ბიძინა ივანიშვილი პირველი ნომერია - "ქართულმა ოცნებამ" საარჩევნო სიის პირველი ოცეული წარადგინა
“ქართულმა ოცნებამ” საარჩევნო სიის პირველი ოცეული წარადგინა
“ქართული ოცნების” 2024 წლის საარჩევნო სიის ნაწილი ცნობილია. მმართველმა გუნდმა პარტიის ოფისში გამართულ ღონისძიებაზე დღეს პირველი ოცეული წარადგინა.
სიის სათავეში ქართული ოცნების საპატიო თავმჯდომარე ბიძინა ივანიშვილია.
სიის შემადგენლობა ასეთია:
1. ბიძინა ივანიშვილი (პარტიის საპატიო თავმჯდომარე, ქვეყნის არაფორმალური მმართველი)
2. ირაკლი კობახიძე (საქართველოს მოქმედი პრემიერმინისტრი)
3. ირაკლი ღარიბაშვილი (“ქართული ოცნების” თავმჯდომარე)
4. შალვა პაპუაშვილი (პარლამენტის თავმჯდომარე)
5. მამუკა მდინარაძე (“ქართული ოცნების” აღმასრულებელი მდივანი)
6. თეა წულუკიანი (საქართველოს კულტურის მინისტრი)
7. ლაშა ტალახაძე (ძალოსანი; სამგზის ოლიმპიური, შვიდგზის მსოფლიო და შვიდგზის ევროპის ჩემპიონი)
8. ვახტანგ თურნავა (თანამედროვე ტექნოლოგიების სპეციალისტი)
9. მაკა ბოჭორიშვილი (პარლამენტის წევრი, ევროინტეგრაციის კომიტეტის თავმჯდომარე)
10. გენო პეტრიაშვილი (მოჭიდავე, ოლიმპიური ჩემპიონი 2024)
11. სოზარ სუბარი (“ხალხის ძალა”, ყოფილი სახალხო დამცველი)
12. მარიამ ქვრივიშვილი (ტურიზმის დეპარტამენტის უფროსი)
13. ანრი ოხანაშვილი (პარლამენტის იურიდიული კომიტეტის თავმჯდომარე)
14. ნიკოლოზ სამხარაძე (პარლამენტის საგარეო ურთიერთობის კომიტეტის თავმჯდომარე)
15. ეკა ჭიჭინაძე (კულტურის მუშაკი)
16. შოთა ბერეკაშვილი (დეველოპერი)
17. ლევან მახაშვილი (პარლამენტის თავმჯდომარის კაბინეტის უფროსი)
18. მიხეილ ყაველაშვილი (“ხალხის ძალა”, ყოფილი ფეხბურთელი)
19. გიორგი გაბუნია (ანზორ ერქომაიშვილის ცენტრის ხელმძღვანელი)
20. ლიკა შარტავა (საქართველოს ეროვნული გმირის, ჟიული შარტავას შვილიშვილი; ჟურნალისტი)
“როგორც ხედავთ, ჩვენი საარჩევნო სიის ოცეული შედგება პოლიტიკური გუნდის სტაჟიანი და ახალი წევრებისგან, ახალი სახეებისგან, ყველა ასაკის წარმომადგენლებისგან, სხვადასხვა სფეროში მოღვაწე წარმატებული ადამიანებისგან“, – აღნიშნა საქართველოს პრემიერმინისტრმა, ირაკლი კობახიძემ საარჩევნო სიის ოცეულის წარდგენის შემდეგ.
ამასთან, ირაკლი კობახიძემ განაცხადა, რომ 26 ოქტომბრის არჩევნები არ არის უბრალო არჩევნები.
“ეს არის გადამწყვეტი რეფერენდუმი, სადაც საზოგადოებამ საბოლოოდ უნდა გადაწყვიტოს, ირჩევს ომს, თუ მშვიდობას, ირჩევს საზოგადოების მორალურ გადაგვარებას, თუ ტრადიციულ ფასეულობებს, ირჩევს ბნელ წარსულს, თუ საქართველოს ნათელ, ევროპულ მომავალს. დარწმუნებული ვართ, ქართველი ხალხის მხარდაჭერით გაიმარჯვებს ჩვენი პოლიტიკური გუნდი, რაც საქართველოში მშვიდობის, ღირსების, კეთილდღეობისა და საქართველოს ნათელი, ევროპული მომავლის გამარჯვებას ნიშნავს. კიდევ ერთხელ შეგახსენებთ, 26 ჩვენი დღეა და 26 ოქტომბერს აუცილებლად საქართვjaელო გაიმარჯვებს.“ – განაცხადა კობახიძემ.
დასავლელი ლიდერების თქმით, საქართველოს ხელისუფლებამ გადაუხვია დემოკრატიის გზას, შეჩერებულია მისი ევროკავშირში ინტეგრაციის პროცესი
საქართველოს დასავლელმა პარტნიორებმა, მათ შორის შეერთებულმა შტატებმა, ევროკავშირმა და ევროპული სახელმწიფოების ლიდერებმა, არაერთხელ დაგმეს საქართველოს ხელისუფლების ანტიდასავლური პოლიტიკა და შეურაცხმყოფელი რიტორიკა. განსაკუთრებული აღშფოთება გამოიწვია უცხოური გავლენის გამჭვირვალობის შესახებ კანონის მიღებამ, რომელსაც ხალხში რუსულ კანონს უწოდებენ.
შეერთებულმა შტატებმა საქართველოს მმართველი პარტიისა და მთავრობის წარმომადგენლებისთვის სავიზო შეზღუდვები დააწესა.
27 ივნისს ევროპულმა საბჭომ განაცხადა, რომ შეაჩერა საქართველოს ევროკავშირში გაწევრიანების პროცესი.
შეერთებული შტატები, ევროკავშირი, ნატო და ევროკავშირის წევრი ქვეყნები ერთმანეთის მიყოლებით წყვეტენ საქართველოსთვის ფინანსური დახმარების გაწევას. ეს ასევე შეეხო საქართველოს დახმარებას სამხედრო სფეროში, მათ შორის შეჩერდა ერთობლივი სამხედრო წვრთნები.
9 სექტემბერს ამერიკის ხმასთან ინტერვიუში აშშ-ის სახელმწიფო მდივნის თანაშემწემ ჯეიმს ო’ბრაიენმა განაცხადა, რომ მმართველი პარტია ცდილობს დაარწმუნოს ქვეყნის მოქალაქეები, რომ ქვეყანაში ყველაფერი რიგზეა, მაგრამ ეს ასე არ არის.
“ქართული ოცნება” საქართველოს ევროპისკენ ვერ წაიყვანს.”- განაცხადა ო’ბრაიენმა.
