"ქართული ოცნების" საარჩევნო პროგრამა. მთავარი მოკლედ

“ქართული ოცნების” საარჩევნო პროგრამა

“ქართული ოცნების” საარჩევნო პროგრამა საქართველოს პრემიერმა ირაკლი კობახიძემ წარადგინა.

პირველი, რაც ჟურნალისტებს თვალში მოხვდათ იყო ის, რომ ღონისძიებას, რომელიც საათზე ცოტა მეტხანს გაგრძელდა, არ ესწრებოდნენ პარტიის საპატიო თავმჯდომარე ბიძინა ივანიშვილი და თავმჯდომარე ირაკლი ღარიბაშვილი.

თვალშისაცემი იყო ასევე პროგრამის გენერალური ხაზი – ყოველი სფეროს განხილვის დროს, იქნებოდა ეს ეკონომიკა, ჯანდაცვა თუ ტურიზმი და ა.ს., შედარება ხდებოდა 2012 წელთან ამუ 12 წლის წინანდელ მდგომარეობასთან. ხოლო დაპირებების დიდი ნაწილის შესრულება 2028 წლისთვის დაიგეგმა.

მთავარი, რაც თქვა პრემნიერმა პროგრამის პრეზენტაციის დროს:

ეკონომიკა

● მინიმუმ 130 მილიარდ ლარამდე გაიზრდება ეკონომიკა 2028 წლისთვის, რასაც მოჰყვება ქვეყნის ბიუჯეტის პირდაპირპროპორციული ზრდა.

● 2028 წლისთვის “ქართულ ოცნებას” აქვს “ამბიციური ამოცანა” და ქვეყნის ბიუჯეტი 50 მილიარდ ლარს გადააჭარბებს.

● “დღევანდელი მდგომარეობით, გავანახევრეთ უმუშევრობა 2012 წლის შემდეგ”… “გვაქვს ამბიციური და აბსოლუტურად რეალისტური ამოცანა”, 4%-მდე შევამცირონ მისი მაჩვენებელი. “ეს არის საშუალო ევროპულ მაჩვენებელზე დაბალი”, – დასძინა კობახიძემ.

ინფრასტრუქტურა

● “მომავალ წელს თბილისიდან ბათუმამდე გახსნილი იქნება 4-ზოლიანი ავტომაგისტრალი. დაგვრჩება ერთი მცირე მონაკვეთი, ქობულეთის შემოვლითი გზა, დაემატება 2-ზოლიანი გზა და საბოლოო ჯამში, მაგისტრალი გახდება 4-ზოლიანი. დაიწყება ბათუმი-სარფის მონაკვეთის მშენებლობა.

● გამომდინარე იქიდან, რომ ვმუშაობთ ანაკლიის პორტის განვითარებაზე, დაგვჭირდება საგანგებო გზის გაჭრა ანაკლიამდე.

● კობახიძემ კიდევ ერთხელ დაადასტურა, რომ ანაკლიაში პორტის მშენებლობა მალე დაიწყება. მისი თქმით, ანაკლიის პორტი პირველ გემებს 2029 წელს მიიღებს.

“იწყება ანაკლიის პორტის მშენებლობის სამუშაოები, გაფორმდა ხელშეკრულება ჩინურ-სინგაპურულ კონსორციუმთან, ასევე ბელგიური კომპანია დაიწყებს უშუალოდ პორტის გაღრმავებაზე მუშაობას. ამ პროექტის პირველი ფაზა 2029 წელს დასრულდება, პირველ გემებს ანაკლიის პორტი სწორედ 2029 წლისთვის მიიღებს. წელიწადში 600 000 კონტეინერი იქნება გამტარობა, 600 მილიონი დოლარის ინვესტიცია ჩაიდება მხოლოდ პირველ ფაზაში”.

● აღმოსავლეთ საქართველო – დაგეგმილია აზერბაიჯანისა და სომხეთის საზღვრებთან დამაკავშირებელი მაგისტრალების დასრულება; კახეთის მონაკვეთზე დასრულებულია თბილისი-საგარეჯოს 4-ზოლიანი ავტომაგისტრალის მშენებლობა; დაიწყება ლაგოდეხის შემოვლითი გზის მშენებლობა; ასევე დაიწყება და დასრულდება თბილისი-რუსთავის 4-ზოლიანი მაგისტრალი”.

● კიდევ ერთი მსხვილი ინფრასტრუქტურული დაპირებაა ახალი აეროპორტის აშენება ვაზიანში. აეროპორტს წელიწადში 18 მილიონ მგზავრის მიიღება შეეძლება.

სოფლის მეურნეობა

● 2028 წლამდე იგეგმება 3 მილიარდი ლარის გამოყოფა სოფლის მეურნეობისთვის.

“ყბადაღებული თემა იყო ბატონი ბიძინა ივანიშვილის დაპირება, რომ მილიარდი მოხმარებოდა სოფლის აღორძინებას. არათუ მილიარდზეა საუბარი, წლების განმავლობაში მრავალი მილიარდი მოხმარდა სოფლის აღორძინებას და მარტო შემდეგი ოთხი წლის განმავლობაში დამატებით 3 მილიარდი მოხმარდება. ანუ ძალიან დიდი გადაჭარბებით შესრულდა ეს დაპირება”, – განაცხადა კობახიძემ.

ენერგეტიკა

● კობახიძის თქმით, “ქართულ ოცნებას” აქვს ამბიციური მიზანი, რომ 2030 წლისთვის საქართველო გახდეს სრულად თვითკმარი და დამოუკიდებელი ქვეყანა ენერგეტიკული თვალსაზრისით.

● კობახიძის თქმით, ბოლო 12 წლის განმავლობაში აშენდა 63 ჰესი, 2 თბოელექტროსადგური და 1 ქარის ელექტროსადგური.

● “2012 წლისთვის 3359 მეგავატს შეადგენდა გენერაცია ქვეყანაში, 2024 წლისთვის 4600 მეგავატამდე იზრდება. 2028 წლისთვის გამომუშავება გადააჭარბებს 8000 მგვტ-ს. 2030 წლისთვის 10 000 მეგავატს გადასცდება გამომუშავება”, – ირწმუნება კობახიძე.

სოციალური პაკეტი – ხელფასები, პენსიები, ჯანდაცვა

● “ქართული ოცნება”, არჩევნებში გამარჯვების შემთხვევაში, ხელფასის ზრდას ჰპირდება საბავშვო ბაღებისა და ასევე სახელოვნებო და სპორტული სკოლების პერსონალს.

“ბოლო წლებში უზრუნველყოფილი იყო ხელფასების 10%-იანი ზრდა და მომავალ წელსაც გაგრძელდება ხელფასების ზრდა. სტანდარტული ზრდის გარდა, პირველი იანვრიდან დაგეგმილია საბავშვო ბაღების პერსონალისთვის 100 ლარით ხელფასების ზრდა, იგივე ეხება სახელოვნებო და სპორტული სკოლების პერსონალს”, – თქვა კობახიძემ პროგრამის წარდგენისას.

● პრემიერის თქმით, “ქართული ოცნების” გამარჯვების შემთხვევაში გაიზრდება პენსიაც. მისი თქმით, “ეკონომიკური ზრდა გვაძლევს საშუალებას”, 350/450 ლარამდე გაიზარდოს პენსიები.

● პრემიერ-მინისტრის დაპირებით, “აუცილებლად აშენდება” ახალი რესპუბლიკური საავადმყოფო და უახლოეს მომავალში გეგმავენ მისი კონცეფციის პრეზენტაციას.

განათლება

● განათლების სფეროზე საუბრისას ირაკლი კობახიძემ თქვა, რომ დაგეგმილია მნიშვნელოვნად გაფართოვდეს ქუთაისის საერთაშორისო უნივერსიტეტის ინფრასტრუქტურა.

“ჩვენი ამოცანაა, 20 000-ს გადასცდეს სტუდენტების რაოდენობა. ქუთაისის საერთაშორისო უნივერსიტეტი უნდა გახდეს თანაბარი მნიშვნელობის კერა საუნივერსიტეტო განათლების მისაღებად ჩვენს ქვეყანაში. გვაქვს დაპირება ბატონი ბიძინა ივანიშვილისგან, რომ მისი მხრიდან სერიოზული ინვესტიცია იქნება ჩადებული ამ პროექტის განსახორციელებლად”, – თქვა მან.

● პრემიერის თქმით, თბილისსა და რუსთავს შორის თბილისის სახელმწიფო უნივერსიტეტის ახალი კამპუსის აშენება იგეგმება.

კულტურა და სპორტი

● “ქართული ოცნება” აცხადებს, რომ არჩევნებში გამარჯვების შემთხვევაში, სახელმწიფო ბიუჯეტში გამოყოფს 30 მილიონს, რომელიც ხელოვანთა და ხელოვნების მხარდაჭერას მოხმარდება.

● კიდევ ერთი დაპირებაა, გაიზარდოს სპორტის დაფინანსება და 2 მილიარდი გამოიყოს ინფრასტრუქტურისთვის.

● დაპირებებს შორისაა აშენდეს ახალი, 70 000 მაყურებელზე გათვლილი სტადიონი თბილისისთვის “რათა 2028 წლისთვის ვუმასპინძლოთ ჩემპიონთა ლიგას. ახალი სტადიონი იქნება სრულად ადაპტირებული როგორც ფეხბურთის, ასევე რაგბისთვის და იქნება საკონცერტო ინფრასტრუქტურა”, – თქვა კობახიძემ.

თავდაცვა

“ქართული ოცნება”, არჩევნებში გამარჯვების შემთხვევაში, გეგმავს ეროვნული სამხედრო მრეწველობის განვითარებას, ასევე სამხედროებისა და პოლიციელების სოციალურ მხარდაჭერას.

● “ინვესტიციები ჩაიდება ეროვნულ სამხედრო მრეწველობაში. “ინფრასტრუქტურის განვითარება და სამხედრო ბაზები ჩვენი გეგმის მნიშვნელოვანი ნაწილია” – თქვა კობახიძემ.

● პოლიციელების სოციალური პირობების გაუმჯობესება – 1000-ზე მეტი პოლიციელი მიიღებს ბინებს ახალაშენებულ კორპუსებში”.

●სამხედროების სოციალური მხარდაჭერა – განსაკუთრებულ ყურადღებას ვუთმობთ “ჯარის ქალაქს” – 1000-ზე მეტი სამხედრო დაკმაყოფილდება შემდეგ წლებში საცხოვრებელი ბინებით.

საგარეო პოლიტიკა

“აშშ-სთან და ევროკავშირთან ურთიერთობების გადატვირთვა, ასევე რუსეთთან პრაგმატული პოლიტიკა და კონფლიქტის მშვიდობიანი დარეგულირება”, კობახიძის თქმით, ეს არის საგარეო პოლიტიკის მიმართულებით გადასადგმელი ძირითადი ნაბიჯები.

● უმნიშვნელოვანესი ეროვნული ამოცანაა აშშ-სთან და ევროკავშირთან ურთიერთობების გადატვირთვა, განაცხადა კობახიძემ.

“ჩვენ, ბუნებრივია, არ მოგვწონს ურთიერთობების ის მდგომარეობა, რომელიც გვაქვს. დარწმუნებული ვართ, მომავალ წელს, მას შემდეგ, რაც დასრულდება ომი უკრაინაში, შემხვედრი ნაბიჯებიც იქნება გადადგმული, რაც უზრუნველყოფს ურთიერთობების გადატვირთვას”

● ევროინტეგრაცია რჩება საგარეო პრიორიტეტად – 2030 წლისთვის საქართველო კანდიდატ ქვეყნებს შორის ყველაზე მეტად იქნება მზად გასაწევრიანებლად.

“2028 წლისთვის გვაქვს გეგმა, რომ 90%-ს გადააჭარბოს ასოცირების შეთანხმებით გათვალისწინებული ვალდებულების შესრულებამ, ხოლო DCFTA-თ გათვალისწინებული ვალდებულებების 90% იქნება შესრულებული 2028 წლისთვის”.

● ნატოსთან თანამშრომლობის გაღრმავება უმთავრესი პრიორიტეტია.

● ჩინეთთან სტრატეგიული პარტნიორობის გაღრმავებას დიდი მნიშვნელობა აქვს როგორც ეკონომიკური, ისე პოლიტიკური თვალსაზრისით.

● პრაგმატული პოლიტიკა, რუსეთთან კონფლიქტის მშვიდობიანი დარეგულირება – ესეც ერთ-ერთი უმთავრესი პრიორიტეტია”.

საქართველოში საპარლამენტო არჩევნები 26 ოქტომბერს გაიმართება. დეპუტატებს მხოლოდ პროპორციული სისტემით აირჩევენ. პარლამენტის წევრთა მანდატები განაწილდება იმ პოლიტიკურ პარტიებზე, რომლებიც 5%-იან ბარიერს გადალახავენ.

საპარლამენტო არჩევნებისთვის პარტიების ბლოკებად გაერთიანება აკრძალულია, ერთადერთი გზა არჩევნებში მათი ერთად მონაწილეობისთვის არის საერთო საარჩევნო სიის შექმნა. საარჩევნო სიაში შეიძლება აღმოჩნდეს მხოლოდ არჩევნებში მონაწილე პარტიის წევრი ანდა უპარტიო პოლიტიკოსი.