"თქვენ ჩვენი რაღაც რესპუბლიკა იყავით" - რას ამბობენ რუსეთის მოქალაქეები, რომლებიც ბათუმში საკრუიზო ლაინერით შემოვიდნენ

რუსეთის მოქალაქეები ბათუმში

საკრუიზო ლაინერი Astoria Grande, რომელმაც მოგზაურობა სოჭის პორტიდან დაიწყო და რუსი ტურისტები გადაჰყავს, ბათუმშია. ტურისტების მოგზაურობის ფარგლებში იგეგმება სპეციალური საექსკურსიო ტური და ადგილობრივი სამზარეულოს დაგემოვნება.

მგზავრებმა ჟურნალისტებთან რამდენიმე კომენტარიც გააკეთეს. რას ამბობენ რუსეთის მოქალაქეები:

“ოკუპაციის შესახებ არ ვიცი, თქვენ ჩვენი რაღაც რესპუბლიკა იყავით, საკავშირო და არა ოკუპირებული. რუსეთი ოკუპანტი არ არის, ჩვენ რა, თქვენი ოკუპაცია მოვახდინეთ? ჩვენ გეხმარებოდით. აფხაზეთი ჩვენ თქვენგან გავათავისუფლეთ, მათ გვთხოვეს დახმარება. თქვენ ტანკებით შეხვედით იქ, ჩვენ ვნახეთ ეს ტანკები. მე ვიყავი აფხაზეთში და თავად ვნახე. ვისი ტერიტორიაა, არ ვიცი, მაგრამ ჩვენ არ დაგვიკავებია არც აფხაზეთი და არც საქართველო. ოსეთის შესახებ არაფერი ვიცი, ალბათ, ოსეთმა გვთხოვა დახმარება და ჩვენც დავეხმარეთ. რუსეთის მიერ საქართველოს ტერიტორიების ოკუპაციის შესახებ არაფერი ვიცი და რუსეთი არ არის ოკუპანტი”

“ბათუმში ბოლოს 1978-ში ვიყავით, ახლა ისტორიული ადგილები უნდა ვნახოთ. არ ვიცით, რომ რუსეთს საქართველოს ტერიტორიები აქვს ოკუპირებული, ყველგან საბჭოთა კავშირია. რას ამბობთ? რუსეთი არ არის ოკუპანტი. ჩვენ ყველა საბჭოთა კავშირი ვართ, ერთიანი, დიდი, ლამაზი ქვეყანა.”

“ოკუპაციის თემაზე კომენტარს არ გავაკეთებთ. ვიცი, მაგრამ არ ვისაუბრებთ. რუსეთი არ არის ოკუპანტი. აფხაზეთისა და ოსეთის პრობლემა, მოდით, თავად გადაწყვიტეთ.”

● “სანამ ჩვენ ვსწავლობთ, ისინი ფუძნდებიან” – საზღვაო სეზონი “ოკუპირებულ” ბათუმში
● უკრაინის ომის შემდეგ საქართველოს ეკონომიკა სულ უფრო დამოკიდებული ხდება რუსეთზე. ციფრები და ანალიზი
● „თუ საზღვარს ჩაკეტავენ, ერთადერთი გზა დარჩება – გზა ომში“ . რუსეთიდან გამოქცეულების ისტორიები

25 ივლისს ცნობილი გახდა, რომ 22 ივლისს საკრუიზო ლაინერმა Astoria Grande-მ სოჭიდან ახალი მარშრუტით მოგზაურობა დაიწყო, რომლის მიხედვითაც მეხუთე დღეს კრუიზი ბათუმის პორტშიც შევიდოდა. ინფორმაცია დაადასტურა საქართველოს საზღვაო ტრანსპორტის სააგენტომაც, რომლის განმარტებითაც, გემი თურქული საკრუიზო კომპანია Miray Cruises International-ს ემსახურება და მისი შემოსვლა კომერციული ხასიათისაა.

გამოცემა “ეხო კავკაზა” იუწყება, რომ კრუიზი ტურისტებს ბათუმის ღირსშესანიშნაობების დათვალიერებასა და ადგილობრივი სამზარეულოს გასინჯვას სთავაზობს. ამასთან, ლაინერის მენიუს ქართული ტრადიციული კერძებიც დაემატა.

Россия 1-ის რეპორტაჟში ნათქვამია, რომ ორგანიზატორების განმარტებით, ქართული კურორტები რეისის მიმართ ინტერესს მნიშვნელოვნად გაზრდის. “მით უმეტეს, არანაირი დამატებითი დოკუმენტის” გაფორმება მგზავრებს არ მოუწევთ.

აღსანიშნავია ისიც, რომ სოჭის პორტის ადმინისტრაცია 2023 წლის იანვარში ამბობდა, რომ საქართველოსთან და ოკუპირებული აფხაზეთის ხელისუფლებასთან აწარმოებდა მოლაპარაკებებს, მათ პორტებში მიმოსვლის დაწყების შესახებ. სოჭის პორტის დირექტორმა, იური ვლადიმიროვმა მაშინ აღნიშნა, რომ მგზავრობების დაწყებას 2023 წლის ზაფხულისთვის აპირებდნენ. ამ სიტყვებს გამოეხმაურა საქართველოს საზღვაო ტრანსპორტის სააგენტო, რომელმაც აღნიშნა, რომ “უცნობია, რაზე საუბრობს სოჭის პორტის ადმინისტრაცია”.