელიც პუტინის ინტერესებს ემსახურება
სალომე ზურაბიშვილის ინტერვიუ
აშშ-ს არ შეუძლია კავკასიაში დამცირდეს 3.7 მილიონი მოსახლეობის მქონე ქვეყნის მიერ, ერთი ადამიანის მიერ, რომელიც თავის პოლიტიკას კარნახობს და ბატონი პუტინის ინტერესებს ემსახურება, – ამის შესახებ საქართველოს მეხუთე პრეზიდენტმა, სალომე ზურაბიშვილმა ჟურნალისტ ალექს რაუფოღლუსთან საუბარში განაცხადა.
სალომე ზურაბიშვილი:
“[წარმატებისთვის] ორი რამ არის საჭირო. პირველი – ეს არის ბრძოლა ჩვენი თავისთვის, რომელიც საქართველოს მოსახლეობამ უნდა მოვიგოთ და ვხედავ, რომ ხალხს კარგად აქვს გააზრებული, რომ საქმე თავად უნდა გააკეთო, სხვა არავინ არ გააკეთებს შენს სამუშაოს. და ეს არ არის სამუშაო, რომელიც გაკეთდება ძალადობის ან არასტაბილურობის მეშვეობით, ჩვენ ქვეყანაში მშვიდობიანი საშუალებებით უნდა გავიმარჯვოთ და პროტესტს თუ შეხედავთ, ის უკიდურესად პასუხისმგებლიანი, ორგანიზებული და მშვიდობიანია. და ეს ამ ხალხის პასუხისმგებლობის დონეს აჩვენებს, ქართველი ხალხი ორგანიზებულია, რამაც ყველა გაგვაკვირვა. ასე რომ, ეს პირველი ნაწილია – ჩვენი ნაწილი ჩვენ უნდა გავაკეთოთ.
მეორე ნაწილია, რომ ჩვენმა პარტნიორებმა გაიაზრონ რა არის სასწორზე საქართველოში. არა მხოლოდ დემოკრატიაა, რომელიც, კიდევ ერთხელ, ჩვენს მიერ დასაცავია, არამედ რეალურად ძალის ბალანსია რუსეთთან
თუ რუსეთმა ვერ შეძლო უკრაინაში გამარჯვება და რეალურად, ბევრი მხრივ წააგო, არ ვიცით რა შედეგი იქნება, მაგრამ მიუხედავად ამისა, მან წააგო. ის აღარ არის ევროპის დიდი სამხედრო ძალა, მან ნატო-ს კონსოლიდაცია მოახდინა, ვერ შეძლო ევროპის საზოგადოებრივ აზრში რაიმე რეალური ომის საწინააღმდეგო სენტიმენტების გაჩენა, როგორც ამას წარსულში ახერხებდა. ასე რომ, ეს ყველაფერი რუსეთის დიდი მარცხია.
თუმცა, მაშინ როდესაც კიევზე 3 დღეში გამარჯვება ვერ შეძლო, რუსეთი რაიმე საფასურის გარეშე კავკასიაში გამარჯვებას შეძლებს, უბრალოდ იმიტომ, რომ საქართველოში მარიონეტი მთავრობა ჰყავს და შეუძლია არჩევნების მანიპულირება. თუ ასე მოხდება, მაშინ ისინი არჩევნების მანიპულირებას მოახდენენ ბევრ სხვა ადგილზეც – რუმინეთში, მოლდოვაში ან სხვაგან. და ისინი გავლენას მოიპოვებენ
ასე რომ, ეს რეალურად ამერიკის სიძლიერის საკითხია. მოვისმინე პრეზიდენტ ტრამპისა და ახალი სახელმწიფო მდივნის განცხადებები. და თუ ამერიკას სურს, რომ იყოს პირველი, იყოს ძლიერი, მაშინ მას არ შეუძლია კავკასიაში დამცირდეს 3.7 მილიონი მოსახლეობის მქონე ქვეყნის მიერ, ერთი ადამიანის მიერ, რომელიც თავის პოლიტიკას კარნახობს და ბატონი პუტინის ინტერესებს ემსახურება.
ეს სიძლიერეს არ ნიშნავს, ეს სისუსტეს ნიშნავს. ეს იდეა მამშვიდებს, მაგრამ ეს გეოპოლიტიკური ბრძოლაა. დემოკრატიული ბრძოლაა ჩვენთვის, გეოპოლიტიკური ბრძოლისთვის საკმარისად ძლიერები არ ვართ, გვჭირდება ყურადღება და [აშშ-ის] პოლიტიკური მონაწილეობა, რაც ნიშნავს, რომ გვჭირდება ძლიერი განცხადებები, რომლებიც რუსეთს ეტყვის: “თავი დაანებეთ საქართველოს.”
18 იანვარს საქართველოს მეხუთე პრეზიდენტი, სალომე ზურაბიშვილი კონგრესმენ ჯო უილსონის მიწვევით აშშ-ის რესპუბლიკური პარტიის წინასაინაუგურაციო შეხვედრაზე იმყოფებოდა, სადაც ტრამპის მომავალი კაბინეტის წევრებს, მათ შორის, სახელმწიფო მდივნობის კანდიდატ მარკო რუბიოსა და თავდაცვის მინისტრობის კანდიდატ პიტ ჰეგსეთს შეხვდა.
სალომე ზურაბიშვილის განცხადებით, პარტნიორები მზად არიან საქართველოს ახალი არჩევნების ჩატარებაში დაეხმარონ.
მეხუთე პრეზიდენტი 20 იანვარს პრეზიდენტ დონალდ ტრამპის ინაუგურაციას დაესწრო.
