"დემოკრატიულ მანდატს ვერ მოიპოვებთ ოპონენტების ციხეში ჩასმით ან ცენზურით" - სახელმწიფო დეპარტამენტი
სახელმწიფო დეპარტამენტის განცხადება
“დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე ვერ მოიპოვებთ მას, ძირითადი ელექტორატის პოზიციის უგულვებელყოფით, თუ ვინ უნდა გახდეს ჩვენი საერთო საზოგადოების ნაწილი” – გამოცემა globalnews.ge-ს ცნობით, ამერიკის შეერთებული შტატების სახელმწიფო დეპარტამენტმა გამოცემას საქართველოში არსებულ ვითარებასთან დაკავშირებით აშშ-ის პოზიციაზე წერილობით უპასუხა.
Globalnews.ge-მ სახელმწიფო დეპარტამენტის სპიკერს, ტემი ბრუსს, ბრიფინგზე ჰკითხა:
“გქონდათ თუ არა რაიმე კომუნიკაცია საქართველოში მმართველ პარტიასთან? და თუ ასეა, შეგიძლიათ გაგვიზიაროთ, რა ტიპის კომუნიკაცია არსებობს ახლა თქვენ შორის? როგორც იცით, საქართველოში ძალიან მძიმე ვითარებაა, ქართველი ხალხი და საერთაშორისო საზოგადოება არჩევნების შედეგებს არ აღიარებს. დაკავებულები არიან აქციების მშვიდობიანი მონაწილეები, ასევე, ამჟამად ციხეში დამოუკიდებელი ჟურნალისტი იმყოფება. სწორედ ამ გარემოებების გათვალისწინებით, როგორია თქვენი ხედვა საქართველოში არსებულ ვითარებასთან დაკავშირებით?”
გამოცემის მიერ გამოქვეყნებულ სახელმწიფო დეპარტამენტის პასუხი:
“ჩვენ განვაგრძობთ ჩვენი მიდგომის შეფასებას საქართველოს მიმართ ამერიკული ინტერესების წინსვლისთვის. აშშ-მა ნათლად დააფიქსირა ის ნაბიჯები, რომელთა გადადგმაც საქართველოს მთავრობას შეუძლია, რათა აჩვენოს, რომ სერიოზულად არის განწყობილი აშშ-თან ურთიერთობის გაუმჯობესებისთვის.
რაც შეეხება “ქართული ოცნების” მთავრობის მიერ განხორციელებულ განგრძობით ანტიდემოკრატიულ ქმედებებს – როგორც ვიცეპრეზიდენტმა ვენსმა მიუნხენში აღნიშნა, დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე ვერ მოიპოვებთ მას, ძირითადი ელექტორატის პოზიციის უგულებელყოფით, თუ ვინ უნდა გახდეს ჩვენი საერთო საზოგადოების ნაწილი. შეერთებული შტატები, 33 წლის განმავლობაში, საქართველოსა და ქართველი ხალხის პარტნიორია და ამ ხნის განმავლობაში ძლიერი მხარდამჭერი საქართველოს დამოუკიდებლობის, სუვერენიტეტისა და ტერიტორიული მთლიანობის საკითხებში”, – ნათქვამია სახელმწიფო დეპარტამენტისგან მიღებულ პასუხში, რომელსაც გამოცემა ავრცელებს.
აღსანიშნავია, რომ ეს არის პირველი კომენტარი საქართველოს შესახებ, რომელიც გაკეთდა ამერიკის შეერთებული შტატების ახალი ადმინისტრაციის მიერ.
მანამდე, 2024 წლის 24 ნოემბერს, აშშ-ს სახელმწიფო დეპარტამენტის გვერდზე გამოქვეყნდა განცხადება, რომელშიც ხაზგასმით იყო ნათქვამი, რომ ვაშინგტონი საქართველოსთან სტრატეგიულ პარტნიორობას “ქართული ოცნების” ანტიდემოკრატიული ნაბიჯების გამო წყვეტდა.
