რუსული გამოცემა Vestnik Kavkaza-ს ცნობით, ახალი რუსული საკრუიზო გემის “პეტრე დიდის” საერთაშორისო მარშრუტი საქართველოსაც მოიცავს. გამოცემის მიხედვით, გემი შავ ზღვაში ნოვოროსიისკის, სოჭის, ბათუმისა და სტამბულის პორტებში გაჩერდება.
Vestnik Kavkaza რუსეთის კომუნიკაციებისა და ინფორმაციის ტექნოლოგიისა და მასმედიის ზედამხედველს (Roskomnadzor) დაქვემდებარებული რუსული გამოცემაა, სადაც რუსეთის გარდა კავკასიის ქვეყნებს, მათ შორის საქართველოს შესახებაც იდება სიახლეები.
вестник кавказа-ს მტკიცებით, გემი მოგზაურობას აგვისტოში დაიწყებს და პირველ რეისს მდინარე ვოლგაზე ვოლგოგრადისა და ასტრახანის გავლით შეასრულებს. გამოცემისვე ცნობით, “პეტრე დიდის” საერთაშორისო მარშრუტი სამ ზღვას დაფარავს, მომავალში კი საერთაშორისო კრუიზებიც დაიგეგმება, მათ შორის ყველაზე ხანგრძლივ 20-დღიან მოგზაურობისას გემის სტუმრები ეწვევიან საქართველოს, თურქეთს, აზერბაიჯანს, ყაზახეთსა და თურქმენეთს.
„გემი “პეტრე დიდი” რუსეთში აშენდა, კომფორტის კუთხით ის შეესაბამება 5-ვარსკვლავიან სასტუმროს. გემს აქვს კაბინები, რესტორანი, საცურაო აუზი, თეატრი. ერთდროულად დაახლოებით 300 ადამიანს შეეძლება გემით კრუიზზე წასვლა.“ – წერს გამოცემა.
вестник кавказа-ს ცნობამდე, რუსეთის სოჭის პორტის ადმინისტრაციის მიერ გავრცელდა ინფორმაცია, რომ ისინი საქართველოსთან და ოკუპირებული აფხაზეთის ხელისუფლებასთან აწარმოებენ მოლაპარაკებებს, მათ პორტებში მიმოსვლის დაწყებასთან დაკავშირებით. ამის შესახებ რუსეთის სამთავრობო-პროპაგანდისტულ მედიასთან სოჭის პორტის დირექტორმა, იური ვლადიმიროვმა ისაუბრა.
“საზღვაო გზით სამგზავრო გადაყვანის ახალ მიმართულებებზე ძალიან დიდი მოთხოვნაა. ვეცდებით ჩვენი ტურისტების მოთხოვნის დაკმაყოფილებას, რამდენადაც შესაძლებელი იქნება ამ მიმართულებით განვითარება.” – აღნიშნა ვლადიმიროვმა.
