„ქართული ოცნება ეყრდნობა შავ ფულს", - ჰელსინკის კომისია
გაზიარება
გაზიარება
ქართული ოცნება ეყრდნობა შავ ფულს
“ქართული ოცნების” მიერ შავი ფულის გამოყენების შესახებ განცხადება გაავრცელა აშშ-ის “ევროპის უსაფრთხოებისა და თანამშრომლობის კომისიამ”, იგივე ჰელსინკის კომისიამ. განცხადება პლატფორმა X-ზე გამოქვეყნდა.
„ქართული ოცნება ეყრდნობა შავ ფულს მსოფლიოს სხვადასხვა წერტილში მდებარე თაღლითური ქოლ-ცენტრების ქსელიდან, რათა დააფინანსოს თავისი ქმედებები და დევნოს ოპოზიცია.
სახელმწიფო დეპარტამენტმა უნდა მიხედოს ამ ქოლ-ცენტრებს, რომლებიც ასპონსორებენ “ოცნების” ანტიდემოკრატიულ კამპანიას ქართველი ხალხის წინააღმდეგ“, – წერია განცხადებაში.
?? Georgian Dream relies on dark money from a network of scam call centers around the world to fund its operations & harass its opposition.@StateDept should crack down on these call centers that sponsor Georgian Dream's antidemocratic campaign against the Georgian people.
ჰელსინკის კომისიის განცხადებას გამოეხმაურნენ ოპოზიციისა და “ქართული ოცნების” წარმომადგენლები. მმართველი გუნდის დეპუტატმა ბექა ოდიშარიამ ჰელსინკის კომისიის განცხადებას “მტკნარი სიცრუე” უწოდა.
„არ ვიცი ჰელსინკის ჯგუფს რა ამოცანები და მიზნები აქვს, როდესაც ასეთ მტკნარ სიცრუეს ტირაჟირებს. კიდევ ერთხელ ვიმეორებ, თავს ვიკავებ, რომ უფრო მკვახედ არ მოვიხსენიო მათი ეს საქციელი. ყველაზე რბილი იქნებოდა გაუაზრებლობა და ინფორმაციის არ ქონა, მაგრამ ეჭვი მაქვს, ერთიც აქვს და მეორეც და უბრალოდ, სულ სხვა მიზანი აქვთ. “მიზანი” ერთია და ნათელი, საქართველო რამენაირად იყოს დადანაშაულებული, მშვიდობისმყოფელი ხელისუფლება შეიცვალოს და მოვიდეს ხელის ბიჭების და გოგოების ხროვა, რომელიც ნებისმიერ დავალებას შეასრულებს გარედან ბრძანებულს”,- განაცხადა ოდიშარიამ.
ოპოზიციურმა გაერთიანებამ “ძლიერი საქართველო” განცხადება გამოაქვეყნა და აღნიშნა, რომ ადამიანების ძარცვა არის „ქართული ოცნების“ და ბიძინა ივანიშვილის ხელწერა.
“ეს უკვე საერთაშორისოდ აღიარებული ფაქტია. ჰელსინკის კომისიამ დაადასტურა, რომ ივანიშვილი საქართველოში ცდილობს დემოკრატიული პროცესის გაუქმებას, სწორედ კრიმინალური გზით – არალეგალური „ქოლ-ცენტრებით“ მოპოვებული სახსრებით”, – ვკითხულობთ ოპოზიციური გაერთიანების განცხადებაში.
„ქართული ოცნებისა“ და ქოლცენტრების კავშირზე ჰელსინკის კომისიის წევრი ამერიკელი კონგრესმენების წერილშიც იყო საუბარი 2024 წლის 31 ივლისს. კონგრესმენებმა აშშ-ის სახელმწიფო მდივანს ენტონი ბლინკენს მიმართეს და ბიძინა ივანიშვილისა და მისი გარემოცვისთვის სანქციები მოითხოვეს.
აშშ-ის ჰელსინკის კომისია ხელს უწყობს ადამიანის უფლებების დაცვას, სამხედრო უსაფრთხოებას და ეკონომიკურ თანამშრომლობას ევროპის, ევრაზიისა და ჩრდილოეთ ამერიკის 57 ქვეყანაში.
ე.წ. ქოლცენტრები კი საქართველოში და სხვა ქვეყნებშია გამოვლენილი. იქ დასაქმებული პირები ევროპისა და აშშ-ის მცხოვრებლებს უკავშირდებიან, თავს ფინანსურ კონსულტანტებად ასაღებენ და კლიენტებს მათი ჩადებული თანხის უკან დაბრუნებას ჰპირდებიან; თანხის მიღების შემდეგ კი ქრებიან.
ქოლცენტრების შესახებ გამოძიება მოამზადა ბი-ბი-სიმ და დავით კეზერაშვილს დასდო ბრალი ქოლცენტრების მფლობელობაში.
საქართველოში ქოლ-ცენტრების დახურვის შესახებ ინფორმაციას ბოლო დროს აქტიურად ავრცელებს სხვადასხვა საგამოძიებო სამსახური. პოლიტიკოსები ოპოზიციიდან და მმართველი პარტიიდან კი ერთმანეთს ადანაშაულებენ ქოლცენტრებთან კავშირში. თუმცა პარლამენტში „ქოლ-ცენტრებზე“ საგამოძიებო კომისიის შექმნას „ქართულმა ოცნებამ“ გასული წლის მაისში მხარი არ დაუჭირა.
