გიორგი გაბუნია: ოქუაშვილმა გადაწყვიტა გააკეთოს ივანიშვილის საქმე- დახუროს „მთავარი არხი“
ოქუაშვილი “მთავარი არხის” წინააღმდეგ
ერთ-ერთი მთავარი ოპოზიციური არხის, “მთავარი არხის” გენერალურმა დირექტორმა, გიორგი გაბუნიამ 11 დეკემბერს გააკეთა განცხადება, რომ არხის ერთ-ერთ დამფუძნებელს, ბიზნესმენ ზაზა ოქუაშვილს მიზანმიმართულად მიჰყავს არხი დახურვამდე და ამისთვის კონკრეტულ ნაბიჯებს დგამს.
“ზაზა ოქუაშვილმა გადაწყვიტა გააკეთოს ის, რაც დღეს ბიძინა ივანიშვილს ძალიან სჭირდება – დახუროს „მთავარი არხი“ – განაცხადა გაბუნიამ.
გაბუნიას თქმით, რამდენიმე თვის წინ ოქუაშვილმა არხზე დირექტორად მიავლინა მისი ანდობით აღჭურვილი პირი, გოგი ქურდაძე, რომელიც მიზანმიმართულად აფერხებს არხის მუშაობას – ბლოკავს ყველა ფინანსურ ოპერაციას კომპანიაში და უარს ამბობს კომპანიისთვის სასიცოცხლოდ მნიშვნელოვანი კონტრაქტების გაფორმებაზე.
“მაგალითად, ჩვენს თანამშრომლებს მისი წყალობით შეუჩერდათ ჯანმრთელობის დაზღვევა, რაც განსაკუთრებით მნიშვნელოვანია დღევანდელ ვითარებაში, როდესაც ჟურნალისტებსა და ოპერატორებზე სისტემატური ძალადობა მიმდინარეობს, მაგრამ ოქუაშვილს და ქურდაძეს ეს არ აინტერესებთ, მიუხედავად იმისა, რომ ისინი – როგორც დამფუძნებელი და დირექტორი – პასუხისმგებელნი არიან კომპანიის თანამშრომლებზე,” – განაცხადა გაბუნიამ.
მისი თქმით, არსებობს საფუძვლიანი ეჭვი, რომ ოქუაშვილი მოქმედებს ან უშუალოდ “ქართულ ოცნებასთან” შეთანხმებით ან მასთან სავაჭროდ იყენებს “მთავარ არხს”:
“ოქუაშვილს აქვს მძიმე სასამართლო დავა ბიძინა ივანიშვილთან, რაც კი არ გამორიცხავს მათ შორის თანამშრომლობას, არამედ პირიქით – სწორედ ამ დავაში შეთანხმების მისაღწევად ოქუაშვილს ძალიან სჭირდება „მთავარი არხით“ მანიპულირება,” – აღნიშნა გაბუნიამ.
“ნაცვლად იმისა, რომ ამ ვითარებაში დამფუძნებელი, პირიქით, ყველაფერს აკეთებდეს თავისი გუნდის დასახმარებლად, “მთავარი არხის“ ერთ-ერთმა დამფუძნებელმა გადაწყვიტა თვითონაც ჩაერთოს „ქართული ოცნებისგან“ წამოწყებულ მასობრივ ძალადობაში და მის ხელთ არსებული საშუალებებით თავადაც იძალადოს ჩვენს ჟურნალისტებზე, რათა მათი მუშაობა შეუძლებელი გახადოს,” – განაცხადა გიორგი გაბუნიამ.
აღნიშნული განცხადება „მთავარი არხის“ გენერალურმა დირექტორმა, გიორგი გაბუნიამ არხის ოფისში გააკეთა. მის ზურგს უკან იდგნენ არხის თანამშრონლები.
გაბუნიას თქმით, ჟურნალისტები იბრძოლებენ და სადამდეც შეეძლებათ, იქნებიან ეთერში, თუმცა მისივე თქმით, ამ კრიზისის გათვალისწინებით, რაც ერთ-ერთმა დამფუძნებელმა არხზე შექმნა, ეს რთული იქნება.
მისი თქმით, ზაზა ოქუაშვილის გადაწყვეტილებით და მისი დირექტორის ქმედებებით „მთავარი არხი“ უკვე დარჩა ფინანსური წყაროების გარეშე:
“ასევე ნელნელა წყდება ჩვენთან გაფორმებული კონტრაქტებიც, რაც, საბოლოოდ, არხის მუშაობას შეუძლებელს გახდის – ეს კი ზუსტად ის არის, რაც დღეს სჭირდება ბიძინა ივანიშვილს”.
__________________
“მთავარი არხი” 2019 წლის სექტემბერში, “რუსთავი 2”-დან წამოსულმა კოლექტივმა დააფუძნა. არხის დამფუძნებელი ნიკა გვარამიაა. ის იყო ასევე ამ არხის დირექტორი, ვიდრე დააპატიმრებდნენ. აჟამად გვარამია პოლიტიკური პარტია “ახლების ლიდერია. 4 დეკემბერს, პროევროპული აქციების დროს, გვარამია დააკავეს და მას ორკვირიანი პატიმრობა მიუსაჯეს პოლიციისთვის წინააღმდეგობის გაწევის მიზნით.
