"რუსეთს უნდა შეეშალოს ხელი, გახდეს ექსკლუზიური ძალა შავი ზღვის რეგიონში" - ზურაბიშვილის გამოსვლა მიუნხენში

სალომე ზურაბიშვილის გამოსვლა მიუნხენში

საქართველოს პრეზიდენტი სალომე ზურაბიშვილი მიუნხენში, უსაფრთხოების კონფერენციაზე სიტყვით გამოვიდა. მისი თქმით, რუსეთს უნდა შეეშალოს ხელი, გახდეს ექსკლუზიური ძალა შავი ზღვის რეგიონში. ასევე, პრეზიდენტმა ისაუბრა ევროკავშირის გაფართოებაზეც და აღნიშნა, რომ ევროკავშირის გაფართოება საქართველოსთვის და ევროპის კავშირისთვისაც ეგზისტენციალურია.

მიუნხენის კონფერენციაზე საერთო დისკუსიის დროს პოლონეთის საგარეო საქმეთა მინისტრმა, რადოსლავ სიკორსკიმ სალომე ზურაბიშვილს მიხეილ სააკაშვილის შესახებ მიმართა:

“მე ვიყავი პოლონეთის პირველი თავდაცვის მინისტრი, რომელიც საქართველოში ჩავიდა და როგორც საქართველოს მეგობარი, თქვენ, ქალბატონო პრეზიდენტო, მინდა იცოდეთ, რომ ჩვენ გვახსოვს, რომ ამ კონფერენციას ესწრებოდა თქვენი წინამორბედი, პრეზიდენტი სააკაშვილი და მრავალი ჩვენგანისთვის ის საქართველოს მოდერნიზაციის სიმბოლო გახლავთ. 

ჩვენ კანონის უზენაესობას თქვენს ქვეყანაში პატივს ვცემთ, მაგრამ ვთლით, რომ მოპყრობა მის მიმართ გახლავთ ძალიან მნიშვნელოვანი საკითხი. მნიშვნელოვანია, რომ მას მოეპყრონ სამართლიანად და თქვენ, რა თქმა უნდა, შეგიძლიათ, შეიტანოთ წვლილი მის განთავისუფლებაში და საქართველოს ყველა მხარდამჭერი მიესალმება ამ ფაქტს.” 

რა თქვა სალომე ზურაბიშვილმა:

“რუსეთს უნდა შეეშალოს ხელი, გახდეს ექსკლუზიური ძალა შავი ზღვის რეგიონში”

სალომე ზურაბიშვილი: “არსებობს უსაფრთხოების აუცილებლობა. ეს არის ერთადერთი პერსპექტივა ქვეყნისთვის, რომელიც იზიარებს ევროკავშირის ღირებულებებს. დღეს მთავარი საკითხი არის უსაფრთხოება. ევროკავშირმა უნდა იგრძნოს უსაფრთხოების საჭიროება. 

რასაც რუსეთი ახლა აკეთებს, არის ის, რაც დააანონსა 2007-ში, რომ არ მისცემდა დასავლეთს შესაძლებლობას შავი ზღვის რეგიონში შესულიყო. ამას მოჰყვა 2008 წლის მოვლენები საქართველოში, ყირიმი – ორივე შავი ზღვის ტერიტორიაა და შემდეგ ომი უკრაინაში. 

ევროკავშირისა და საქართველოს ინტერესებისთვის, კავშირისთვის, მნიშვნელოვანია, ხელი შეეშალოს რუსეთს გახდეს ექსკლუზიური ძალა, რასაც ის ცდილობს. ეს მნიშვნელოვანია სამომავლოდაც, რადგან კომუნიკაცია გახდება ძალიან მნიშვნელოვანი მომავალ წლებში და ათწლეულებში ტრანსპორტის, ენერგიის უსაფრთხოებისთვის.” 

● “კითხვების მთავარი ადრესატი ივანიშვილია, ვინც რეალურად მართავს ქვეყანას” – პრეზიდენტის ბოლო ანგარიში პარლამენტს
● რა იყო ეს? – ექსპერტები საქართველოს პრეზიდენტის არშემდგარ იმპიჩმენტს აფასებენ
● მოსაზრება: ზურაბიშვილი საბოლოოდ გათავისუფლდა ბიძინა ივანიშვილის კომპლექსისგან და ყველაფერს დაარქვა თავისი სახელი

“ჩვენთვის ევროკავშირის გაფართოება ეგზისტენციალური საკითხია”

“დარწმუნებული ვარ, რომ იპოვით წარმოსახვასა და შემოქმედებითობას იმ პრობლემების გადასაჭრელად, რომლებიც ნამდვილად მნიშვნელოვანია: ერთსულოვნება, პროცედურები, რაც არის პირველი და უკანასკნელი, მაგრამ მინდა ვთქვა, რომ გაფართოება ჩვენთვის ეგზისტენციალურია, არ არის პროცედურული, მოწონების ან არ მოწონების საკითხი, არჩევანი არ გვაქვს.

მინდა გაგიზიაროთ, რომ გაფართოება დღეს თქვენთვისაც ეგზისტენციალურია, რადგან თუ შეხედავთ გლობალურ სურათს, იხილავთ იმას, რაც, ვფიქრობ, ზოგჯერ გვავიწყდება ხოლმე, რომ რუსეთი არა მხოლოდ შეიჭრა უკრაინაში და ყველა ჩვენს ქვეყანას კიბერთავდასხმებით, ჰიბრიდული ომით ემუქრება, არამედ სატელიტურ ომზეც გადადის, რამაც ჩვენი ქვეყნების კომუნიკაციასა და მთლიან ლოგისტიკას შეიძლება საფრთხე შეუქმნას. 

ამიტომ, ვფიქრობ, რომ ამ პრობლემების გადასაჭრელად გამოყენებულ წარმოსახვას ნავთი სჭირდება. ჩვენ შიგნით, ვგულისხმობ საქართველოს, რეფორმების ასაჩქარებლად მეტი უნდა გავაკეთოთ, მაგრამ ვერაფერი შეცვლის იმ ფაქტს, რომ ყველას ერთად არ გვაქვს ალტერნატივა, გარდა იმისა, რომ ვიყოთ ერთად, ვიყოთ ერთსულოვნად, ვიყოთ უფრო დემოკრატიულები და დავდგეთ დღეს იმ ავტოკრატიების ალიანსის წინააღმდეგ, რომლებიც ტერორიზმსა და კიბერთავდასხმებს აღვივებენ. ყველა საფრთხე ერთი მიმართულებიდან მოდის.” – განაცხადა სალომე ზურაბიშვილმა.

რა უძღოდა წინ სალომე ზურაბიშვილის მიუნხენში წასვლას

საქართველოს პარლამენტის თავმჯდომარე შალვა პაპუაშვილი სალომე ზურაბიშვილის მიუნხენის კონფერენციაზე ვიზიტთან დაკავშირებით აცხადებდა, რომ ზურაბიშვილს გული არ შესტკივა კონსტიტუციისთვის და თავს “ქვეყნის შვილად” არ მიიჩნევს. მისივე თქმით, სალომე ზურაბიშვილს საქართველო ჰგონია “საკუთარი რეზიდენციის უკანა ეზო.” როგორც პაპუაშვილმა აღნიშნა, სალომე ზურაბიშვილმა კიდევ ერთხელ დაარღვია კონსტიტუცია.

ზურაბიშვილის იმპიჩმენტის ინიციატივით გასული წლის პირველ სექტემბერს მმართველი პარტია, „ქართული ოცნება“ გამოვიდა და შესაბამისი პროცედურებიც დაიწყო. იმპიჩმენტის მიზეზად გამოცხადდა სწორედ ის, რომ პრეზიდენტმა უხეშად დაარღვია კონსტიტუცია, როდესაც მთავრობის თანხმობის გარეშე ევროპის ქვეყნებში რამდენიმე ვიზიტი განახორციელა.

პრეზიდენტის ვიზიტები მთავრობის მიერ მართლაც არ ყოფილა ვიზირებული. ამ ბრალდებას ზურაბიშვილმა უპასუხა იმით, რომ უცხოურ ვიზიტებში ის საკუთარი სახსრებით ჩავიდა და საზღვარგარეთ საქართველოსთვის ევროკავშირის კანდიდატის სტატუსის მინიჭებას ლობირებდა.

16 თებერვალს კი ცნობილი გახდა, რომ სალომე ზურაბიშვილის 2024 წლის დეკლარაციის მიხედვით, პრეზიდენტმა ევროპის ქვეყნებში ვიზიტების განსახორციელებლად პირადი სახსრებიდან 48 217 ლარი დახარჯა.