"რა სკანდალი ნახეთ?" - აშშ-დან დაბრუნების შემდეგ, პრემიერის პირველი კომენტარები ბოლო დროს განვითარებულ მოვლენებზე

პრემიერის პირველი კომენტარი

საქართველოს პრემიერმინისტრმა ირაკლი ღარიბაშვილმა აშშ-დან დაბრუნების შემდეგ ქვეყანაში არსებულ ვითარებაზე პირველი კომენტარები გააკეთა.

რა თქვა ირაკლი ღარიბაშვილმა:

ლავროვის განცხადებაზე

რუსეთის საგარეო საქმეთა მინისტრის, სერგეი ლავროვის თქმით, საქართველოს მოქალაქეებისთვის სავიზო რეჟიმის გაუქმება და ფრენების აღდგენა პრემიერმინისტრი ირაკლი ღარიბაშვილის მთავრობასთან შეათანხმეს. გასულ თვეებში “ქართულ ოცნებაში” ირწმუნებოდნენ, რომ მოსკოვის გადაწყვეტილება ცალმხრივი იყო.

ამის შესახებ ღარიბაშვილი ამბობს: “ძალიან მარტივადაა საქმე, ამას პატარა ბავშვი მიხვდება, ჯერ ერთი შეგახსენებთ, რომ რუსეთის პრეზიდენტმა თქვა, რომ ეს იყო მისი ერთპიროვნული გადაწყვეტილება – უვიზო რეჟიმის და ფრენების გადაწყვეტილება, დღეს რაც თქვა ლავროვმა, ეს არის ფაქტის კონსტატაცია, რა თქმა უნდა, მოხდა გაფორმება ამ შეთანხმების საქართველოს მთავრობასთან, ეკონომიკის სამინისტროს ავიაციის სააგენტო ბუნებრივია, თანხმობას აძლევს შესაბამის უწყებას და რუსულ კომპანიებს, ამ შეთანხმებაზეა საუბარი და რა არის ამაში გაუგებარი, რა სკანდალი ნახეთ, რა აღმოაჩინეთ?“

● “თქვენ ჩვენი რაღაც რესპუბლიკა იყავით” – რას ამბობენ რუსეთის მოქალაქეები, რომლებიც ბათუმში საკრუიზო ლაინერით შემოვიდნენ
● “თქვენ აქ არავინ გელოდებათ!” – როგორ დახვდნენ თბილისში პირველ რეისს მოსკოვიდან. ფოტორეპორტაჟი და კომენტარები

ევროკავშირის კანდიდატის სტატუსზე

“ჩემი გზავნილი არის ცალსახა და მარტივი: ქვეყანა გატარებული რეფორმების გათვალისწინებით, მიღწეული პროგრესის და ამ რთული გეოპოლიტიკური ვითარების გათვალისწინებით იმსახურებს კანდიდატის სტატუსს, მე ეს მათ მკაფიოდ ვუთხარი, სხვა შემთხვევაში, მათ ვუთხარი, რომ ეს იქნება მორიგი სტრატეგიული შეცდომა ევროკავშირის და უბრალოდ ძალიან უსამართლობა მოპყრობა ჩვენი ქვეყნის და ხალხის მიმართ.

მე ეს ბატონ ბორელთან პრესკონფერენციაზე შემთხვევით არ მითქვამს, ქართველებს მართლაც არ გვიყვარს და აბსოლუტურად მიუღებელია უსამართლო მოპყრობა და ჩვენ ამას არ შევეგუებით, ისევე როგორც მიუღებელია მცდელობა, რომ ჩვენ ვიღაცამ დაგვჩაგროს და რაღაც მეორე და მესამე, უკანა პლანზე დაგვსვას, რატომ, იმიტომ, რომ ე.წ ტრიოს ფორმატში ყოველთვის და იყო და არის დღესაც მოწინავე პოზიციებზე, შედარება არ შეიძლება, იმდენად წინ ვართ ჩვენ

საკმაოდ პოზიტიური სიგნალები მოდის ევროპიდან. მე არ მინდა, მოვლენებს წინ გავუსწრო, მაგრამ მე ვფიქრობ, რომ ბოლო რამდენიმე პუნქტი, რაც დაგვიტოვა ბორელის გუნდმა, ბოლო დაზუსტებები, ამაზეც იცით, რომ ირაკლი კობახიძე გამოვიდა და თქვა, რომ ამ ყველაფერს ვასრულებთ და შევასრულებთ, ეს პროცესი დაიხურება თვის ბოლომდე. არავითარი მიზეზი არ ექნებათ, თუ რატომ არ უნდა მივიღოთ კანდიდატის სტატუსი.”

● პაველ ჰერჩინსკი: ჩვენ მოველით პროგრესს დეოლიგარქიზაციასთან, სასამართლოსთან და მედიის თავისუფლებასთან დაკავშირებით
● ევროკავშირის კომისარი: საქართველომ 12 პრიორიტეტიდან 3 შეასრულა, ახლა ყოველი წუთი მნიშვნელოვანია
● ორი აზრი: უნდა მისცენ თუ არა საქართველოს ევროკავშირის წევრობის კანდიდატის სტატუსი “ქართული ოცნების” პირობებში?

სახელმწიფო გადატრიალების მცდელობაზე

“სუს-ს აქვს იმაზე მეტი ინფორმაცია, რაც ამ ეტაპზე მიზანშეწონილად იქნა ჩათვლილი, რომ გაზიარებულიყო საზოგადოებისთვის.

ის, რომ გარკვეული რადიკალური ჯგუფები დესტაბილიზაციას, არეულობას და ქაოსის შემოტანას ცდილობენ და ცდილობდნენ, ეს არ არის ახალი ამბავი. რა თქმა უნდა, ეს ადამიანები და მე ვგულისხმობ ყოფილ პრეზიდენტ სააკავშვილს და მისი რადიკალური, ანარქისტული ჯგუფების ჩართულობით გარკვეული არეულობის მოწყობის მცდელობას საქართველოში. 

მათ ეს არასდროს გამოუვიდათ, არც გამოუვათ. ჩვენ არ დავუშვებთ ვიღაც არარაობებმა და ქვეყნის მტრებმა – ქვეყნის შიგნით, თუ გარეთ მოქმედმა მტრებმა, ქვეყანაში რაიმე ტიპის არეულობა შემოიტანოს. ყველა დაისჯება სამაგალითოდ, დაიმახსოვროს ეს ყველამ კარგად. რა თქმა უნდა, სუს-ი და ჩვენი სპეცსამსახურები აკონტროლებენ სიტუაციას, ნებისიერი გადაცდომა იქნება დაფიქსირებული, ამაზე იქნება ჩვენი მხრიდან ძალიან მკაცრი რეაგირება.”

საქართველოს უსაფრთხოების სამსახურმა 18 სექტემბერს გამოაქვეყნა განცხადებას, სადაც აღნიშნულია, რომ საქართველოში უკრაინული ევრომაიდნის სცენარის გამეორება და ხელისუფლების ძალადობრივად შეცვლა იგეგმება.

გეგმის ავტორად დასახელებულია უკრაინის სამხედრო დაზვერვის ხელმძღვანელის მოადგილე გიორგი ლორთქიფანიძე, რომელიც სააკაშვილის ხელისუფლების დროს შინაგან საქმეთა მინისტრის, ვანო მერაბიშვილის მოადგილე იყო;

ექს-პრეზიდენტ მიხეილ სააკაშვილის დაცვის ყოფილი წევრი მიხეილ ბატურინი;

სააკაშვილის ახლო გარემოცვის წევრი, უკრაინაში მოქმედი „ქართული ლეგიონის“ მეთაური მამუკა მამულაშვილი.

● მამუკა მამულაშვილი სუს-ის განცხადებაზე: რუსული ხელწერაა და დაკავშირებულია ჩვენს საქმიანობასთან
● ვახტანგ ძაბირაძის კომენტარი: ყოველთვის სამოქალაქო არეულობაზეა საუბარი, როცა ხელისუფლება გავლენას კარგავს

საქართველოს პრეზიდენტის იმპიჩმენტზე

ირაკლი ღარიბაშვილი სალომე ზურაბიშვილის ევროპაში ვიზიტებს გამოეხმაურა, რომელზეც მას მთავრობის ნებართვა არ აქვს. პრემიერმა ზურაბიშვილის განცხადებები საქართველოს წინააღმდეგ საბოტაჟად შეაფასა:

“მე ვფიქრობ, ეს მეტად სამწუხარო ფაქტია. შარშან და უფრო მანამდეც, არცერთი შემთხვევა არ არსებობს, როცა ჩვენ მას ასეთი ტიპის ვიზიტებზე უარი ვუთხარით. პირიქით, მე მას ყოველთვის მხარს ვუჭერდი და მისი გადაადგილება არასოდეს შემიზღუდავს.

მაგრამ, შეგახსენებთ, რომ ქალბატონ პრეზიდენტს ძალიან მძიმე განცხადებები აქვს გაკეთებული. მას საჯაროდ ნათქვამი აქვს, რომ თურმე, ჩვენი მთავრობა 12 რეკომენდაციას არ ასრულებს. მან ისიც განაცხადა, რომ კანდიდატის სტატუსს არ ვიმსახურებთ.

ამის შემდეგ, ის მინიმალური ნდობა, რაც ჩვენ შორის შენარჩუნებული იყო, დაიკარგა. მე ჩემი ხელმოწერით მას საქართველოს წინააღმდეგ საბოტაჟს ვერ გავაგრძელებინებდი და ამის თანამონაწილე ვერ გავხდებოდი. ჩვენ უბრალოდ ნდობა აღარ გვაქვს. თუ ჩვენი მანდატით რომელიმე ქვეყანაში ჩავიდოდა, არ ვიცი, იქ რას ილაპარაკებდა.

ჩვენი უარი ამით დასაბუთდა. იმიტომ, რომ ის ჩვენი ქვეყნის ეროვნულ ინტერესებს პირდაპირ ეწინააღმდეგებოდა. ჩვენი ინტერესი იყო და არის, რომ საქართველომ კანდიდატის სტატუსი მიიღოს. ამის წინააღმდეგ ნებისმიერი განცხადება და ქმედება საბოტაჟია.”

27 სექტემბერს სალომე ზურაბიშვილი ლიტვის პრეზიდენტს, გიტანას ნაუსედას ვილნიუსში შეხვდა. 

26 სექტემბერს კი ზურაბიშვილმა რიგაში, ლატვიის პრეზიდენტთან, ედგარს რინკევიჩთან გამართა შეხვედრა.

25 სექტემბერს ზურაბიშვილი ტალინში, ესტონეთის პრეზიდენტს, ალარ კარისს შეხვდა.

საქართველოს პრეზიდენტის ადმინისტრაციის ცნობით, სალომე ზურაბიშვილი აგრძელებს ევროპელ ლიდერებთან შეხვედრებს საქართველოსთვის ევროკავშირის კანდიდატის სტატუსის მინიჭების მხარდასაჭერად.

● შეძლებს თუ არა “ოცნება” პრეზიდენტის იმპიჩმენტს და რატომ წავიდა ამაზე მმართველი პარტია?

ჩარტერის სკანდალის შესახებ:

“მიყვარს აშშ, მიხარია, რომ ჩემმა შვილმა არჩევანი საუკეთესო ბიზნესსკოლაზე გააკეთა”, განაცხადა ირაკლი ღარიბაშვილმა სამთავრობო თვითმფრინავის სკანდალთან დაკავშირებით, რომლის გამოც ოპოზიციურმა პარტიებმა მისი იმპიჩმენტი მოითხოვეს.

ირაკლი ღარიბაშვილი: “მიზანმიმართულად გადავახდევინე ოჯახს, რომ კიდევ ერთხელ წარმომეჩინა კონტრასტი და განსხვავება ჩვენი ხელწერის, რომ ჩვენ არასდროს ბიუჯეტს არ ვიყენებთ და მეჩვენებინა მეორე უკიდურესობა, რაც იყო  10 წლის წინ იყო გამეფებული აქ, როცა საკუთარი პირადი მიზნებისთვის მილიონით ლარს ხარჯავდა სააკაშვილი და მისი ბანდა.

მადლობა ღმერთს, მე მყავს შეძლებული ოჯახი, მე არასდროს არ ვიყავი გაჭირვებული, პოლიტიკამდეც მე ვმუშაობდი ამ ქვეყნის უმდიდრეს ადამიანთან და ვმართავდი ყველაზე მდიდარ ფონდს, ჩემი ოჯახი არასდროს ყოფილა გაჭირვებული, ეს არ არის დამალული და ეს არ არის სიახლე.

თუ ობიექტურები ბრძანდებით, უნდა გაგერკვიათ… ჩემს ოჯახს აქვს შესაბამისი დადასტურებული შემოსავლებიც, ფინანსური სახსრებიც, ყველაფერი არის გამჭვირვალე, თუ რამე კითხვები გაქვთ, მე ყოველ წელს ვავსებ დეკლარაციებს, დაელოდეთ, ამ წელსაც შევავსებ დეკლარაციებს, მომავალ წელსაც შევავსებ.

● ოპოზიციური პარტიები და NGO-ები ღარიბაშვილის წინააღმდეგ იმპიჩმენტის პროცედურების და გამოძიების დაწყებას აპირებენ
● ოპოზიცია პრემიერის იმპიჩმენტის პროცედურას იწყებს. რას ნიშნავს ეს? ვახუშტი მენაბდის განმარტება
● სახელმწიფო დაცვის სამსახურის უფროსი: ღარიბაშვილის ჩარტერის ფული პრემიერის მამამ გადაიხადა

ოთარ ფარცხალაძეზე

“ოთარ ფარცხალაძე 10 წელზე მეტია, აღარ არის საჯარო მოხელე. გაკვირვება მინდა გამოვხატო, საერთოდ რატომ მოხდა ფარცხალაძის დასანქცირება, აუხსნელია, ჩემთვის, პირადად. მე ამის თაობაზე ღიად ვაფიქსირებ ჩემს აზრს. ჭიქაში ქარიშხალი არის ატეხილი. ეს არის ძალიან მგრძნობიარე საკითხი.

ყველა ის ადამიანი, რომელიც ქვეყნის ინტერესების საზიანოდ და სხვა ქვეყნის ინტერესების სასარგებლოდ მოქმედებს, ის არის ჩემს თვალში მოღალატე. მნიშვნელობა არ აქვს, რომელი ქვეყნის აგენტი იქნება. ის არის გამყიდველი და მოღალატე ადამიანი.

ჩემთვის და სახელმწიფო სამსახურებისთვის არ არის ცნობილი არცერთი ფაქტი, რომ ფარცხალაძემ ჩვენი ქვეყნის ინტერესების საზიანოდ და სხვა ქვეყნის ინტერესების სასარგებლოდ რაიმე ქმედება ჩაიდინა.“

14 სექტემბერს ოთარ ფარცხალაძეს ამერიკის შეერთებულმა შტატებმა სანქციები დაუწესა. სანქციების დაწესება ოთარ ფარცხალაძის ბიზნესსაქმიანობას და რუსულ “ეფესბესთან” თანამშრომლობას უკავშირდება. პაკეტის ოფიციალურად გამოცხადებამდე, მედიაში გავრცელდა ინფორმაცია, რომ სანქცირებულთა შორის იყო “ქართველი-რუსი ოლიგარქი”.

● სახელმწიფო დეპარტამენტი: ვინც ფარცხალაძესთან ტრანზაქციებს ახორციელებს, თავს სანქციების რისკის ქვეშ აყენებს
● გამონაკლისი ბრძანება: ეროვნულმა ბანკმა ფარცხალაძეს ანგარიშებზე წვდომა აღუდგინა
● არასამთავრობოები: საქართველოს სპეცსამსახურები რუსული გავლენების გასანეიტრალებლად არ მოქმედებენ