"როსნეფტის" მონოპოლიის გამო აფხაზეთში საწვავის კრიზისია
როსნეფტის მონოპოლია
2023 წლის დეკემბრის შუა რიცხვებიდან, რუსეთის მთავრობის გადაწყვეტილებით, სახელმწიფო კომპანია “როსნეფტი” გახდა საწვავის ერთადერთი მიმწოდებელი აფხაზეთსა და ე.წ. სამხრეთ ოსეთში.
სოხუმი საწვავის მწვავე კრიზისს განიცდის. რადგან რუსული საბაჟო არ უშვებს აფხაზური კომპანიების მიერ სხვა მიმწოდებლებისგან შეძენილ ნავთობპროდუქტებს სოხუმში, მათ მიერ უკვე შესყიდული ბენზინით და დიზელით სავსე რეზერვუარები საზღვარზე დგანან – აფხაზეთში ბევრი ბენზინგასამართი სადგური დაკეტილია ან შეზღუდულ რეჟიმში მუშაობს.
- „აფხაზეთის სუვერენიტეტის დათმობის ღამე“. მოსაზრება აფხაზეთიდან ბიჭვინთის აგარაკზე
- როგორ დაარტყა ცხინვალს რუსეთიდან ექსპორტირებულ საქონელზე საბაჟო გადასახადის ზრდამ
აფხაზეთის საწვავის ბაზრის უმსხვილესი მოთამაშე, კომპანია AZiD, აცხადებს, რომ უკვე რამდენიმე კვირაა ვერ ახერხებენ ნორმალურად ფუნქციონირებას:
“მომარაგების საკითხი არ მოგვარებულა, გადახდილი და დეკლარირებული საწვავის მოცულობა 2023 წლის 21 დეკემბრიდან უმოქმედოდ დგას საზღვარზე, ბენზინგასამართი სადგურები არ მუშაობს.“
„AZiD“ ღიად მიანიშნებს, რომ ვინმე აუცილებლად აგებს პასუხს არსებულ ვითარებაზე:
„ჩვენ ყურადღებით ვაკვირდებით აფხაზეთის საწვავის ბაზარზე ყველა მონაწილისა და აქტორის ქმედებებს. დღესასწაულები გაივლის, კითხვები დარჩება და აუცილებლად იპოვის თავის ადრესატს“.
აფხაზეთის ეკონომიკის სამინისტროში აცხადებენ, რომ რუსეთის მთავრობის გადაწყვეტილება, მიენიჭებინა “როსნეფტისთვის” სოხუმში ნავთობპროდუქტების იმპორტის ექსკლუზიური უფლებები, მათთვისაც კი მოულოდნელი იყო. სამინისტროს ხელმძღვანელმა კრისტინა ოზგანმა განაცხადა, რომ რუს კოლეგებთან კონსულტაციებს მართავს შექმნილი სიტუაციიდან გამოსავლის მოსაძებნად.
მაგრამ საწვავის ასოციაციას ნამდვილად არ სჯერა, რომ მინისტრმა არ იცოდა რუსეთის გეგმების შესახებ, რადგან მთავრობაში მოსვლამდე თავად კრისტინა ოზგანი ხელმძღვანელობდა იმავე “როსნეფტ-აფხაზეთს.”
ვერსია, რომ მოსკოვის გადაწყვეტილება მოულოდნელი იყო, უარყოფენ სამხრეთ ოსეთშიც. სამხრეთ ოსეთის ე.წ. მთავრობის წყაროებიდან ჟურნალისტის, მურატ გეკემუხოვის მიერ მიღებული ინფორმაციის თანახმად, მონოპოლიური მიწოდების საკითხი მოსკოვთან ჯერ კიდევ 2023 წლის ივნის-ივლისში განიხილებოდა. და, როგორც ჟურნალისტი ამბობს, მაშინ აფხაზეთის ხელისუფლება ახალ პირობებს დათანხმდა, სამხრეთ ოსეთის ხელისუფლება კი წინააღმდეგი იყო.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
