მწერალთა სახლის ხელმძღვანელად ქეთევან დუმბაძის დანიშვნას კინემატოგრაფისტებიც აპროტესტებენ

ქეთევან დუმბაძის დანიშვნას კინემატოგრაფისტებიც აპროტესტებენ

მწერალთა სახლის ხელმძღვანელად “ქართული ოცნების” დეპუტატის, ქეთევან დუმბაძის დანიშვნასთან დაკავშირებით მწერლებისა და გამომცემლების პროტესტს კინემატოგრაფისტების მოძრაობაც შეუერთდა. ქეთევან დუმბაძე ცნობილი ქართველი მწერლის, ნოდარ დუმბაძის შვილია და მან მარტში ე.წ. რუსულ კანონს მისცა ხმა.

მწერლებმა და გამომცემლებმა მწერალთა სახლის ხელმძღვანელად ქართული ოცნების დეპუტატ ქეთევან დუმბაძის დანიშვნასთან დაკავშირებით ერთობლივი განცხადება გაავრცელეს და აღნიშნეს, რომ მინისტრის მიერ მიღებული გადაწყვეტილება, პარტიული კუთვნილების ნიშნით შეარჩიოს და ერთპიროვნულად, დახურულ კარს მიღმა დანიშნოს ისეთი ინსტიტუციის ხელმძღვანელი, როგორიცაა მწერალთა სახლი, კატეგორიულად მიუღებელია. 

მათი თქმით, ისინი დაუმორჩილებლობას უცხადებენ კულტურის სამინისტროს პოლიტიკას, რომელიც არადემოკრატიულ, საბჭოთა, ანტისახელმწიფოებრივ ხასიათს ატარებს. 

კინემატოგრაფისტები მწერლებთან და გამომცემლებთან ერთად დაუმორჩილებლობას უცხადებენ “კულტურის სამინისტროს რეპრესიულ, ანტიდემოკრატიულ და ანტისახელმწიფოებრივ პოლიტიკას” და ამბობენ, რომ დუმბაძის მწერალთა სახლის ხელმძღვანელად დანიშვნა კულტურის ინსტიტუციის მიზანმიმართული მოშლის მორიგი მცდელობაა.

“კინემატოგრაფისტების მოძრაობა უერთდება ქართველი მწერლების პროტესტს: დაუმორჩილებლობა კულტურის სამინისტროს რეპრესიულ, ანტიდემოკრატიულ და ანტისახელმწიფოებრივ პოლიტიკას!

 ჩვენ კიდევ ერთხელ გავხდით მოწმე კულტურის ყველა დარჩენილი ინსტიტუციის მიზანმიმართული მოშლის მცდელობისა და მმართველების ერთპიროვნული ხელდასხმის.

 არ დავუშვებთ კულტურის მიტაცებას, ცენზურის ნორმალიზებას და საბჭოთა ტიპის რეპრესიების დაბრუნებას ჩვენს ქვეყანაში.

 ჩვენ ამ ბრძოლაში ვართ და ვიქნებით ერთიანი და უკომპრომისო!

 ხელოვნება ცოცხალი, დამოუკიდებელი და პოლიტიკურია.” – წერია კინემატოგრაფისტების განცხადებაში.

● მწერლების, მთარგმნელებისა და გამომცემლების წერილი: მხარს ვუჭერთ კინოს პროფესიონალებს
● თეა წულუკიანი: მინდა მკაცრად, ხმამაღლა და პრინციპულად დავგმო აშშ-ს გადაწყვეტილება
● SJC: თეა წულუკიანის საკადრო წმენდისას გათავისუფლებულმა თანამშრომელმა სასამართლო დავა მოიგო

აგვისტოს დასაწყისში მწერალთა სახლის ხელმძღვანელმა ნატაშა ლომოურმა განაცხადა, რომ კულტურის სამინისტროდან დაურეკეს და უთხრეს, რომ 5 დღეში დირექტორობის ვადა ეწურება. ლომოური ფეისბუქზე წერდა, რომ სამინისტროს წერილობით უკვე აცნობა, რომ ვადის გაგრძელებით იყო დაინტერესებული.

მანამდე კულტურის მინისტრის, თეა წულუკიანის ე.წ. რეორგანიზაციას და წმენდას საქართველოს ეროვნული მუზეუმის თანამშრომლები შეეწირნენ – რამდენიმე მათგანს სამსახურის დატოვება მოუწია, თუმცა მოგიანებით მათ წულუკიანის წინააღმდეგ სასამართლოში სარჩელი მოიგეს და კულტურის სამინისტროს ფულადი ანაზღაურება დაეკისრა, თუმცა მათი სამსახურებში აღდგენა აღარ მომხდარა.

11 ივნისს კი ცნობილი გახდა, რომ კულტურის სამინისტრომ კინოცენტრის უფროსის მოადგილის, ნინო კუხალაშვილის შტატი გააუქმა და 12 ივლისიდან თანამდებობიდან გაათავისუფლა, ხოლო დირექტორის მოვალეობის შემსრულებლად კობა ხუბუნაია დანიშნა, რომელიც ამავე დროს კულტურის სამინისტროს ეკონომიკური დეპარტამენტის უფროსიცაა.

კობა ხუბუნაია 2021 წელს დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის მოადგილე იყო, მანამდე კი იუსტიციის სამინისტროს მმართველობის სფეროში შემავალ აღსრულების ეროვნულ ბიუროში საფინანსო საკითხებში ეკონომიკური სამსახურის მრჩეველი.

მოგვიანებით ცნობილი გახდა, რომ კინოცენტრის კინოწარმოების დეპარტამენტის დირექტორის მოადგილედ სახელისუფლებო პროპაგანდისტული არხის, POSTV-ის ჟურნალისტი, ბაჩო ოდიშარია დანიშნეს, რომელმაც რეორგანიზაციის შესახებ დააანონსა.

● ქართულმა კინოაკადემიამ ფილმი, რომელიც ივანიშვილის ხეებს ეხება, ჩვენებებიდან მოხსნა
● “სიკვდილი ხალხის მტრებს, სამშობლოს გამყიდველებს” – პროტესტი წულუკიანის წინააღმდეგ