საქართველომ იტალია და ესპანეთი ჩააჩოჩა და რუსეთში ღვინის მთავარი მიმწოდებელი გახდა
ქართული ღვინო რუსეთში
საქართველო პირველ ადგილზეა რუსეთში ღვინის მიწოდების მხრივ – წერს რუსული გამოცემა “კომერსანტი”.
სტატიაში აღნიშნულია, რომ ქართული ღვინოები აგრძელებენ პოზიციების განმტკიცებას რუსულ ბაზარზე პირდაპირი იმპორტის გზით. მიმდინარე წლის პირველ ხუთ თვეში მიწოდება 63%-ით გაიზარდა და 24,15 მლნ ლიტრს მიაღწია, რამაც საქართველოს საშუალება მისცა გამხდარიყო ღვინის პირველი ექსპორტიორი რუსეთში. მანამდე ამ პოზიციაზე ესპანეთი და იტალია იყვნენ.
ღვინის სავაჭრო კომპანია Fort-ის აღმასრულებელი დირექტორი ალექსანდრე ლიპილინი ამბობს, რომ იმპორტმა საქართველოდან 2022 წლის ბოლოს დაიწყო ზრდა და ამის მიზეზია ის, რომ არ არსებობს გადახდისა და ლოგისტიკის პრობლემები.
მისი თქმით, ქართული ღვინის წილის ზრდა დაბალ და საშუალო ფასების სეგმენტში განპირობებულია იმით, რომ საცალო ქსელები საკუთარი იმპორტით დაკავდნენ, გადავიდნენ პირდაპირ კონტრაქტებზე მწარმოებლებთან და შეუძლიათ თაროზე მინიმალური ფასის შეთავაზება.
