მოსკოვში ტაძარი პუტინისა და სტალინის სახეებით მოხატეს
მოსკოვის მახლობლად მშენებარე რუსეთის შეიარაღებული ძალების მთავარი ტაძრის კედლები მოზაიკით გააფორმეს, რომელზეც რუსეთის პრეზიდენტი და ხელისუფლების სხვა წარმომადგენლები არიან გამოსახული.
ცნობა ამის შესახებ თავდაპირველად გამოცემა МБХ Media– მ გაავრცელა და დაუსრულებელი მოზაიკის ფოტოებიც გამოაქვეყნა, რომლებიც გამოცემას უცნობმა პირმა გაუგზავნა – ტაძარში ახლა არავის უშვებენ.
მოგვიანებით, “ნოვაია გაზეტა”-მ ამ პანოების სრული გამოსახულება მოიპოვა.
დიდ პანოზე პრეზიდენტ პუტინისა და თავდაცვის მინისტრის სერგეი შოიგუს გვერდით გამოსახულები არიან: ფედერაციის საბჭოს თავმჯდომარე ვალენტინა მატვიენკო, სახელმწიფო სათათბიროს თავმჯდომარე ვიაჩესლავ ვოლოდინი, უშიშროების ფედერალური სამსახურის დირექტორი ალექსანდრ ბორტნიკოვი და შეიარაღებული ძალების გენერალური შტაბის უფროსი ვალერი გერასიმოვი.
ცალკე პანო მიეძღვნა 2014 წელს ყირიმის რუსეთთან შეერთებას (რომელსაც უკრაინა და საერთაშორისო თანამეგობრობა უკანონო ანექსიად მიჩნევენ) – აქ არიან გამოსახული რუსეთის ლიდერები, ყირიმში მხიარულ მაცხოვრებლებთან და რუს სამხედროებთან ერთად.
ტაძრის კედლებზე იოსებ სტალინიც გამოჩნდა – ფრესკაზე, რომელიც მეორე მსოფლიო ომში გამარჯვებას ეძღვნება. მასზე გამოსახულია საბჭოთა მარშლები და ჯარისკაცები წითელ მოედანზე, რომლებსაც ხელში უჭირავთ პლაკატი საბჭოთა ბელადის გამოსახულებით.
რუსეთის სახალხო მხატვარმა ვასილი ნესტერენკომ ფრესაკზე სტალინის გამოჩენა “ნოვაია გაზეტასთან” საუბრისას ასე ახსნა:
”აქ ასეთი აზრი იყო – ის იყო მნიშვნელოვანი ფიგურა დიდი სამამულო ომის დროს და მას ისტორიულ შეფასებას სხვა თაობები მისცემენ და არა ჩვენი.”
მხატვარმა პუტინისა და სხვა რუსი მაღალჩინოსნების ტაძრის კედელზე გამოსახვა “ქრისტიანული ტრადიციით” ახსნა, როდესაც ტაძრის ფრესკაზე გამოსახავენ ადამიანებს, რომლებმაც მისი მშენებლობისთვის საკუთარი სახსრები შემოწირეს.
