"რუსთავი 2-ის" მოთხოვნა დროებითი ღონისძიების გაგრძელების შესახებ დაკმაყოფილდა

“რუსთავი 2” საქართველოს წინააღმდეგ – ტელეკომპანიის მოთხოვნა დროებითი ღონისძიების გაგრძელების შესახებ ევროპის ადამიანის უფლებათა სასამართლომ დააკმაყოფილა.

ევროპულმა სასამართლომ „რუსთავი 2“-ის საქმეზე საქართველოს უზენაესი სასამართლოს გადაწყვეტილება უვადოდ, საბოლოო გადაწყვეტილების გამოტანამდე შეაჩერა. შეტყობინება ამის შესახებ სტრასბურგიდან ტელეკომპანიის იურისტებმა მიიღეს.

“სტრასბურგის სასამართლოს განმხილველმა პალატამ ერთხმად გააგერძელა 3 მარტს მიღებული შეჩერების ღონისძიება უვადოდ. საქართველოს მთავრობას ეკრძალება, აღასრულოს უზენაესი სასამართლოს განჩინება იმ მომენტამდე, ვიდრე ამის უფლებას ევროპის ადამიანის უფლებათა სასამართლო არ მისცემს”, – განაცხადა ტელეკომპანიის დირექტორმა ნიკა გვარამიამ.

ნიკა გვარამიას თქმით, საქმე “რუსთავი 2 საქართველოს წინააღმდეგ”, შევიდა არამხოლოდ საქართველოს, არამედ ევროპის ისტორიაში. როგორც მან აღნიშნა,  ევროპელმა მოსამართლეებმა მოთხოვნა “ერთხმად დააკმაყოფილეს”:

“ერთხმად მხარდაჭერამ მოიტანა ის, რომ დღეს ევროპამ ჩვენ გადაგვარჩინა, მან გადაარჩინა ქართული დემოკრატია”, – განაცხადა გვარამიამ. მან მადლობა გადაუხადა საერთაშორისო და ადგილობრივ ორგანიზაციებს, მედიის წარმომადგენლებსა და პოლიტიკოსებს, რომელთა მხარდაჭერამაც, მისი თქმით, “რუსთავი 2” გადაარჩინა.

შეგახსენებთ, ევროპის ადამიანის უფლებათა სასამართლომ 3 მარტს შეაჩერა საქართველოს უზენაესი სასამართლოს გადაწყვეტილება “რუსთავი 2”-ის ქიბარ ხალვაშისთვის გადაცემის შესახებ.