კულტურის სფეროს წარმომადგენლები მოუწოდებენ დეპუტატებს, უნდობლობა გამოუცხადონ თეა წულუკიანს

პროტესტი წულუკიანის წინააღმდეგ

კულტურის სფეროს წარმომადგენლები საქართველოს პარლამენტის დეპუტატებს მიმართავენ და მოუწოდებენ, უნდობლობა გამოუცხადონ კულტურის მინისტრ თეა წულუკიანს და მოითხოვონ, რომ უწყების საქმიანობა სახელმწიფო აუდიტის სამსახურმა შეისწავლოს.

ასევე დღეს, 5 თებერვალს, 19:00 საათზე, პარლამენტის უკანა შესასვლელთან ხელოვნების სფეროს წარმომადგენელთა აქცია გაიმართება, რომლის მონაწილეები დეპუტატებს ქუჩიდანაც მოუწოდებენ, არ გამოუცხადონ ნდობა მთავრობის ახალ შემადგენლობას, სადაც კულტურის მინისტრი კვლავ თეა წულუკიანი იქნება.

საქართველოს პარლამენტი მთავრობისთვის ნდობის გამოცხადების საკითხს მიმდინარე კვირაში განიხილავს. მთავრობის შემადგენლობაში კულტურის მინისტრად კვლავ თეა წულუკიანია წარდგენილი.

● კინემატოგრაფისტების ნაწილი კინოცენტრს ბოიკოტს უცხადებს
● მწერლების, მთარგმნელებისა და გამომცემლების წერილი: მხარს ვუჭერთ კინოს პროფესიონალებს
● ქართულმა კინოაკადემიამ ფილმი, რომელიც ივანიშვილის ხეებს ეხება, ჩვენებებიდან მოხსნა

კულტურის სფეროს წარმომადგენლების მიმართვა

მიმართვის ავტორების თქმით, თეა წულუკიანის სისტემაში დატოვებით დეპუტატები ხელს მოაწერენ ქვეყნის კულტურული იდენტობის შეუქცევად განადგურებას, კეთილსინდისიერი პროფესიონალებისთვის გამოცხადებულ ტერორს და ქვეყნის სრულ კულტურულ იზოლაციას. მათი განმარტებით, წულუკიანი მეორედ არ უნდა დაინიშნოს მინისტრად, რადგან:

• ნადგურდება გელათი!

• ნადგურდება არქეოლოგიური ძეგლები!

• მეცნიერებს არ ეძლევათ პროფესიული საქმიანობის შესრულების შესაძლებლობა!

• არ წყდება ხელოვანებზე თავდასხმა!

• სხვადასხვა სფეროდან ასობით პროფესიონალს ბოიკოტში ყოფნა უწევს!

• საგანმანათლებლო სივრცეები კარგავენ ავტონომიას!

• კინოცენტრის ბიუჯეტი იფლანგება პარტიის პროპაგანდისტების ბერლინში ვოიაჟისთვის!

• ფერხდება ლიტერატურული პროცესები!

• უკანონოდ ათავისუფლებენ დასაქმებულებს და სამინისტრო შრომით დავებს აგებს!

• სამეცნიერო და სახელოვნებო სფეროებში დარგის სპეციალისტებს ანაცვლებენ პენიტენციური სისტემის კადრებით!

მივმართავთ პარლამენტის წევრებს, თითოეული თქვენგანი ვალდებული ხართ, მოითხოვოთ, რომ სამინისტროს საქმიანობა შეისწავლოს სახელმწიფო აუდიტმა. თქვენ ვალდებული ხართ, გამოუცხადოთ უნდობლობა თეა წულუკიანს! თუ კულტურის სფეროსთვის მის მიერ მიყენებული ზიანის გრძელი ჩამონათვალი თქვენთვის უმნიშვნელოა, გამოიჩინეთ პრაგმატიზმი, რადგან გაზაფხული ცხელი იქნება”, – ნათქვამია კულტურის სფეროს წარმომადგენლების მიმართვაში.

პროტესტი წულუკიანის წინააღმდეგ. წინაისტორია

11 ივნისს კინოცენტრის დირექტორის მოადგილემ ნინო კუხალაშვილმა განაცხადა, რომ კულტურის სამინისტრომ მისი შტატი გააუქმა და 12 ივლისიდან გათავისუფლებულია თანამდებობიდან. როგორც კუხალაშვილმა აღნიშნა,  წულუკიანმა რეორგანიზაცია დაიწყო, კინოცენტრის დებულებაში ცვლილებები შეიტანა, ხოლო დირექტორის მოვალეობის შემსრულებლად კობა ხუბუნაია დანიშნა, რომელიც ამავე დროს კულტურის სამინისტროს ეკონომიკური დეპარტამენტის უფროსიცაა.

კინემატოგრაფისტების პროტესტს ქართველი მწერლები, მთარგმნელები და გამომცემლებიც შეუერთდნენ. მათი თქმით, კინოცენტრის პროფესიონალ თანამშრომლებს სასჯელაღსრულების ოფიცრებითა და საეჭვო გამოცდილების, პოლიტიკურად ანგაჟირებული ხალხით ანაცვლებენ.

მანამდე კულტურის მინისტრის, თეა წულუკიანის ე.წ. რეორგანიზაციას და წმენდას საქართველოს ეროვნული მუზეუმის თანამშრომლები შეეწირნენ – რამდენიმე მათგანს სამსახურის დატოვება მოუწია, თუმცა მოგვიანებით მათ წულუკიანის წინააღმდეგ სასამართლოში სარჩელი მოიგეს და კულტურის სამინისტროს ფულადი ანაზღაურება დაეკისრა, თუმცა მათი სამსახურებში აღდგენა აღარ მომხდარა.

ბოლო მოვლენები კი მწერალთა სახლს უკავშირდება, რომლის ხელმძღვანელად კულტურის მინისტრმა “ქართული ოცნების” დეპუტატი ქეთევან დუმბაძე დანიშნა, მოქმედი ხელმძღვანელი ნატაშა ლომოური კი გაათავისუფლა. დუმბაძე ერთ-ერთია მათ შორის ვინც მარტში, ე.წ. რუსულ კანონს მხარი დაუჭირა.

მწერალთა სახლის ხელმძღვანელად “ქართული ოცნების” დეპუტატის დანიშვნასთან დაკავშირებით მწერლებისა და გამომცემლების პროტესტს კინემატოგრაფისტების მოძრაობაც შეუერთდა. კინემატოგრაფისტები მწერლებთან და გამომცემლებთან ერთად დაუმორჩილებლობას უცხადებენ “კულტურის სამინისტროს რეპრესიულ, ანტიდემოკრატიულ და ანტისახელმწიფოებრივ პოლიტიკას” და ამბობენ, რომ დუმბაძის მწერალთა სახლის ხელმძღვანელად დანიშვნა კულტურის ინსტიტუციის მიზანმიმართული მოშლის მორიგი მცდელობაა.