რა გამოხმაურება მოჰყვა მედვედევის პოსტს, სადაც ეწერა, რომ საქართველო რუსეთის ნაწილი უნდა გახდეს
მედვედევის პოსტი
რუსულ სოციალურ ქსელ VKontakte-ში 2 აგვისტოს გაჩნდა დმიტრი მედვედევის პოსტი, სადაც რუსეთის უშიშროების საბჭოს თავმჯდომარის მოადგილე წერდა, რომ საქართველო რუსეთის ნაწილი უნდა გახდეს და ყაზახეთში ადგილი ჰქონდა რუსების გენოციდს. პოსტი რამდენიმე წუთში გაქრა, მედვედევის ასისტენტმა კი განაცხადა, რომ სოციალურ ქსელში გამოქვეყნებული პოსტი მას არ ეკუთვნის და მისი “გვერდი გატეხეს”.
საქართველოში ამბობენ, რომ ეს განცხადება თუ შემდეგ გაკეთებული განმარტებები კიდევ ერთხელ ადასტურებს, თუ რა რთულ კორიდორში და რა ბეწვის ხიდზე უწევს საქართველოს გავლა რთულ რეგიონში.
თუმცა მედვედევის ე.წ. სქრინშოტები მოგვიანებით ჟურნალისტმა, ქსენია სობჩაკმა გაავრცელა.
პოსტში ეწერა, რომ საბჭოთა კავშირის ყოფილი ქვეყნები, “კვლავ ერთად იცხოვრებენ”. ასევე, ხაზგასმული იყო, რომ რუსეთმა ამ გზით მოძრაობა უკვე დაიწყო, ამისთვის კი ისინი “ძალასა და საშუალებებს არ დაზოგავდნენ”.
“მაგალითად, საქართველო შემოერთებამდე საერთოდ არ არსებობდა. 1801 წლისთვის დღევანდელი საქართველოს ტერიტორია შედგებოდა ხუთი სუვერენული პოლიტიკური წარმონაქმნისგან: ქართლი და კახეთი დედაქალაქით თბილისში, იმერეთი დედაქალაქით ქუთაისში, ორი სათავადო – სამეგრელო და გურია შავი ზღვის ნაპირებზე, სვანეთის სათავადო მთიან რაიონებში. ანუ, საქართველო ამჟამინდელ საზღვრებში მხოლოდ რუსეთის იმპერიის ფარგლებში შეიქმნა. საქართველო რუსეთისკენ მიიწევდა, რადგან მას ესმოდა: ის იყო მისი ერთადერთი მოკავშირე მუსლიმური სახელმწიფოების საკმაოდ მტრულ გარემოცვაში. ახლაც იგივე ისტორია მეორდება. ჩრდილოეთ და სამხრეთ ოსეთი, აფხაზეთი და საქართველოს დანარჩენი ტერიტორია საქართველოს შემადგენლობაში გაერთიანება მხოლოდ რუსეთთან საერთო სახელმწიფოს შემადგენლობაშია შესაძლებელი.” – ეწერა პოსტში.
აღსანიშნავია, რომ მედვედევს ე.წ. სამხრეთ ოსეთთან ერთად ნახსენები ჰყავდა ჩრდილოეთ ოსეთი, რომელიც ამჟამად რუსეთის ფედერაციული ერთეულია.
პოსტში ეჭვქვეშ იყო დაყენებული ყაზახეთის სახელმწიფოებრიობაც და პირდაპირ ეწერა, რომ “ყაზახეთი ხელოვნური სახელმწიფოა”, რომელიც “ყოფილი რუსული ტერიტორიებია”.
გამოხმაურება
არჩილ თალაკვაძე, “ქართული ოცნების” ერთ-ერთი ლიდერი: “საქართველოს არსებობის ხუთი ათასწლიანი ისტორია აქვს და ამ ისტორიას ვერავინ გადაწერს. ეს განცხადება თუ შემდეგ გაკეთებული განმარტებები კიდევ ერთხელ ადასტურებს, თუ რა რთულ კორიდორში და რა ბეწვის ხიდზე უწევს საქართველოს გავლა რთულ რეგიონში, საფრთხეებითა და გამოწვევებით სავსე დროში, როცა ყველა მხრიდან საქართველოს მშვიდობას კონკრეტული საფრთხეები ემუქრება, მათ შორის რუსეთი აგრძელებს საქართველოს უკანონო ოკუპაციას.”
გიგა ბოკერია, ოპოზიციური პარტია “ევროპული საქართველოს” თავმჯდომარე: “არ ვიცი გაუტეხეს, მთვრალმა დაწერა თუ რაღაც სხვა, შესაძლოა მართლაც ვინმემ გაუტეხა და დაუწერა, ოღონდ აქ იმაშია საქმე, რომ რაც ამ განცხადებაში კომპაქტურად და კიდევ უფრო მკვეთრად წერია, ყველაფერი ეს პუტინს, მედვედევსა და მათ პროპაგანდას სხვადასხვა ეტაპზე ნათქვამი აქვთ.”
ჯუანშერ ბურჭულაძე, საქართველოს თავდაცვის მინისტრი: “წავიდა მედვედევი – წარსულია.”
ზურაბ აბაშიძე, რუსეთთან ურთიერთობის საკითხებში პრემიერმინისტრის სპეციალური წარმომადგენელი: ““რაც მე ვნახე, იყო პოსტი, შემდეგ წაშალეს და უარყვეს, თქვეს, რომ საიტი გატეხეს.”
ჟურნალისტის კითხვაზე, აპირებს თუ არა ის კარასინთან ამ თემაზე საუბარს, ზურაბ აბაშიძემ უპასუხა: “არა, არ ვაპირებ.”
მაიკლ გალერი, ევროპარლამენტარი: “ბოლო დასავლელებიც უნდა შეეშვან ამ რუსულ რეჟიმთან ჩვეულ ურთიერთობებში დაბრუნების ილუზიებს, როცა მედვედევის საუბარს უსმენენ, რომ ყაზახეთი და საქართველო ხელოვნური სახელმწიფოებია. ერთადერთი ხელოვნური კონსტრუქცია კოლონიური საბჭოთა რუსეთის იმპერია იყო. აღარასდროს!”
დავით არახამია, უკრაინის რადაში “ხალხის მსახურის” ფრაქციის თავმჯდომარე: “საქართველოს მცდელობა, დაუახლოვდეს აგრესორს, კიდევ უფრო დიდ ტერიტორიულ დანაკარგებს გამოიწვევს, მაგრამ თბილისის პრორუსულ ხელისუფლებას ეს ჯერ კიდევ არ ესმის. რუსი ოლიგარქის, ბიძინა ივანიშვილის პოლიტიკა, რომელიც აგრძელებს ბიზნესის კეთებას სანქციების გვერდის ავლით და საქართველოს ხელისუფლების, რომელიც აგრესორთან ერთად თამაშობს, მხოლოდ იმას გამოიწვევს, რომ შემდეგი საქართველო იქნება. მოსკოვში კი ამას აღარ მალავენ. ამიტომ დეოლიგარქიზაცია ქართველი ხალხის ნომერ პირველი მიზანი უნდა გახდეს, ეს არის ერთადერთი შესაძლებლობა ევროპაში შესასვლელად და არა რუსი აგრესორის ხელში აღმოსაჩენად.”
