"რუსეთი ქართულ ოცნებას აფხაზურ საზოგადოებაზე ზეწოლის გასაძლიერებლად იყენებს" - თეონა აქუბარდია
რუსეთი ქართულ ოცნებას იყენებს
“ქართული ოცნების” მიერ საქართველოს პარლამენტში რუსული კანონის მიღება აძლიერებს რუსეთის ზეწოლას სოხუმის რეჟიმზე ბიჭვინთის სახელმწიფო აგარაკებთან დაკავშირებით მიღებულ კანონპროექტთან მიმართებით – ამის შესახებ საქართველოს პარლამენტის დეპუტატმა, თეონა აქუბარდიამ განაცხადა.
დეპუტატის შეფასებით, “ქართული ოცნების” პოლიტიკა დასავლეთთან ასუსტებს საქართველოს ინტერესებს, ხოლო მათი “ძალისხმევა რუსულ კანონთან მიმართებით, რუსეთის მხრიდან აფხაზურ საზოგადოებაზე ზეწოლის ბერკეტად” არის გამოყენებული.
“მედიაში ვრცელდება ინფორმაცია, რომ რუსეთი პოლიტიკური და ეკონომიკური ბერკეტების გამოყენებით აძლიერებს ზეწოლას აფხაზურ საზოგადოებაზე, რათა დე ფაქტო პარლამენტმა მიიღოს ე.წ. აგენტების კანონი (როგორც ეს თბილისში მოხდა).
ბუნებრივია, მაშინ, როცა ოცნებამ მიიღო რუსული კანონი, რუსეთი ახლა გაზრდის ზეწოლას აფხაზეთში პროტესტის შედეგად შეჩერებულ ე.წ. კანონპროექტის შესახებ აპარტჰოტელებზე და უცხოელ ინვესტორებზე, რასაც დიდი წინააღმდეგობა ჰქონდა წარსულში და შეჩერებული იყო.” – განაცხადა აქუბარდიამ.
მისი თქმით, რუსეთი აძლიერებს აფხაზეთის ანექსიისკენ გადადგმულ ნაბიჯებს, ხოლო ოცნების მთავრობა დასავლეთთან დაპირისპირებით კიდევ მეტად ასუსტებს ჩვენს ეროვნულ ინტერესებს.
როგორც აქუბარდია განმარტავს, ამ ვითარებაში “ქართული ოცნების” ძალისხმევა, რომელიც “თბილისში პროტესტის მიუხედავად მოხდა რუსულ კანონთან მიმართებაში” არის გამოყენებული რუსეთის მხრიდან აფხაზურ საზოგადოებაზე ზეწოლის ბერკეტად.
“ქართული ოცნება” დუმს, ისევე როგორც მთლიანად მთავრობა ანექსიურ პროცესებთან დაკავშირებით და მაშინ, როდესაც რუსეთი იყენებს ე.წ. რუსულ კანონს იმისთვის, რომ ეს ზეწოლა გააძლიეროს, ჩვენ საქმე გვაქვს საქართველოს სუვერენიტეტის და საქართველოს ინტერესების დამატებით საფრთხეებთან.
დასავლეთისგან იზოლაციის პროცესში ქართული ოცნების პოლიტიკის შედეგად, კიდევ უფრო ძლიერდება რუსეთის პოზიციები, როგორც ოფიციალურ თბილისზე, ისე ოკუპირებულ აფხაზეთზე და ამ ვითარებაში, საფრთხე ექნება ჩვენს მიზანს რეალური სუვერენიტეტის და მშვიდობიანად ქვეყნის გამთლიანების შესახებ ევროპულ ოჯახში წევრობით”. – თქვა თეონა აქუბარდიამ.
მიმდინარე წლის 14 თებერვალს, აფხაზეთის მედიებში გავრცელდა ცნობა, რომ ე.წ. საგარეო საქმეთა სამინისტრომ რუსეთის საგარეო საქმეთა სამინისტროსგან მიიღო საპროტესტო ნოტა, რომელიც ბიჭვინთის სახელმწიფო აგარაკებთან დაკავშირებით მიღებულ კანონში შეტანილ ცვლილებას ეხება.
აფხაზეთის პარლამენტმა, 2023 წლის 27 დეკემბერს რიგგარეშე სხდომაზე მოახდინა რუსეთისთვის ბიჭვინთის სახელმწიფო აგარაკების გადაცემის ხელშეკრულების რატიფიკაცია.
გარდა ამისა, აფხაზმა დეპუტატებმა შეთანხმებაში შეიტანეს შეზღუდვა, რომელიც მესამე პირებზე ობიექტების, აკვატორიის მონაკვეთის, მიწის ნაკვეთების, აშენებული შენობებისა და ნაგებობების გადაცემას კრძალავს.
ამავე შეთანხმების მიხედვით, აკრძალულია ობიექტებისა და ნაკვეთების გადაცემა ხელშეკრულების დენონსაციის შემთხვევაში – აფხაზეთის ოპოზიციის ნაწილმა, ამ ცვლილებების ფონზე დოკუმენტის მიღებას მხარი დაუჭირა.
