აზერბაიჯანში ყოფილ მინისტრს მილიარდი ევროს მითვისებაში ადანაშაულებენ
თანამდებობიდან გათავისუფლებული აზერბაიჯანის შრომისა და სოციალური დაცვის მინისტრი, სალიმ მუსლიმოვი სპეცსამსახურების თანამშრომლებმა დააკავეს. არსებული ინფორმაციით, მას ბრალად დიდი ოდენობით თანხის მითვისება ედება. მედიასაშუალებებმა გამოაქვეყნეს იმ ობიექტების სია, რომელიც ყოფილ მინისტრს ეკუთვნის.
- საავტორო უფლებები თუ უუფლებობა აზერბაიჯანში
- მოსკოვი თუ ბრიუსელი? რატომ აქვს ფაშინიანს პროდასავლური პოლიტიკოსის იმიჯი?
თანამდებობიდან 2018 წელს გათავისუფლებული სალიმ მუსლიმოვის დაკავების შესახებ ინფორმაცია დაადასტურეს როგორც მის ოჯახში, ისე სამართალდამცავ ორგანოებში.
გამოცემა sfera.az ამტკიცებს, რომ მუსლიმოვი კორუფციაშია ბრალდებული. მინისტრის პოსტზე მუშაობის დროს, მან 2 მილიარდ მანათზე (დაახლოებით, 1 მილიარდი ევრო) მეტი თანხა მიითვისა.
ასევე, ადგილობრივი მედიასაშუალებები აქვეყნებენ ბაქოში იმ ელიტარული ობიექტების სიას, რომლის მეპატრონეებიც თავად ექსმინისტრი და მისი ვაჟიშვილები არიან.
ამ ინფორმაციის თანახმად, ფეშენებელური სასახლის, ORION PALACE-ის მეპატრონე თავად სალიმ მუსლიმოვია.
ერთ-ერთი ელიტარული ობიექტი, რომელიც ყოფილ მინისტრ მუსლიმოვს ეკუთვნის
ამასთან, მას ეკუთვნის კომპანია ORION CONSTRUCTION-ი, რომელიც საცხოვრებელი სახლებისა და სხვა ობიექტების მშენებლობით არის დაკავებული.
ფირმა ORION CARS კი, რომელიც ასევე ყოფილ მინისტრს ეკუთვნის, აზერბაიჯანის დედაქალაქის სხვადასხვა უბანში ავტოსალონებს ქირაობს ძვირადღირებული ავტომობილების გასაყიდად.
კიდევ ერთი კომპანია ORİON CREATİVE SOLUTİONS – ადრე დარეგისტრირებული იყო მუსლიმოვის შვილის, თურგაი მუსლიმლის სახელზე, მაგრამ შემდეგ ფირმა მისი მეორე შვილის, ასიმა მუსლიმლის სახელზე გადაფორმდა.
სალიმ მუსლიმოვი ფლობს 60 ჰექტარის ფართობის პლანტაციებს აგსუნის რაიონში. ამ პლანტაციებში ნიორი მოჰყავთ. ამავე რეგიონშია განთავსებული ექსმინისტრის ვილა.
აღსანიშნავია, რომ ყველა მითითებული კომპანიის იურიდიული მისამართი ემთხვევა ყოფილი მინისტრის ვაჟიშვილის, თურგაი მუსლიმლის სახლის მისამართს. თურგაი მუსლიმლიმ უნივერსიტეტი ედინბურგში დაამთავრა, რის შემდეგაც ბიზნესით დაკავდა.
