საფრანგეთმა ბიძინა ივანიშვილს საპატიო ლეგიონის ორდენი მიანიჭა

საფრანგეთის პრეზიდენტმა ემანუელ მაკრონმა საქართველოს ყოფილ პრემიერ-მინისტრს და ამჟამად ქვეყნის არაფორმალურ მმართველს, ბიძინა ივანიშვილს, საპატიო ლეგიონის კავალერის ორდენი მიანიჭა.

განცხადება 2020 წლის 31 დეკემბრით თარიღდება.

საფრანგეთის მთავრობის განკარგულებაში აღნიშნულია, რომ ბოლო ერთი წლის განმავლობაში საფრანგეთი და სხვა ქვეყნები ჯანდაცვის სფეროში სერიოზულ კრიზისს წააწყდნენ კორონავირუსის პანდემიასთან დაკავშირებით.

სწორედ ამიტომ, ორდენით დაჯილდოებულთა დიდი ნაწილი პანდემიასთან ბრძოლაში შეტანილი წვლილისთვის შეირჩა.

განმარტებით ბარათში ასევე წერია, რომ ბიძინა ივანიშვილი საერთაშორისო საქველმოქმედო ფონდის დამფუძნებელია, რომელიც 40 წელია, საქველმოქმედო საქმიანობას სხვადასხვა კუთხით ეწევა.

ივანიშვილთან ერთად ჯილდო კიდევ რამდენიმე ათეულ ადამიანს გადაეცა.

____________________________________________________________________________

● რა იმალება ვარდისფერი ფლამინგოს უკან? რეპორტაჟი დენდროლოგიური პარკიდან

● რა თქვა ბიძინა ივანიშვილის უსაფრთხოების ყოფილმა უფროსმა “მთავარ არხთან” ინტერვიუში

● ოლიგარქის სოფელი. როგორ ცხოვრობენ ჭორვილაში დღეს?

______________________________________________________________________________

საპატიო ლეგიონის ორდენი (Ordre national de la Légion d’honneur) ნაპოლეონ ბონაპარტის მიერ შეიქმნა 1802 წლის 19 მაისს და მას შემდეგ გადაეცემა კაცობრიობის განვითარებაში განსაკუთრებული წვლილისთვის – როგორც სამოქალაქო, ასევე სამხედრო პირებს.

ეს არის საფრანგეთის უმაღლესი ჯილდო და მას საფრანგეთის პრეზიდენტი ანიჭებს სამხედრო და სამოქალაქო მიღწევებისთვის.

ორდენის დევიზია ”ღირსება და სამშობლო” (”Honneur et patrie”). ამ დროისთვის მას უკვე 92 ათასზე მეტი წევრი ჰყავს.

აღსანიშნავია, რომ თავის დროზე ორდენი მიღებული აქვს რამდენიმე საეჭვო რეპუტაციის ლიდერსაც – მათ შორის რუსეთის პრეზიდენტ ვლადიმირ პუტინს და მიანმარის ლიდერს აუნ სან სუ ჩის (რომელსაც ამჟამად ბრალი როჰინჯას ხალხის გენოციდში ედება), ასევე რუმინეთის დიქტატორს ნიკოლაე ჩაუშესკუს, თუმცა მისთვის ნაბოძები ჯილდო შემდეგში ანულირდა.

სალომე ზურაბიშვილის მილოცვა

ყოფილ პრემიერს საპატიო ჯილდოს მიღებას ულოცავს ამავე ორდენის მფლობელი, საქართველოს მეხუთე პრეზიდენეტი სალომე ზურაბიშვილი.

“გილოცავთ, კეთილი იყოს თქვენი მობრძანება საპატიო ლეგიონის ორდენოსანთან სიაში. თქვენი წვლილი დემოკრატიის, ასევე, საფრანგეთ-საქართველოს შორის კავშირების განვითარებაში, თქვენი მეცენატობა და თბილისის ფრანგული სკოლის დაარსება სათანადოდ იქნა აღიარებული”, — წერს პრეზიდენტი ტვიტერზე.