"მივდივარ ტრამპის ინაუგურაციაზე, მექნება მაღალი დონის შეხვედრები" - რა თქვა სალომე ზურაბიშვილმა
სალომე ზურაბიშვილი პრესკონფერენცია
საქართველოს მეხუთე პრეზიდენტი სალომე ზურაბიშვილი ადასტურებს, რომ აშშ-ის ახლად არჩეული პრეზიდენტის დონალდ ტრამპის ინაუგურაციაზე მიდის და ექნება მაღალი დონის შეხვედრები. ამის შესახებ მან ახალ ოფისში, ბრიფინგზე განაცხადა და აღნიშნა, რომ მოწვევა რესპუბლიკელი კონგრესმენისგან, ჯო უილსონისგან მიიღო.
“არავინ აღიარებს არჩევნებს და არავინ აღიარებს არჩევნებიდან გამოსულ არც მთავრობას, არც პარლამენტს და არც პრეზიდენტს. ეს ცხადია, კიდევ უფრო იზოლაციაში გვამყოფებს ჩვენ, მთლიანად ქვეყანას, მაგრამ ჩვენც გვაქვს საშუალებები, რომ გამოვიდეთ ამ იზოლაციიდან.
მე მაქვს ეს როლი და მე ამ როლს ვასრულებ სრულყოფილად. მაქვს, პრაქტიკულად, ყოველდღიური კავშირები ჩვენს უცხოელ პარტნიორებთან
თქვენ იცით და მე დღეს ახლა ამას ვადასტურებ, რომ მივდივარ პრეზიდენტ დონალდ ტრამპის ინაუგურაციაზე, ვაშინგტონში ვიქნები ჯო უილსონის დაპატიჟებით. იცით, რომ არის სხვადასხვა ვარიანტები მოწვევის ამ ინაუგურაციაზე, რომელშიც არავინ ფულს არ იხდის, სხვათა შორის. ეს რომ ყოფილიყო ამის საშუალება, ალბათ, სხვებსაც, ბევრს აქვს ჩემზე მეტი რესურსი, რომ გადაიხადოს მეტი თანხები, მაგრამ ეს ხუმრობა დავტოვოთ გვერდზე.
მთავარი ისაა, რომ მივდივარ იქ, მექნება მაღალი დონის შეხვედრები და ვაგრძელებთ ამ ურთიერთობებს ჩვენს პარტნიორებთან”, – თქვა პრეზიდენტმა.
მისი შეფასებით, მთავრობა და პარლამენტი არ არის ლეგიტიმური.
“ჩვენ ვართ მდგომარეობაში, როდესაც დე ფაქტო პარლამენტი, დე ფაქტო მთავრობა დღეს ცდილობს შექმნას მმართველობის სურათი, როცა რეალურად, ქვეყანა არის გაჩერებული. თვითონაც იმალებიან. იმალებიან არა მხოლოდ პარლამენტში ჩაკეტილი კარების მიღმა, არამედ მათი ყველა მოქმედება არის ასევე დამალული, არ არის ახსნილი და ზოგჯერ გატანილი არის ქალაქიდანაც, როგორც “ამბასადორიალის“ მაგალითით მოხდა.
ეს არის ძალიან სერიოზული და მძიმე სურათი. ყველა სხვა სახელმწიფო ინსტიტუტი არის ერთი პარტიის ხელში, ალბათ, დანიშნული არის ერთი პარტიის მიერ. ეს ეხება ყველაფერს, ანტიკორუფციულ ბიუროს, აუდიტს, ეროვნულ ბანკს, პერსონალურ მონაცემთან დაცვის სამსახურს
მან ასევე ისაუბრა “საზოგადოებრივ მაუწყებელზე“ და განაცხადა, რომ სახელმწიფო ტელევიზია “მატყუარა სურათს” გვაჩვენებს.
“პრაქტიკულად, ყველა გადაცემაში შეგვიძლია ვნახოთ, როგორ არის დამახინჯებული რეალობა, ეს არის ჩვენი რეალური სურათი“, – განაცხადა ზურაბიშვილმა.
ამასთან, საქართველოს მეხუთე პრეზიდენტის განმარტებით, დიდი ხანია ქართული სასამართლო არ წარმოადგენს მაგალითს, თუ როგორი უნდა იყოს დემოკრატიულ ქვეყანაში ნამდვილი სასამართლო.
“დღეს არათუ რეფორმა, სასამართლო აღარ არსებობს. ეს ძალიან ნათლად დავინახეთ არჩევნების დროს, როდესაც ერთის გარდა, არცერთმა სასამართლომ არ დააკმაყოფილა არაფერი, თუ არა ცესკო-ს მხარეს არსებული პოზიციები. სასამართლოს ყველა დონე არის ხალხისგან წართმეული და ამ ქვეყანაში სამართლიანობა ვერ მოიპოვება, რაც დემოკრატიული სისტემისთვის პრაქტიკულად, დაშლაა“, – თქვა ზურაბიშვილმა.
საქართველოს პარლამენტის შენობაში 29 დეკემბერს, “ქართული ოცნების” მიერ დანიშნული პრეზიდენტის, მიხეილ ყაველაშვილის ინაუგურაცია გაიმართა.
ყაველაშვილი პირველი პრეზიდენტია, რომელიც ხალხის მიერ არ არის არჩეული. მის ლეგიტიმურობას არ აღიარებს ოპოზიცია, სამოქალაქო საზოგადოება, საქართველოში მოქმედი არასამთავრობო ორგანიზაციები; მისთვის გამარჯვება არ მიულოცავთ არც საქართველოს დასავლელ პარტნიორებს.
ინაუგურაციის პარალელურად, სალომე ზურაბიშვილის მხარდასაჭერად, რომელსაც საზოგადოების დიდი ნაწილი ერთადერთ ლეგიტიმურ პრეზიდენტად მიიჩნევს, საქართველოს პრეზიდენტის ორბელიანების სასახლესთან დილიდან ათასობით ადამიანი შეიკრიბა.
